09/09/2026
لوکل گورنمنٹ کا نظام مکمل آن لائن، شفافیت سے بے ضابطگیوں کی گنجائش ختم ہو گی، خالد محمود گسورا
ٹوبہ ٹیک سنگھ (محمد آصف حسین رانا سے) ڈپٹی ڈائریکٹر لوکل گورنمنٹ خالد محمود گسورا سے صحافیوں کے وفد نے ملاقات کی، وفد میں چیف آرگنائزر ڈسٹرکٹ میڈیا پریس کلب ٹوبہ ٹیک سنگھ و صدر پریس کلب ٹوبہ ٹیک سنگھ محمد آصف حسین رانا اور صدر ڈسٹرکٹ میڈیا پریس کلب ٹوبہ ٹیک سنگھ و چیئرمین ایگزیکٹو کمیٹی ڈاکٹر لیاقت کامران شامل تھے، ملاقات کے دوران لوکل گورنمنٹ کے دفتری امور اور شہریوں کو فراہم کی جانے والی مختلف خدمات کو مکمل طور پر آن لائن کرنے کے حوالے سے تفصیلی گفتگو ہوئی، ڈپٹی ڈائریکٹر خالد محمود گسورا نے بتایا کہ آن لائن نظام پر کام شروع ہو چکا ہے اور شہریوں کے مختلف دستاویزات اور سرٹیفکیٹس سمیت متعلقہ معاملات کو ڈیجیٹل نظام کے ذریعے آگے بڑھایا جا رہا ہے، انہوں نے کہا کہ اس نظام کا اہم فائدہ یہ ہو گا کہ آنے والے چند ماہ میں متعلقہ ریکارڈ اور ڈیٹا زیادہ شفاف انداز میں دستیاب ہو گا، جس سے کسی بھی قسم کی بے ضابطگی یا غیر قانونی طریقہ کار کی گنجائش مزید کم ہو جائے گی، انہوں نے کہا کہ جائیداد اور پراپرٹی سے متعلق جن معاملات میں مختلف محکموں کے درمیان ریکارڈ یا معلومات کے حوالے سے مسائل پیدا ہوتے ہیں، ڈیجیٹل نظام ان امور میں بھی شفافیت اور ریکارڈ کی درستگی بہتر بنانے میں معاون ثابت ہو گا، خالد محمود گسورا نے کہا کہ محکمہ لوکل گورنمنٹ میں کرپشن اور بدعنوانی کسی صورت برداشت نہیں کی جائے گی اور کسی سیکرٹری یا متعلقہ اہلکار کے خلاف شکایت ثابت ہونے کی صورت میں قانون اور محکمانہ قواعد کے مطابق سخت کارروائی عمل میں لائی جائے گی، انہوں نے شہریوں سے اپیل کی کہ اپنے کاغذات مکمل ہونے کے باوجود آن لائن درخواست کے پراسیس میں مقررہ وقت لگ سکتا ہے، اس لیے شہری صبر و تحمل کا مظاہرہ کرتے ہوئے درخواست کے مکمل پراسیس ہونے کا انتظار کریں اور کسی غیر قانونی ذریعے یا سفارش کا سہارا نہ لیں، انہوں نے کہا کہ آن لائن نظام کا بنیادی مقصد عوام کو آسان، شفاف اور میرٹ پر خدمات کی فراہمی یقینی بنانا ہے۔
