04/06/2026
لوئر دیر میں پہلی HPV ویکسینیشن مہم کا آغاز، ایک لاکھ 13 ہزار سے زائد بچیوں کو ویکسین لگانے کا ہدف
تیمرگرہ(اسماعیل انجم سے) لوئر دیر میں ہیومن پیپیلوما وائرس (HPV) ویکسینیشن مہم کے حوالے سے پہلی اسٹیئرنگ کمیٹی کا اجلاس ڈپٹی کمشنر لوئر دیر بشارت احمد کی زیر صدارت منعقد ہوا۔ اجلاس میں ایڈیشنل ڈپٹی کمشنر جنرل واجد علی خان، ڈسٹرکٹ ہیلتھ آفیسر ڈاکٹر نیاز محمد آفریدی، کوآرڈینیٹر ای پی آئی ڈاکٹر ناصر خان، ڈاکٹر احسان اللہ، ڈاکٹر ولی خان، ڈاکٹر نجیب اللہ سمیت مختلف محکموں کے سربراہان اور متعلقہ افسران نے شرکت کی۔
اجلاس کو HPV ویکسینیشن مہم کے مختلف پہلوؤں پر تفصیلی بریفنگ دی گئی۔ شرکاء کو بتایا گیا کہ ہیومن پیپیلوما وائرس مختلف اقسام کے کینسر کا باعث بن سکتا ہے اور اس وائرس سے پیدا ہونے والے سرطان کے کیسز کی شرح تشویشناک ہے۔
بریفنگ کے دوران بتایا گیا کہ ضلع لوئر دیر میں پہلی مرتبہ EST-HPV ویکسینیشن مہم شروع کی جا رہی ہے، جس کے لیے تمام انتظامات مکمل کر لیے گئے ہیں۔ مہم کے دوران ضلع بھر میں 9 سے 14 سال عمر کی ایک لاکھ 13 ہزار 900 بچیوں کو ویکسین لگانے کا ہدف مقرر کیا گیا ہے۔
اس مقصد کے لیے 120 ٹیمیں تشکیل دی گئی ہیں جن میں 56 فکسڈ ٹیمیں شامل ہیں، جبکہ 41 فرسٹ لیول سپروائزرز نگرانی کے فرائض انجام دیں گے۔ محکمہ تعلیم سے متعلقہ ڈیٹا بھی حاصل کر لیا گیا ہے اور مؤثر عملدرآمد کے لیے ہر یونین کونسل کو 10 بلاکس میں تقسیم کیا گیا ہے۔ سکول سیشنز، تربیتی پروگراموں اور عوامی آگاہی مہم پر بھی خصوصی توجہ دی جا رہی ہے۔
اجلاس سے خطاب کرتے ہوئے ڈپٹی کمشنر بشارت احمد نے ہدایت کی کہ ویکسینیشن مہم میں خواتین عملے کی بھرپور شمولیت کو یقینی بنایا جائے تاکہ مقررہ ہدف حاصل کیا جا سکے۔ انہوں نے علماء کرام، والدین، اساتذہ اور سماجی حلقوں سے اپیل کی کہ وہ HPV ویکسینیشن مہم کی کامیابی کے لیے عوام میں شعور اجاگر کریں تاکہ بچیوں کو اس وائرس اور مستقبل میں کینسر جیسے موذی مرض کے خطرات سے محفوظ بنایا جا سکے۔
ڈپٹی کمشنر نے اس عزم کا اظہار کیا کہ ضلعی انتظامیہ مہم کی کامیابی کے لیے ہر ممکن تعاون فراہم کرے گی اور جن علاقوں میں مشکلات یا چیلنجز درپیش ہوں گے وہاں خصوصی اقدامات اٹھاتے ہوئے مہم کے اہداف بروقت اور مؤثر انداز میں حاصل کیے جائیں گے۔
