15/07/2025
Pozneri tanıyırsız?
Bu gün Rusiyadakı tele- kanalların birində Vladimir Poznerin bir çıxışı rastıma çıxdı.
Yəqin ki, Pozneri çoxları tanıyır.
Əslində beləsini tanımamaq daha yaxşıdır. Amma nə edəsən ki, bəzən tanınmağa layıq olmayanları da tanımağa məcburuq.
Yaşı 90-ı keçib 100-ə sarı gedən bu arsız, abırsız, qırmızı adam ermənilərə müraciət edib deyir ki, niyə sakit dayanmısız, axı Dağlıq Qarabağ sizin vətəninizdir, onu xilas etmək lazımdır...
Pozner jurnalistdir, icmalçıdır, teleaparıcıdır, Moskvadakı “Jeraldin” restoranının sahibidir, bir neçə dili mükəmməl bilir. Atası yəhudi, anası fransızdır. Fransada doğulub böyüsə də qatı rus şovinistidir. Hər halda, özünü belə təqdim edir. Hiyləgərdir, yaxşı bilir ki, Rusiyanın əksər dairələri şovinistləri mükafatlandırır.
Pozner gürcüləri o qədər də sevmir. Hətta, səhv etmirəmsə ötən il bir mərəkəlik və ya bir qəbristanlıq yaxın adamları ilə özünün 90 illik yubileyini keçirmək üçün Tiflisə getmişdi. Vaxtilə gürcü xalqı haqqında artıq-əskik danışdığına görə gürcülər onu və dostlarını hoteldən biabırçılıqla qovdular. Pozner və onun komandası şələ-küləsini yığıb arsız-arsız İstanbula uçdu və orada yubiley atəşfəşanlığı etdi. Bir müddət sonra utanmazcasına: “Mən gec-tez yenə Tiflisə gedəcəm”- deyə, bəyan etdi.
Pozner azərbaycanlılara nifrət edir. Hətta, tele-verilişlərin birində əslən bakılı olan məşhur jurnalist Yuli Qusmana demişdi ki, «В твоем Баку резали армян». (Yəni “Sənin Bakında erməniləri qırıb-çatıblar”).
Pozner erməniləri çox sevir. Həyasızlığın dərəcəsinə bax ki, bir müddət əvvəl demişdi: “Нагорный Карабах – официально признанная территория Армении». (Yəni ki, guya Qarabağ-ermənilərin rəsmən tanınmış ərazisidir). O, hətta Bakıdan “qaçmış” erməni ailəsinin bir vaxt onun mənzilində yaşadığını da söyləyir.
Ermənilərə bu sevgi nədəndir?
Əvvəla, Poznerin birinci arvadı Valentina Çemberci ermənidir, erməni bəstəkar Nikolay Karpoviç Çembercinın qızıdır və onların Katya (Yekaterina) adlı qızları hazırda Almaniyada yaşayır.
İkincisi, Pozner daim erməni məclislərində olur, tez-tez Ermənistana səfər edir, bahalı hədiyyələr qəbul edir.
Əslində Pozner və yaxud Solovyov kimi “şər(H)çilər” rus xalqının və Rusiyanın düşmənidir.
Amma bu tiplərin murdar xislətini hər rus anlayırmı?
("Gündəlik"lərdən) 12.07.2025
✍🏻Фируз Мустафа
