08/07/2026
التنمر والاستهتار يعرضك للحظر
اقسم بالله اقول الحق ولا شي غير الحق
السلام عليكم ما حصل نزلت استشاره لكن دي أكبر مشكله تواجهني 😭
معليش بس الاستشاره دي حتكون طويله عشان اختكم في الصوره لاني محتاجة ارآء حكيمه ما طبيب استشاري
انا ياجماعه عمري 22سنه متزوجة قبل 3 سنوات وعندي بنت عمر سنتين وزوجي حالياً داخل على الـ26 سنه وزوجي ده يا جماعه ماشاءالله عليه طول الـ٣سنين كان نهاي ما مقصر معاي حنين لي ابعد حد وبخاف على وعمرو ما زعلني بي كلمه ولا رفع صوتو على يعني زول خلوق شديد ومحبوب عند كل الناس
بس للأسف الاستشاره الحاليه دي عنو هو💔
ياالله يا جماعه جاياكم موجوعه شديد وقلبي مفطور،
يالا بي طبعنا ما بندس حاجة عن بعض والثقه بيناتنا ١٠٠٪ عشان كده الاتنين ما عندنا باسبورد لي تلفوناتنا وهو يوم جا شال تلفوني عشان يتصل في تلفونو رايح، قام لقا رساله من صديق لي في الجامعه ولقانا بنتبادل اخبار بعض بالتفصيل، وهو ما سألني، الا بعد يومين فتح لي الموضوع قالي فلان ده منو؟ وريتو الحقيقه انو ده صحبي وما بيناتنا حاجه.
قالي مش عارفه انو دي علاقه محرمه؟ وانو انا مقصر معاك في شنو عشان تعملي فيني كده؟ وعينو كلها شرار 😭.وكلام كتير
حاولت ابرر ليه لكن قالي ما عايز اسمع منك حاجة كفايه الشفافتو عيني، وطلع من البيت، وهنا انا خسرت أغلى ما عندي 💔
والله يا جماعه بحبو حب لانو اي صفه مميزه فيه، وكنت خايفه من فكره الزواج لانو صديقاتي الاتزوجو حياتهم كلها مناقشات ومشاكل، الا هو اثبت لي العكس وغير مفهومي عن الزواج، لقيتو خلق وجمال وطيبه وكرم وفوق كل ده بقبل التغير بسهوله
يعني اي صفه انا ما بحبها هو بخليها. بتزكر كان برسلني كتير يعني جيبي مويه وهاك ختي تلفوني في الشاحن. وانا بطبعي حسيت انو بيتامر على وقلت ليه ما ترسلني.
والله ياجماعه لا شاكلني ولا اي حاجة بس قالي حاضر وتأني نهاي بقا ما برسلني لو داير يموت ما بقولي اديني دواي والعلاقة كانت عادي يعني هو ما اتحسس هنا كبر في نظري اكتر 💗 وبقيت اعمل ليه الحاجة قبل ما يطلبها يعني لو شفتو خشا يستحمى انا طوالي بجهز ليه ملابسه وريحتو.
نجي للمشكله اني طلعت من قلبو وبقا شايفني زي الشفاف وكأني ما موجوده فالبيت يعني بقا ما بهمو اي شي فالبيت لابعلق تعليق إيجابي ولا سلبي.
ومافي شي بقا بهمو في حين انو زمان كان لين على وبساعدني في أي شي حتى الفطره بتاعت رمضان دي كان بعملها معاي وبطلعنا انا وأمو مشاوير كل فتره
الكلام ده كلو اتلغى،
بس الشغل البيت الجامع.
وزمان كان بجي من الشغل من العصر أسى بقا يجي 10و11 بلَيل
فقمت وريت أمو عايشه معانا في نفس البيت وقلت ليها يا أمي ولدك لقا محادثه بيني وبين صديق لي وانا نيتي بيضاء والله عمري ما فكرت اخونو وعايزاك تحننِ قلبو عالي، قالت لي خلاص بكلمو، لمن كلمتو قالت ليه دي زوجتك وشريكه حياتك وكيف تفكر تفكير وسخ زيي ده وووو و
بعد سمع كلامها كلو قال ليها انا ما مقصر معاها كزوج والحاجة الدايراها بلبيها ليها لكن موضوع حب ده، دي مشاعر في قلبي ما متحكم فيها 💔
وجا قالي ما تخافي ما بطلقك ولا ح اتزوج فيك عشان بنتي ما تعيش العشتو انا ( اتربى وهو مفترق عن أمو وابوه عشان مطلقين) وقالي حقك الشرعي ما بحرمك منو متى تكوني عايزاني اطلبي،
وعلاقتو زاتها بقت من غير نفس بس متين يخلص عشان يستحما وينوم، غير كدا نهاي ما عندو بي شغله ولا بتكلم معاي ولا بعاين لي بالغلط في حين انو كان بخاف على شديد وقت الحمل كنا برانا عشان مغتربين وكان ما بمشي الشغل نهاي عشان حارسني وبعمل لي اي حاجة.
أما أسى لو عيانه ولا بقول لي بقيتي كيف 💔
وانا والله يا جماعه اشتقت ليه في حين انو هو قدام عيني 😭💔
اشتقت لي ضحكتو معاي و ونستو وبمسمتو الفارقت وجهو بس كل ضحكو مع بنتو غير كدا ما عندو شغله
وانا جاياكم عايزه أفعال وكلام يلين قلبو على من غير تجريح لي لانو الفيني مكفيني 😣
وما تقولو مع الزمن بنسا لأنو الكلام ده ليه 7شهور والحال في حالو بي سبب المشكلة دي خسرت صحباتي كلهم لاني نفسيتي تعبانه ونا ما عايزه اكلم زول وصديقي الكنت بتكلم معاه برضو قلت ليه ما ينفع نكلم بعض وحظرتو
وعليك الله لو راجلك كويس معاك ما تفرطي فيه بسبب نقاش تافه لأنو الزول الطيب لو شال في قلبو عمرو ما يسامح وانا حاليا ندمانه سافه التراب والله وساعدوني بي دعواتكم برضو قد يستجيب انو يرجع لي وتعم الفرحة من جديد
ملحوظه:
هو موجود معانا هنا يعني حيشوف التعليقات
