17/09/2026
جنوبی وزیرستان لوئر میں صحافیوں کی جانب سے سرکاری افسران سے متعلق سوالات اٹھانا جائز ہے، نصراللہ خان وزیر
صدر ڈسٹرکٹ پریس کلب وانا قسمت اللہ وزیر کے مؤقف کی حمایت کرتے ہیں، سرکاری افسران اپنی ذمہ داریاں باقاعدگی سے انجام دیں، سابق کسٹمز کلیکٹر نصر اللہ خان وزیر
وانا : معروف سیاسی رہنما اور سابق کسٹمز کلیکٹر نصراللہ خان وزیر نے کہا ہے کہ چند روز قبل ڈسٹرکٹ پریس کلب وانا کے صدر قسمت اللہ وزیر کی جانب سے محکمہ جنگلات کے ڈی ایف او اور محکمہ زراعت کے ڈائریکٹر کے حوالے سے اٹھایا گیا معاملہ جائز اور مناسب تھا۔
انہوں نے صدر ڈسٹرکٹ پریس کلب وانا قسمت اللہ وزیر سمیت پریس کلب کے تمام صحافیوں کی مکمل حمایت کا اعلان کرتے ہوئے کہا کہ جنوبی وزیرستان لوئر میں تعینات تمام سرکاری افسران اور اہلکاروں کو اپنی ذمہ داریاں باقاعدگی سے انجام دینی چاہئیں اور عوام کو درپیش مسائل کے حل کے لیے اپنے فرائض کی ادائیگی یقینی بنانی چاہیے۔
نصراللہ خان وزیر نے کہا کہ جن افسران کی ڈیوٹی جنوبی وزیرستان لوئر میں ہے، انہیں یہاں موجود رہ کر عوام کی خدمت کرنی چاہیے۔ اگر کوئی افسر اپنی ذمہ داریاں انجام نہیں دے سکتا تو اسے متعلقہ حکام سے اپنے تبادلے کے لیے رجوع کرنا چاہیے۔
انہوں نے کہا کہ صحافیوں نے عوامی مسائل اور سرکاری محکموں کی کارکردگی کے حوالے سے جو مؤقف اختیار کیا ہے، وہ اس کی حمایت کرتے ہیں، تاہم صحافیوں کی بلاجواز مخالفت کرنے والوں کے مؤقف سے اتفاق نہیں کرتے۔
انہوں نے جنوبی وزیرستان لوئر کے تعلیم یافتہ طبقے سے اپیل کی کہ اگر صحافی کسی سرکاری محکمے یا افسر کے حوالے سے کوئی سوال اٹھائیں یا خبر شائع کریں تو متعلقہ محکمہ حقائق اور شواہد کی بنیاد پر اپنا مؤقف پیش کرے۔ اگر محکمہ حقائق پر مبنی وضاحت پیش کرے تو وہ بھی محکمہ کے مؤقف کی حمایت کریں گے، تاہم کسی صحافی کی جانب سے بلاجواز الزام تراشی، توہین یا غیر مناسب زبان کا استعمال بھی درست عمل نہیں۔
نصراللہ خان وزیر نے واضح کیا کہ حق اور سچ کی بات کرنے پر وہ ڈسٹرکٹ پریس کلب وانا کے صدر قسمت اللہ وزیر سمیت تمام صحافیوں کے ساتھ کھڑے ہیں اور ان کے جائز مؤقف کی حمایت جاری رکھیں گے۔
