29/07/2025
نەخشە ڕێگا بۆ حکومڕانی سوریا و ڕۆژاوا.
گرنگ..ئاڵدار خەلیل نەخشەڕێگای بارۆس ئاشکرا دەکات.
بەرێز ئاڵدار خەلیل بۆ رادیۆی رۆژئاڤا ئێفئێم، دوا و نەخشەڕێگای بارۆسی ئاشکراکرد و ماهیەتی ئەو دەسەڵاتەی ناوەند لە دیمەشقی پێناسە کرد.
🔸 ئەو کۆمەڵکوژیانەی لە سوەیدا ئەنجامدران، دەرەنجامی سیاسەتێک بوون کە ڕێبازی حزبی بەعسی دووبارە دەکردەوە و، بە ناوی پێکهاتەکانەوە ئاژاوەیان نایەوە.
🔸 بەکارهێنانی ناوی "بەدەوییەکان" لە کۆمەڵکوژییەکانی سوەیدا هەوڵێکی قێزەونە بۆ وروژاندنی ئاژاوە. تاوانباران نە سەر بە بەدەوییەکانن و نە سەر بە عەشیرەتە سورییەکانن.
🔸 عەشیرەت و هۆزە سورییەکان لە مێژە پێکەوەسازاو، یەکتریان خۆشویستووە و پێکەوە ژیاون، ئەوەی پێچەوانەی ئەمە بڵاو دەکرێتەوە، ئامانج لێی لێدانە لە پێکهاتەی کۆمەڵایەتی.
🔸 ئەوانەی دوێنێ بە ناوی داعشەوە دەجوڵانەوە، ئەمڕۆ بانگەشەی ئەوە دەکەن کە سوپای سووریان... ئەمە هەوڵێکە بۆ بەخشینی شەرعییەت بە داعش لەژێر ناوی دەوڵەتی سووریادا.
🔸 ئەوەی ئەمڕۆ دەیبینین زۆر مەترسیدارە؛ چەکدارانی داعش بوونەتە خاوەنی ناسنامەیەک کە ناویان لێناوە سوپای سووریا، ئەمەش هەڕەشەیە لەسەر بوونی دەوڵەتی سووریا.
🔸 سووربوونی حکومەتی ئینتیقالی لەسەر بەستنەوەی هەموو ناوچەکان بە ناوەندەوە و بێبەشکردنی پێکهاتەکان لە مافەکانیان، سیاسەتێکی ڕەتکراوە و نانیشتمانییە.
🔸 ئەوانەی حکومەتی ئینتیقالی بەڕێوە دەبەن نوێنەرایەتیی پێکهاتەکانی گەلی سووریا ناکەن، بەڵکو نوێنەرایەتیی چینێکی دەسەڵاتخواز دەکەن کە هەوڵی هەژموونگەرایی دەدات.
🔸 گەلی سووریا دژی بەعس ڕاپەڕی بۆ بنیاتنانی سیستمێکی دیموکراتی، بەڵام دەسەڵاتە نوێیەکە هەمان ڕێبازی سەرکوتکارانەی بەردەوام پێدەدات.
🔸 حکومەتی ئینتیقالی دان بە گەلی سووریادا نانێت و سوورە لەسەر سیاسەتی پەراوێزخستن و دوورخستنەوە، کە ئاماژەیە بۆ دابەشبوونی سووریا.
🔸 گەلی سووریا دەبێت خاوەنی بڕیاری خۆی بێت و لە نیشتمانێکی دیموکراتیی فرەییدا، بە ئازادی و کەرامەتەوە بژی.
🔸 کردەوەکانی دەسەڵاتی ئێستا دەبێتە هۆی ڕاپەڕینێکی جەماوەریی نوێ، هەروەک چۆن پێشتر دژی ڕژێمی سەرکوتکەری بەعس ڕوویدا.
🔸 ڕاپۆرتی لیژنەی لێکۆڵینەوە لە ڕاستییەکان دەربارەی کۆمەڵکوژییەکەی "ساحل" ڕاستییەکانی دەرنەخست، چونکە ئەوانەی لیژنەکەیان پێک هێنا، هەمان ئەو کەسانە بوون کە بەرپرسیارن لە کۆمەڵکوژییەکان.
🔸 سووریا پێویستی بە لامەرکەزییەتی ڕاستەقینە هەیە، پڕۆژەی بەڕێوەبەرایەتیی خۆسەر گونجاوترینە و پشتگیریی توێژێکی فراوانی سوورییەکانی بەدەست هێناوە.
🔸 ئاواتەخوازین مۆدێلی بەڕێوەبەرایەتیی خۆسەری دیموکراتی فراوان بکەین بۆ ئەوەی تەواوی سووریا بگرێتەوە، چونکە تا ئەمڕۆ سەرکەوتووترین پڕۆژەیە.
🔸 ئامانجمان ئەوەیە کە هەموو پێکهاتەکانی گەلی سووریا بە ئاشتی و دیموکراسی و کەرامەتەوە بژین، لامەرکەزییەت بە مانای جیابوونەوە نایەت.
🔸 تورکیا ڕۆڵێکی سەرەکیی گێڕا لە وروژاندنی ئاژاوە لە سوەیدا، و هەوڵ دەدات کاریگەری لەسەر بڕیار و بەڕێوەبردنی حکومەتی ئینتیقالیی سووریا دابنێت.
🔸 هێزەکانی سووریای دیموکرات (هەسەدە) ڕێکخراوترین و بەئەزموونترین هێزن، پرۆفیشنالن و، خاوەن ڕەوشتن و پابەندن بە پەیماننامە نێودەوڵەتییەکانەوە.
