30/10/2025
Dr. Ismaacil Axmed Aaasasaha iyo gudoomiyaha World-remit ayaa qoray:-
"Isbaaraddii hawada ee dowladda Xasan Sheekh waxay ku dhowdahay in ay fashilanto, kaddib markii ay soo baxday in “e-visa” uu yahay qorshe khiyaamo iyo marin habaabin ku dhisan oo lagu qarinayo musuq iyo lacag ururin sharci-darro ah.
Kooxda madaxweynuhu waxay lacago badan ku urursadeen qaab khiyaamo ah, iyagoo Mastercard, Visa iyo bangiyada caalamka u sheegaya in lacagta ay qaadanayaan ay tahay mid dadka loogu bedelo “badeecooyin guud.” Ujeeddadu waxay tahay in laga dhuunto xeerarka lacag-dhaqidda iyo daahfurnaanta maaliyadeed. Waxaa bilaabmay baadhitaan lagu eegayo cidda dhab ahaantii ka dambeysay nidaamkan khiyaamada ku dhisan.
Barnaamijka “e-visa” wuxuu dib innoo xusuusinayaa nidaamkii fashilmay ee Xasan Sheekh isku dayay 2013–2014, markii uu doonayay inuu dibadaha ka soo ururiyo lacagihii Soomaaliya ka xannibnaa. Isku daygaas wuxuu ku dhammaaday fadeexad caalami ah: laba guddoomiye oo Bangiga Dhexe oo iscasilay, Qaramada Midoobay oo ku eedeeyey Xasan Sheekh musuq, iyo dacwad dawladda Mareykanku ku oogay looyarkii dowladda u shaqeynayay, taasoo illaa 2024 socotay.
Xasan Sheekh iyo kooxdiisu waxay mar kale ku socdaan waddadii h**e. Waxaa muuqata in ay fadeexaddani noqon karto mid galaafata shakhsiyaadka iyo shirkadaha boobkan ka qayb qaadanaya, isla markaana daaha ka qaadda sida musuqmaasuqa looga dhigtay hab maamul.
Booraan hadimo ha qodin, haddaad qoddana ha dheereyn, ku dhici doontaa mooyee."
