01/09/2025
د زلزلو زیاتوالی
----------------
د زلزلو راتللو حکمت:
زلزلې د الله تعالی په کایناتو کې له سترو نښو څخه دي، خپلو بندکانو ته پرې وېره، یادونه او سزا ورکوي، فرمايي: ((وَمَا نُرْسِلُ بِالْآيَاتِ إِلَّا تَخْوِيفًا)) الإسراء: ۵۹
ژباړه: او مونږ معجزې نه رالېږو مګر د وېرولو لپاره.
د زلزلو زیاتولی د قیامت نښه ده:
رسولﷺ فرمايي: تر هغې قیامت نه راځي، ترڅو چې علم قبض شي، زلزلې زیاتې شي،
وختونه رالنډ شي، فتنې ښکاره شي، او وژنې زیاتې شي. متفق علیه
زلزلې ولې راځي:
۱- زلزلې به یا د ګناهونو او ظلمونو سزا وي، الله تعالی فرمایي:((وَمَا أَصَابَكُم مِّن مُّصِيبَةٍ فَبِمَا كَسَبَتْ أَيْدِيكُمْ وَيَعْفُو عَن كَثِيرٍ )) الشوری: ۳۰
۲- او به د الله تعالی له لورې ازمېښت او امتحان وي، الله تعالی فرمایي((وَنَبْلُوكُم بِالشَّرِّ وَالْخَيْرِ فِتْنَةً ۖ وَإِلَيْنَا تُرْجَعُونَ)) الأنبیاء: ۳۵
په زلزلو کې د ګناهونو ونډه:
یو سړي عایشې رضي الله عنها ته وویل: د زلزلې په اړه راته واویه؟ هغې وفرمایل: کله چې خلک زنا مباح وګرځوي، شراب وڅکوي، او سندرې ووایي، نو الله عزوجل په اسمان کې غیرت وکړي، ځمکه ته امر وکړي، په دوی باندې زلزله راوله، که چېرته دوی توبه وباسي او ګناهونه پرېږدي که نه نو ځمکه پرې ونړوي، (زلزله د مؤمن او کافر لپاره)هغه سړی وایي: ما وویل: ای أم المؤمنین ایا دا به د دوی لپاره عذاب وي؟ هغې وفرمایل:هو، بلکې د مؤمنانو لپاره پند، رحمت او برکت دی، او دکافرانو لپاره عبرت سزا او غوسه ده.
موسوعة ابن أبي الدنیا: ۴/۴۳۳
د زلزلو په اړه څو مهم ټکې:
۱- په هر حالت کې مرګ ته نفس چمتو کول.
۲- د مصیبت پر وخت صبر او رضایت څرګندول.
۳- د سختۍ سره په دین ثابت پاتې کیدل.
۴- پند او عبرت اخستل او د غفلت څخه راویښدل.
۵- د زلزله ځپلو سره خواخوږي او مرسته کول.
#منافق #وعده #تلاوت #اسلام #زلزله
