13/09/2026
ہارڈ ایریا الاؤنس! فرنٹ لائن اہلکار نظرانداز، پالیسی پر نظرِثانی کا مطالبہ
ہارڈ ایریا الاؤنس کی پالیسی پر فرنٹ لائن ڈیوٹی انجام دینے والے سرکاری اہلکاروں کی جانب سے سوالات اٹھائے گئے ہیں۔ ملازمین کا کہنا ہے کہ مشکل اور حساس علاقوں میں عملی طور پر خطرات کا سامنا کرنے والے اہلکاروں کو نظرانداز کرکے نسبتاً محفوظ دفاتر میں خدمات انجام دینے والے افسران کو الاؤنس دینا پالیسی کے بنیادی مقصد سے مطابقت نہیں رکھتا۔
ملازمین کے مطابق پولیو مہمات اور دیگر حساس ڈیوٹیوں کے دوران پولیس اہلکار سمیت متعدد کم گریڈ ملازمین دور دراز علاقوں میں فرنٹ لائن پر فرائض انجام دیتے ہیں اور انہیں براہِ راست سکیورٹی خطرات کا سامنا ہوتا ہے، اس لیے مراعات کے تعین میں صرف عہدے کے بجائے ڈیوٹی کی نوعیت، فیلڈ رسک اور علاقے کی حساسیت کو بنیادی معیار بنایا جانا چاہیے۔
متاثرہ اہلکاروں نے حکومت سے مطالبہ کیا ہے کہ ہارڈ ایریا الاؤنس کی پالیسی پر نظرِثانی کرکے ان فرنٹ لائن اہلکاروں کو بھی شامل کیا جائے جو حقیقی معنوں میں مشکل اور خطرناک حالات میں ریاستی ذمہ داریاں ادا کر رہے ہیں۔
ان کا کہنا ہے کہ ہارڈ ایریا کا اصل بوجھ فیلڈ میں اٹھانے والوں کو نظرانداز کرنا انصاف کے تقاضوں کے خلاف ہے؛ الاؤنس کا حق بھی پہلے انہی کا ہونا چاہیے۔
