10/08/2025
میڈیا سنٹر وفاق المدارس العربیہ پاکستان
اسلام آباد/ کراچی/ ملتان(10 اگست2025ء)
وفاق المدارس العربیہ پاکستان کے قائدین مولانا مفتی محمد تقی عثمانی،مولانا انوار الحق،مولانا سعید یوسف،
مولانا محمد حنیف جالندھری اور دیگر نے اسلام آباد میں مدنی مسجد کی شہادت کو افسوسناک،قابل مذمت اور اشتعال انگیز قرار دیا-انہوں نے کہا کہ ضیاء الحق دور سے قائم قدیمی مسجد اور دینی مدرسہ کو شہید کرنا اللہ ربّ العزت کے غیظ و غضب کو دعوت دینے کے مترادف ہے- وفاق المدارس العربیہ پاکستان کے قائدین نے کہا کہ ملک بھر میں شدید تشویش و اضطراب بلکہ اشتعال پایا جاتا ہے اور اس جسارت سے دنیا بھر کے مسلمانوں کے جذبات مجروح ہوئے ہیں اس صورت حال کی ہر قیمت پر تلافی کی جائے-وفاق المدارس العربیہ پاکستان کے قائدین نے مطالبہ کیا کہ مسجد و مدرسہ کو اپنی جگہ پر دوبارہ تعمیر کیا جائے ورنہ اس کے ملک کے مستقبل پر بہت منفی اثرات مرتب ہوں گے- وفاق المدارس العربیہ پاکستان کے قائدین نے کہا کہ ملک کو بدامنی اور افتراق کا شکار کرنے والے ایسے فیصلہ سازوں کی نشاندہی کرکے ان کے خلاف سخت کاروائی کی جائے اور آئندہ کے لیے ایسے کسی بھی اقدام سے توبہ و استغفار کا اہتمام کیا جائے-
