http://internationalmalayaly.com/

Internationalmalayalynews, Salwa Road, Doha (2026)

12/06/2026

ഫിഫ ലോകകപ്പ് 2026 ന് മെകിസിക്കോയിലെ എസ്റ്റാഡിയോ ആസ്ടെക്കയില്‍ ഉജ്വല തുടക്കം
അത്യാകര്‍ഷമായ ഉദ്ഘാടന ചടങ്ങും ആവേശം വാനോളമുയര്‍ത്തിയ മല്‍സരങ്ങളും ഉദ്ഘാടന ദിവസത്തെ സവിശേഷമാക്കി.
ഉദ്ഘാടന മല്‍സരത്തില്‍ എതിരില്ലാത്ത രണ്ട് ഗോളുകള്‍ക്ക് സൗത്താഫ്രിക്കയെ പരാജയപ്പെടുത്തി ആതിഥേയരായ മെക്‌സികോ ജേതാക്കളായി.
രണ്ടാമത്തെ മല്‍സരത്തില്‍ ഒന്നിനെതിരെ രണ്ട് ഗോളുകള്‍ക്ക് ചെക്ക് റിപബ്‌ളികിനെ പരാജയപ്പെടുത്തി ദക്ഷിണ കൊറിയയാണ് ജേതാക്കളായത്.

12/06/2026

ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍ താനി ഇന്നലെ യുഎസ് പ്രസിഡന്റ് ഡൊണാള്‍ഡ് ട്രംപുമായി ടെലിഫോണ്‍ സംഭാഷണം നടത്തി
ഉഭയകക്ഷി ബന്ധങ്ങളെക്കുറിച്ചും ഏറ്റവും പുതിയ പ്രാദേശിക, അന്തര്‍ദേശീയ സംഭവവികാസങ്ങളെക്കുറിച്ചും അവര്‍ ചര്‍ച്ച ചെയ്തു.

12/06/2026

യുദ്ധ വാർത്തകൾക്കപ്പുറം: പ്രവാസവും നമ്മുടെ അടുക്കളകളും അഭിമുഖീകരിക്കുന്ന യാഥാർത്ഥ്യം :
ഹഫീസുല്ല കെ വി

വീണ്ടും യുദ്ധത്തിന്റെ കാർമേഘങ്ങൾ ഗൾഫിന്റെ ആകാശത്തിൽ ഇരുൾ പരത്തിയ സാഹചര്യത്തിൽ മനസ്സിൽ തോന്നിയ ചില കാര്യങ്ങൾ ഇവിടെ കുറിക്കുകയാണ്.

അന്താരാഷ്ട്ര തലത്തിൽ പുതിയ യുദ്ധ ഭീഷണികളും ഒപ്പം നയതന്ത്ര ചർച്ചകളും പതിവുപോലെ നടക്കുകയാണ്. ഹോർമുസ് കടലിടുക്കിലെ അനിശ്ചിതത്വവും വ്യോമപാത നിയന്ത്രണങ്ങളും വാർത്താ ചാനലുകളിലെ പ്രധാന തലക്കെട്ടുകളാകുന്നു. എന്നാൽ, വൻശക്തികൾ എന്ത് ചെയ്യുന്നു എന്നതിലുപരി നമ്മൾ ഗൗരവമായി ആലോചിക്കേണ്ടതും ചർച്ച ചെയ്യേണ്ടതും മറ്റൊന്നാണ് — ഈ ആഗോള പ്രതിസന്ധികൾ നമ്മുടെ ദൈനംദിന ജീവിതത്തെ എങ്ങനെയൊക്കെ ബാധിക്കും?

മാധ്യമങ്ങൾ ആഘോഷിക്കുന്ന ഭൂപടങ്ങളിലല്ല, മറിച്ച് പ്രവാസിയുടെ തൊഴിലിടങ്ങളിലും നാട്ടിലെ സാധാരണക്കാരന്റെ അടുക്കളകളിലുമാണ് ഈ പ്രതിസന്ധിയുടെ യഥാർത്ഥ ആഘാതം പ്രതിഫലിക്കാൻ പോകുന്നത്.

ചർച്ച ചെയ്യപ്പെടേണ്ട പ്രധാന യാഥാർത്ഥ്യങ്ങൾ

1. ഗൾഫിലെ തൊഴിൽ സുരക്ഷിതത്വം (Job Security)

മേഖലയിലെ അസ്ഥിരതയും വ്യോമ-കടൽ മാർഗങ്ങളിലെ നിയന്ത്രണങ്ങളും ലോജിസ്റ്റിക്സ്, ഏവിയേഷൻ, ടൂറിസം, റീട്ടെയിൽ തുടങ്ങിയ പല മേഖലകളെയും ബാധിക്കാം. കമ്പനികൾ സ്വാഭാവികമായും പുതിയ നിയമനങ്ങൾ മരവിപ്പിക്കാനും ചെലവുകൾ വെട്ടിക്കുറയ്ക്കാനും ശ്രമിക്കും. ചിലപ്പോൾ കൂട്ട പിരിച്ചുവിടലുകൾ വരെ ഉണ്ടാവാനുള്ള സാധ്യതയും തള്ളിക്കളയാനാവില്ല.

ഈ സാഹചര്യത്തിൽ പ്രവാസലോകത്തെ ഓരോ തൊഴിലാളിയും തന്റെ തൊഴിലും വരുമാനവും കൂടുതൽ ഉത്തരവാദിത്തത്തോടെയും ജാഗ്രതയോടെയും സംരക്ഷിക്കേണ്ടതുണ്ട്. നിലവിൽ ലഭിക്കുന്ന ശമ്പള പാക്കേജുകളിലും അലവൻസുകളിലും മാറ്റങ്ങൾ സംഭവിക്കാനുള്ള സാധ്യതയും മുന്നിൽ കാണേണ്ടതാണ്. പ്രത്യേകിച്ച് പുതിയ അധ്യയന വർഷം ആരംഭിക്കുന്ന ഈ സമയത്ത് കുടുംബച്ചെലവുകളെക്കുറിച്ചും ദീർഘകാല സാമ്പത്തിക പദ്ധതികളെക്കുറിച്ചും ആലോചിച്ച് തീരുമാനമെടുക്കുന്നത് ഉചിതമായിരിക്കും.

2. ബിസിനസ്സുകളുടെ നിലനിൽപ്പ്

ചരക്കുനീക്കം തടസ്സപ്പെടുകയും ഇൻഷുറൻസ് ചെലവുകൾ വർധിക്കുകയും ചെയ്താൽ ഗൾഫിലെയും നാട്ടിലെയും ബിസിനസ്സുകളുടെ പ്രവർത്തനച്ചെലവ് (Cost of Doing Business) ഗണ്യമായി ഉയരാം. വിപണിയിലെ പണലഭ്യത കുറയുമ്പോൾ വലിയ തുകകൾക്ക് ക്രെഡിറ്റ് നൽകുന്നത് സാമ്പത്തിക അപകടസാധ്യത വർധിപ്പിക്കും.

അത്തരം സാഹചര്യങ്ങളിൽ ചെലവ് നിയന്ത്രണവും കാഷ് ഫ്ലോ മാനേജ്മെന്റുമാണ് ഏറ്റവും പ്രധാനപ്പെട്ടത്. പ്രത്യേകിച്ച് ചെറുകിട-ഇടത്തരം സംരംഭങ്ങൾക്കാണ് ഇത്തരം പ്രതിസന്ധികളുടെ ആഘാതം കൂടുതൽ അനുഭവപ്പെടുക. നിലനിൽപ്പ് തന്നെ പലർക്കും പ്രധാന വെല്ലുവിളിയായി മാറാൻ സാധ്യതയുണ്ട്.

3. നാട്ടിലെ കുടുംബങ്ങളുടെ മനോഭാവം

ഏറ്റവും വലിയ ആശങ്ക നാട്ടിലുള്ള കുടുംബങ്ങളുടെ സാമ്പത്തിക ബോധത്തെക്കുറിച്ചാണ്. "എല്ലാ മാസവും പണം അക്കൗണ്ടിൽ വരും" എന്ന ധാരണയിൽ മുന്നോട്ട് പോകുന്ന കുടുംബങ്ങൾ ഇന്നും കുറവല്ല.

പ്രവാസലോകത്തിലെ ഒരു ചെറിയ ചലനം പോലും നാട്ടിലെ കുടുംബ ബജറ്റുകളെ തകിടം മറിക്കുമെന്ന തിരിച്ചറിവ് അവർക്കുണ്ടാകണം. എല്ലാ മാസവും പണം വരുന്നത് ഒരു സ്ഥിരാവസ്ഥയായി കാണാതെ, സാമ്പത്തിക സൂക്ഷ്മതയും അച്ചടക്കവും പാലിക്കാൻ കുടുംബങ്ങൾ തയ്യാറാകേണ്ട സമയമാണിത്.

അതോടൊപ്പം, കുടുംബങ്ങൾക്ക് സാധ്യമായ അധിക വരുമാന മാർഗങ്ങൾ കണ്ടെത്താനും ശ്രമിക്കാം. അടുക്കളത്തോട്ടം പോലുള്ള ചെറിയ സംരംഭങ്ങൾ പോലും ചില സാഹചര്യങ്ങളിൽ സഹായകമാകാം. സ്വയംപര്യാപ്തതയിലേക്കുള്ള ചെറിയ ചുവടുകൾ പോലും ഭാവിയിൽ വലിയ സുരക്ഷയായി മാറാം.

4. ഇന്ധന ലഭ്യതയും വിലക്കയറ്റവും

ലോകത്തെ എണ്ണ-വാതക വ്യാപാരത്തിന്റെ പ്രധാന ഭാഗം ഹോർമുസ് കടലിടുക്കിലൂടെ കടന്നുപോകുന്നു. അവിടെ ഉണ്ടാകുന്ന തടസ്സങ്ങൾ ആഗോള വിപണിയിൽ ക്രൂഡ് ഓയിൽ വില വർധിപ്പിക്കാൻ കാരണമാകാം.

ഇതിനകം തന്നെ ഉയർന്ന നിലയിലുള്ള ഇന്ധനവിലകൾക്ക് മേൽ കൂടുതൽ വർധനവുണ്ടാകാനുള്ള സാധ്യതയും നിലനിൽക്കുന്നുണ്ട്. ഇന്ധന ഇറക്കുമതിയെ ആശ്രയിക്കുന്ന രാജ്യങ്ങളിൽ ഇത് പെട്രോൾ, ഡീസൽ, പാചകവാതകം തുടങ്ങിയവയുടെ വില വർധനവിലേക്ക് നയിക്കുകയും അതിന്റെ പ്രതിഫലനം എല്ലാ മേഖലകളിലേക്കും വ്യാപിക്കുകയും ചെയ്യും.

ഇത് കുടുംബ ബജറ്റുകളിൽ നിന്ന് വ്യവസായ മേഖലയിലേക്കും പൊതുഗതാഗതത്തിൽ നിന്ന് വിലക്കയറ്റത്തിലേക്കും വ്യാപിക്കുന്ന നിരവധി ആഭ്യന്തര സാമ്പത്തിക വെല്ലുവിളികൾക്ക് കാരണമായേക്കാം.

5. സാമൂഹിക പ്രത്യാഘാതം (The Micro Impact)

ഇന്ധനവില ഉയരുമ്പോൾ ഗതാഗതച്ചെലവും ചരക്കുനീക്കച്ചെലവും വർധിക്കും. അതിന്റെ ഫലമായി നിത്യോപയോഗ സാധനങ്ങൾ, പച്ചക്കറികൾ, യാത്രാക്കൂലി എന്നിവയുടെ വിലയും കൂടും. ഇതോടെ സാധാരണ കുടുംബങ്ങളുടെ പ്രതിമാസ ബജറ്റുകൾക്ക് കൂടുതൽ സമ്മർദ്ദം നേരിടേണ്ടി വരും.

ഗൾഫിൽ നിന്നുള്ള പണമിടപാടുകൾ (Remittance) കുറയുകയും അതേസമയം നാട്ടിലെ ജീവിതച്ചെലവ് ഉയരുകയും ചെയ്താൽ കേരളത്തിന്റെ സമ്പദ്‌വ്യവസ്ഥയിലും അതിന്റെ പ്രതിഫലനം കാണാൻ സാധ്യതയുണ്ട്. കൂടാതെ ആഗോള വ്യാപാര ശൃംഖലകളിലുണ്ടാകുന്ന തടസ്സങ്ങൾ കാർഷിക മേഖല ഉൾപ്പെടെ പല മേഖലകളെയും ബാധിക്കാൻ സാധ്യതയുണ്ട്.

രാസവളങ്ങളുടെയും കാർഷിക ഉൽപ്പാദനത്തിനാവശ്യമായ മറ്റ് അസംസ്കൃത വസ്തുക്കളുടെയും ലഭ്യതയിൽ ഉണ്ടാകുന്ന തടസ്സങ്ങൾ കൃഷിമേഖലയെ ബാധിക്കാനും സാധ്യതയുണ്ട്. ഇത്തരം സാഹചര്യങ്ങൾ ഭക്ഷ്യസുരക്ഷയുടെയും പ്രാദേശിക ഉൽപ്പാദനത്തിന്റെയും പ്രാധാന്യം വീണ്ടും ഓർമ്മിപ്പിക്കുന്നു. സ്വയംപര്യാപ്തതയിലേക്കുള്ള നീക്കങ്ങൾ ഇനി ഒരു തിരഞ്ഞെടുപ്പല്ല, മറിച്ച് ഒരു മുൻകരുതലായി കാണേണ്ട സമയമാണിത്.

6. പ്ലാൻ Bയും പ്ലാൻ Cയും

പ്രതിസന്ധി ദീർഘകാലം നീണ്ടുനിൽക്കുകയാണെങ്കിൽ പ്രവാസജീവിതത്തിൽ അപ്രതീക്ഷിത മാറ്റങ്ങൾ സംഭവിക്കാനുള്ള സാധ്യതയെ അവഗണിക്കാനാവില്ല.

Plan B : ഗൾഫിലെ വരുമാനം താൽക്കാലികമായി നിലച്ചാലും കുടുംബം മുന്നോട്ട് പോകാൻ കഴിയുന്ന വിധത്തിൽ കുറഞ്ഞത് ആറുമാസത്തേക്കെങ്കിലും ആവശ്യമായ അടിയന്തര ഫണ്ട് (Emergency Fund) ലിക്വിഡ് രൂപത്തിൽ കരുതുക.

Plan C: പ്രവാസജീവിതം അവസാനിപ്പിക്കേണ്ടി വന്നാൽ നാട്ടിൽ ചെയ്യാൻ കഴിയുന്ന തൊഴിൽ, ചെറുകിട സംരംഭം, കൃഷി, അല്ലെങ്കിൽ കൂട്ടായ നിക്ഷേപ പദ്ധതികൾ എന്നിവയെക്കുറിച്ച് ഇപ്പോഴേ ചിന്തിക്കുകയും തയ്യാറെടുപ്പുകൾ നടത്തുകയും ചെയ്യുക.

📋 പ്രതിസന്ധിയെ മറികടക്കാൻ ഒരു To-Do List
✅ Do's (ചെയ്യേണ്ടവ)

* കുടുംബങ്ങളോട് തുറന്നു സംസാരിക്കുക.
* സാമ്പത്തിക അച്ചടക്കം പാലിക്കാൻ കുടുംബാംഗങ്ങളെയും പങ്കാളികളാക്കുക.
* പണലഭ്യത (Liquidity) നിലനിർത്തുക.
* കുറഞ്ഞത് ആറുമാസത്തെ അടിയന്തര ഫണ്ട് സൃഷ്ടിക്കുക.
* ഉയർന്ന പലിശയുള്ള കടങ്ങൾ കുറയ്ക്കുക.
* കുടുംബത്തിന് ആവശ്യമായ ആരോഗ്യ ഇൻഷുറൻസ് ഉറപ്പാക്കുക.

❌ Don'ts (ചെയ്യരുതാത്തവ)

* പുതിയ വലിയ വായ്പകൾ എടുക്കരുത്.
* ആഡംബര ചെലവുകൾ താൽക്കാലികമായി മാറ്റിവെക്കുക.
* ബിസിനസ്സിൽ അമിത ക്രെഡിറ്റ് അനുവദിക്കരുത്.
* വ്യാജ വാർത്തകളും അഭ്യൂഹങ്ങളും വിശ്വസിക്കരുത്.
* പഴയ ജീവിതശൈലി അന്ധമായി തുടരരുത്; സാഹചര്യങ്ങൾ വിലയിരുത്തി ചെലവുകൾ നിയന്ത്രിക്കുക.

അവസാനമായി

പ്രതിസന്ധികൾ വരുമോ വരില്ലയോ എന്നത് നമ്മുടെ നിയന്ത്രണത്തിലല്ല. എന്നാൽ പ്രതിസന്ധികൾ വന്നാൽ അതിനെ നേരിടാൻ നാം എത്രത്തോളം തയ്യാറാണ് എന്നത് നമ്മുടെ കൈകളിലാണ്.

ഭയം കൊണ്ടല്ല, ബോധം കൊണ്ടാണ് തീരുമാനങ്ങൾ എടുക്കേണ്ടത്. യുദ്ധങ്ങൾ ആരംഭിക്കുന്നത് അതിർത്തികളിലായിരിക്കാം; പക്ഷേ അതിന്റെ പ്രതിഫലനം പലപ്പോഴും അനുഭവപ്പെടുന്നത് നമ്മുടെ വീടുകളിലും അടുക്കളകളിലുമാണ്.

പ്രതിസന്ധികളെ പ്രവചിക്കാൻ നമ്മൾക്കാവില്ല. പക്ഷേ അവയ്ക്കായി തയ്യാറെടുക്കാൻ നമുക്ക് കഴിയും. ഇന്നത്തെ ജാഗ്രതയും ദീർഘവീക്ഷണവുമാണ് നാളത്തെ സുരക്ഷയുടെ ഏറ്റവും വലിയ അടിത്തറ.

ചിന്തയും ദീർഘവീക്ഷണവുമാണ് ഏതൊരു പ്രതിസന്ധി ഘട്ടത്തിലും നമ്മുടെ ഏറ്റവും വലിയ ആയുധം.

12/06/2026

2026 ന്റെ ആദ്യ പാദത്തില്‍ 5.2 ബില്യണ്‍ റിയാലിന്റെ റിയല്‍ എസ്റ്റേറ്റ് ഇടപാടുകള്‍

2026 ലെ ആദ്യ മൂന്ന് മാസങ്ങളില്‍ ഖത്തറിന്റെ റിയല്‍ എസ്റ്റേറ്റ് വിപണി വന്‍ വളര്‍ച്ച റിപ്പോര്‍ട്ട് ചെയ്തു. ഈ വര്‍ഷത്തെ ആദ്യ പാദത്തില്‍ 1,162 ഇടപാടുകളിലായി 5.201 ബില്യണ്‍ റിയാലിന്റെ ഇടപാടുകള്‍ റിയല്‍റ്റി മേഖലയില്‍ നടന്നു, മുന്‍ വര്‍ഷം ഇതേ കാലയളവില്‍ 1,030 ഇടപാടുകളിലായി 4.097 റിയാലായിരുന്നു ഇത്.

നീതിന്യായ മന്ത്രാലയത്തിന്റെ ഡാറ്റ പ്രകാരം, മൊത്തം മൂല്യത്തില്‍ ഏകദേശം 27 ശതമാനത്തിന്റെയും റിയാലിറ്റി ഇടപാടുകളില്‍ 12 ശതമാനത്തിന്റെയും വര്‍ദ്ധനവുണ്ട്

12/06/2026

എഫ് സി സി വായനക്കൂട്ടം പുസ്തക ചര്‍ച്ച നാളെ

ദോഹ : ഖത്തറിലെ വായനാപ്രേമികളുടെ കൂട്ടായ്മയായ എഫ് സി സി വായനകൂട്ടായ്മ സംഘടിപ്പിക്കുന്ന പുസ്തകചര്‍ച്ച മെയ് 13ന് ശനിയാഴ്ച 7മണിക്ക് ഹിലാല്‍ എഫ്‌സിസി ഹാളില്‍ നടക്കും. മുതിര്‍ന്ന മാധ്യമപ്രവര്‍ത്തകന്‍ അഹമ്മദ് പാതിരിപറ്റയുടെ 'ദോഹയില്‍ നടന്നു തീര്‍ത്ത വഴികള്‍' പുസ്തകത്തിന്റെ വായനാസ്വാദനത്തില്‍ ഖത്തറിലെ എഴുത്തുകാരും സാംസ്‌കാരിക, മാധ്യമപ്രവര്‍ത്തകരും പങ്കെടുത്തു സംസാരിക്കും . എഫ് സി സി എക്സി : ഡയറക്റ്റര്‍ ഹബീബ് റഹ്‌മാന്‍ കിഴിശേരി അധ്യക്ഷതവഹിക്കും. കൂടുതല്‍ വിവരങ്ങള്‍ക്ക്

66572518 എന്ന നമ്പറില്‍ ബന്ധപെടാവുന്നതാണ്

12/06/2026

നാദാപുരം സ്വദേശി ഖത്തറില്‍ നിര്യാതനായി

ദോഹ : വക്രയിലെ ഒരു ഗാരേജില്‍ ജോലി ചെയ്യുകയായിരുന്ന നാദാപുരത്തിനടുത്ത് ചെക്ക്യാട് പുളിയാവ് സ്വദേശി മീത്തലെരിയത്ത് കല്ലുള്ളതില്‍ സാബിത്ത് (41) ആണ് മരിച്ചത്.
പിതാവ് : അബു
മാതാവ് : ഐഷു
ഭാര്യ : ബരീറ
നടപടി ക്രമങ്ങള്‍ പൂര്‍ത്തിയാക്കി ഇന്ന് (വെള്ളി ) വൈകുന്നേരം കോഴിക്കോട്ടേക്കുള്ള ഖത്തര്‍ എയര്‍വേസ് വിമാനത്തില്‍ മയ്യിത്ത് നാട്ടിലേക്ക് കൊണ്ട് പോകുമെന്ന് അല്‍ ഇഹ്‌സാന്‍ മയ്യിത്ത് പരിപാലന കമ്മിറ്റി ഭാരവാഹികള്‍ അറിയിച്ചു

12/06/2026

ഇരുപത്തിരണ്ടാമത് പ്രൊജക്ട് ഖത്തര്‍ സമാപിച്ചു
നിര്‍മാണ മേഖലയിലെ നൂതന സംവിധാനങ്ങളും ഉല്‍പന്നങ്ങളും പരിചയപ്പെടുത്തിയ മൂന്ന് ദിവസം നീണ്ട ഇരുപത്തിരണ്ടാമത് പ്രൊജക്ട് ഖത്തര്‍ ദോഹ ഇന്റര്‍നാഷണല്‍ എക്‌സിബിഷന്‍ ആന്റ് കണ്‍വെന്‍ഷന്‍ സെന്ററില്‍ സമാപിച്ചു

11/06/2026

വാരാന്ത്യത്തില്‍ 45 ഡിഗ്രിവരെ ചൂട്, ശനിയാഴ്ച പൊടിക്കാറ്റിന് സാധ്യത
ഖത്തര്‍ കാലാവസ്ഥ വകുപ്പ് നല്‍കുന്ന സൂചനയനുസരിച്ച് വാരാന്ത്യത്തില്‍ 45 ഡിഗ്രിവരെ ചൂട് അനുഭവപ്പെടും. ശനിയാഴ്ച പൊടിക്കാറ്റിനും സാധ്യതയുണ്ട്

11/06/2026

ഖത്തര്‍ ഇന്‍കാസ് പാലക്കാട് ജില്ലാ യൂത്ത് വിംഗ് മെഡിക്കല്‍ ക്യാമ്പ് നാളെ

ഇന്‍കാസ് പാലക്കാട് ജില്ലാ കമ്മിറ്റിയുടെ നേതൃത്വത്തില്‍ നസീം മെഡിക്കല്‍ സെന്ററിന്റെ സഹകരണത്തോടെ ഇന്‍കാസ് പാലക്കാട് ജില്ലാ യൂത്ത് വിംഗ് നടത്തുന്ന മെഡിക്കല്‍ ക്യാമ്പ് ജൂണ്‍ 12 വെള്ളിയാഴ്ച രാവിലെ 7 മണി മുതല്‍ ആരംഭിക്കും. വിവിധ മേഖലകളിലെ വിദഗ്ധ ഡോക്ടര്‍മാരുടെ സേവനത്തോടൊപ്പം ബ്ലഡ് ടെസ്റ്റ്, കണ്ണ് പരിശോധന, ദന്തപരിശോധന, ജനറല്‍ മെഡിസിന്‍ (ജി.പി.) കണ്‍സള്‍ട്ടേഷന്‍ ഉള്‍പ്പെടെ നിരവധി ആരോഗ്യ സേവനങ്ങള്‍ ക്യാമ്പില്‍ ഉണ്ടാവും.

മെഡിക്കല്‍ ക്യാമ്പില്‍ പങ്കെടുക്കാന്‍ ആഗ്രഹിക്കുന്നവര്‍ മുന്‍കൂട്ടി രജിസ്റ്റര്‍ ചെയ്യുകയോ ബുക്കിംഗ് നടത്തുകയോ ചെയ്യണമെന്ന് സംഘാടകര്‍ അറിയിച്ചു. കൂടുതല്‍ വിവരങ്ങള്‍ക്കും രജിസ്‌ട്രേഷനും താഴെ നല്‍കിയിരിക്കുന്ന ഫോണ്‍ നമ്പറുകളില്‍(77624367,66476336) ബന്ധപ്പെടാവുന്നതാണ്.

11/06/2026

ഇന്‍കാസ് ഖത്തര്‍ സലിം കുമാര്‍ അനുസ്മരണം സംഘടിപ്പിച്ചു

അന്തരിച്ച പ്രമുഖ സിനിമാതാരവും, ദേശീയ ഫിലിം അവാര്‍ഡ് ജേതാവുമായ സലിം കുമാറിന്റെ സ്മരണാര്‍ത്ഥം ഇന്‍കാസ് ഖത്തര്‍ അനുസ്മരണം സംഘടിപ്പിച്ചു. ഖത്തറിലെ സാമൂഹിക രംഗത്തെ പ്രമുഖരും, അപെക്‌സ് ബോഡി പ്രതിനിധികളും, ഇന്ത്യന്‍ കമ്യൂണിറ്റിയിലെ വിവിധ സംസ്ഥാന സംഘടനാ പ്രതിനിധികളും പങ്കെടുത്ത്, ഐ.സി.സി അശോകാ ഹാള്‍ തിങ്ങി നിറഞ്ഞ സദസ്സ് പ്രിയ നടനുള്ള തികഞ്ഞ ആദരവായി മാറി.

സലിം കുമാറിന്റെ അഭിനയ ജീവിതത്തെക്കുറിച്ച് ഇന്‍കാസ് നിര്‍മ്മിച്ച ഹ്രസ്വ വീഡിയോ പ്രദര്‍ശനത്തിന് ശേഷം, അദ്ദേഹത്തിന്റെ ഛായാചിത്രത്തില്‍ പുഷ്പാര്‍ച്ചനയോടെയാണ് അനുസ്മരണ യോഗം ആരംഭിച്ചത്. ഇന്‍കാസ് സെന്‍ട്രല്‍ കമ്മിറ്റി പ്രസിഡന്റ് സിദ്ധിഖ് പുറായില്‍ അദ്ധ്യക്ഷത വഹിച്ച ചടങ്ങില്‍, ജനറല്‍ സെക്രട്ടറി കെ.വി ബോബന്‍ സ്വാഗതം ആശംസിച്ചു.

ഐ.സി.സി പ്രസിഡന്റ് എ.പി.മണികണ്ഠന്‍, ഐ.സി.ബി. എഫ് പ്രസിഡന്റ് ഷാനവാസ് ബാവ, ഉപദേശക സമിതി ചെയര്‍മാന്‍ കെ. എസ്. പ്രസാദ്, വിവിധ സംഘടനകളെ പ്രതിനിധീകരിച്ച് പി.എസ്.എം. ഹുസൈന്‍ (കെ.എം.സി.സി), ഷംസീര്‍ അരിക്കുളം (സംസ്‌കൃതി ഖത്തര്‍), ഷെഫീക്ക് അറക്കല്‍ (ഇന്ത്യന്‍ മീഡിയ ഫോറം), ഉഷാ പാട്ടീല്‍ ( മഹാരാഷ്ട്ര മണ്ഡല്‍), ഡോ. കെ.സാബു (ഓഥേഴ്സ് ഫോറം), സുബ്രമഹ്ണ്യ ഹെബ്ബഗ്ഗലു (കര്‍ണാടക സംഘ), അജാസ് അലി (വേള്‍ഡ് മലയാളി ഫെഡറേഷന്‍), സത്യനാരായണ റെഡ്ഡി (തെലങ്കാന കലാ സമിതി), റിജിന്‍ പള്ളിയത്ത് (കുവാഖ്), മുഹമ്മദ് ഹുസൈന്‍ (എം.കെ.പി ഖത്തര്‍), ഗഫൂര്‍ കോഴിക്കോട് (കെ.പി.എ.ക്യു), ശ്രീജിത്ത് (ഫ്രണ്ട്‌സ് ഓഫ് തൃശ്ശൂര്‍), സക്കറിയ മാണിയൂര്‍ (കെ.സി.സി ഖത്തര്‍), കെ. ആര്‍ ജയരാജ് (കെ.ബി.എഫ് ഖത്തര്‍), കൃഷ്ണകുമാര്‍ (ഔട്ട്‌റീച്ച് ഖത്തര്‍), എസ്.എ.എം ബഷീര്‍, ഹൈദര്‍ ചുങ്കത്തറ, അബ്ദുള്‍ നാസര്‍ നാച്ചി, ഖലീല്‍ അമ്പലത്ത്, കെ.കെ. ഉസ്മാന്‍, ജോണ്‍ ഗില്‍ബര്‍ട്ട് തുടങ്ങിയവര്‍ സലിം കുമാറിനെ അനുസ്മരിച്ച് സംസാരിച്ചു.

മിമിക്രി വേദികളിലൂടെ കലാരംഗത്തെത്തി, തന്റെ മൂന്ന് പതിറ്റാണ്ട് നീണ്ട സിനിമാ ജീവിതത്തിലെ മുന്നൂറിലധികം സിനിമകളില്‍ ഹാസ്യകഥാപാത്രങ്ങളിലൂടെയും സ്വഭാവനടനിലൂടെയും മലയാള സിനിമയില്‍ തന്റേതായ വ്യക്തിമുദ്ര പതിപ്പിച്ച വ്യക്തിത്വമായിരുന്നു സലിം കുമാറെന്ന് അനുസ്മരിച്ചവര്‍ അഭിപ്രായപ്പെട്ടു. അദ്ദേഹത്തിന് ദേശീയ അവാര്‍ഡ് നേടിക്കൊടുത്ത ആദാമിന്റെ മകന്‍ അബുവിലെ അഭിനയം അദ്ദേഹത്തിന്റെ അഭിനയ മികവിന്റെ നേര്‍ചിത്രമായിരുന്നു. സാമൂഹിക വിഷയങ്ങളിലും അദ്ദേഹത്തിന് അദ്ദേഹത്തിന്റേതായ കാഴ്ചപാടുകളുണ്ടായിരുന്നു. താന്‍ വിശ്വസിച്ചിരുന്ന പ്രത്യയശാസ്ത്രത്തെക്കുറിച്ച് സധൈര്യം തുറന്നു പറയാനുള്ള ആര്‍ജ്ജവവും സലിം കുമാറിനുണ്ടായിരുന്നു എന്ന് സംസാരിച്ചവര്‍ അഭിപ്രായപ്പെട്ടു.

ഇന്ത്യന്‍ കമ്മ്യൂണിറ്റി നേതാക്കളായ എച്ച്. എസ്. ഭുള്ളര്‍, അഞ്ജന മേനോന്‍, ജോപ്പച്ചന്‍ തെക്കെക്കൂറ്റ്, മുഹമ്മദ് ഷാനവാസ്, പ്രവീണ റെഡ്ഡി (തെലങ്കാന ജാഗൃതി), രാമണ്ണ (ആന്ധ്ര കലാവേദി), ബിന്ദു ലിന്‍സന്‍ (യുനിഖ് ഖത്തര്‍), ശ്രീനിവാസ് (സയന്‍സ് ഇന്ത്യ ഫോറം), ഇബ്രാഹിം (ഒ.ടി.പി ഖത്തര്‍), സതീഷ് വിളവില്‍ (സമന്വയം ഖത്തര്‍), ഓമനക്കുട്ടന്‍ പരുമല (ഇന്ത്യന്‍ മീഡിയ ഫോറം), ബിജു.പി. മംഗലം (സംസ്‌കൃതി ഖത്തര്‍), നിസാം ഖാന്‍ (രാജസ്ഥാന്‍ അസോസിയേഷന്‍), കൂടാതെ വിവിധ അപെക്‌സ് ബോഡി ഭാരവാഹികളും, ഇന്‍കാസ് സെന്‍ട്രല്‍ കമ്മിറ്റി ഭാരവാഹികളും, വിവിധ ജില്ലാ കമ്മിറ്റി ഭാരവഹികളും, ലേഡീസ് വിംഗ് - യൂത്ത് വിംഗ് ഭാരവാഹികളും സന്നിഹിതരായിരുന്നു.

ഇന്‍കാസ് സെന്‍ട്രല്‍ കമ്മിറ്റി ട്രഷറര്‍ ജീസ് ജോസഫ് നന്ദി പറഞ്ഞു

Internationalmalayalynews

12/06/2026

12/06/2026

12/06/2026

12/06/2026

12/06/2026

12/06/2026

12/06/2026

11/06/2026

11/06/2026

11/06/2026

Address

Website

Alerts

Contact The Business

Shortcuts

Share

Category