Shekhan News Network

04/06/2026

فتح الملک علی ناصر کے فنڈ سے ڈی ایچ کیو ہسپتال چترال میں جدید سی ٹی اسکین مشین نصب
چترال کے عوام کے لیے صحت کے شعبے میں ایک بڑی خوشخبری۔ ڈی ایچ کیو ہسپتال چترال میں جدید CT Scan Machine کی تنصیب اور تمام تکنیکی مراحل کامیابی سے مکمل کر لیے گئے ہیں۔
یہ اہم منصوبہ رکن صوبائی اسمبلی فتح الملک علی ناصر کے صوابدیدی فنڈ سے فراہم کردہ مالی معاونت سے پایۂ تکمیل تک پہنچا۔ اس جدید سہولت کی بدولت اب چترال کے مریضوں کو تشخیصی معائنے کے لیے پشاور یا دیگر شہروں کا رخ نہیں کرنا پڑے گا، جس سے وقت، اخراجات اور مشکلات میں نمایاں کمی آئے گی۔
ہسپتال انتظامیہ کے مطابق مشین مکمل طور پر نصب ہو چکی ہے اور ریڈیولوجی عملے کی خصوصی تربیت مکمل ہونے کے بعد عوام کے لیے باقاعدہ طور پر خدمات کا آغاز کر دیا جائے گا۔
یہ اقدام چترال میں صحت کی سہولیات کی بہتری اور عوام کو جدید طبی خدمات ان کی دہلیز پر فراہم کرنے کی جانب ایک اہم پیش رفت ہے۔
#چترال

04/06/2026

ضلعی پولیس سربراہ کی قیادت میں منشیات کے مکروہ دھندے میں ملوث ملزمان کے خلاف ٹارگٹڈ کاروائیاں بدستور جاری

ایکٹنگ ڈسٹرکٹ پولیس آفیسر لوئر چترال عتیق الرحمن کے خصوصی احکامات پر لوئر چترال پولیس کی جانب سے منشیات کے مکروہ دھندے میں ملوث ملزمان کے خلاف ٹارگٹڈ کاروائیاں جاری ہیں

اس سلسلے میں ایس۔ڈی۔پی۔او سرکل بمبوریت حسن اللہ اور ایس۔ایچ۔او تھانہ بمبوریت SI رحیم بیگ نے دیگر پولیس نفری کے ہمراہ دوران گشت شک کی بنیاد پر مشکوک شخص کی تلاشی لینے پر اس کے قبضے سے دیسی شراب اور افیون برامد ہوکر ملزم کو گرفتار کرلیا۔

گرفتار ملزم کی شناخت یاسین خان سکنہ دیر اپر سے ہوکر ملزم کے قبضے سے 4.5 لیٹر شراب از قسم ٹارہ اور 450 گرام افیون برامد کرلی گئی۔

گرفتار ملزم کے خلاف تھانہ بمبوریت میں مقدمہ درج کرکے مزید تفتیش شروع کردی گئی ہے.

لوئر چترال پولیس کا عزم، منشیات سے پاک لوئر چترال

شعبہ تعلقات عامہ ڈسٹرکٹ لوئر چترال پولیس

04/06/2026

رضا الٰہی سماجی خدمات اور سوشل ورک کے نام پر تنقید کرنے والوں کے نام

الحمدللہ
آج سے 17سال پہلے 2009سے لیکر آج
تک میں اور میرے ساتھی اللہ تعالیٰ کی رضا کے لیے انسانیت کی خدمت کے اس سفر پر گامزن ہیں۔ اس دوران نہ جانے کتنے مریضوں کو خون فراہم کیا گیا، کتنے غریب خاندانوں تک راشن پہنچایا گیا، کتنے یتیم بچوں اور بچیوں کی کفالت کی گئی، کتنے مستحق طلبہ کی سکول فیس ادا کی گئی، کتنے معذور افراد کو ویل چیئر فراہم کی گئی، کتنے مریضوں کے سی ٹی اسکین، ایم آر آئی، بلڈ ٹیسٹ، ادویات اور بڑے بڑے آپریشن کروائے گئے، کتنے جنازوں کو غسل دیا گیا، کتنے بے سہارا خاندانوں کی تدفین میں مدد کی گئی اور کتنے مجبور انسانوں کے دکھ درد میں شریک ہونے کی توفیق ملی۔
یہ سب کچھ میری ذات کا نہیں بلکہ اللہ تعالیٰ کا فضل، میرے مخلص دوستوں، معاونین اور مخیر حضرات کے اعتماد اور تعاون کا نتیجہ ہے۔
آج کل سوشل میڈیا پر چند لوگ بڑی دلچسپی کے ساتھ رضا الٰہی سماجی خدمات کو تنقید کا نشانہ بنا رہے ہیں۔ کچھ لوگ ایسے سوالات کر رہے ہیں جیسے برسوں کی خدمت کا فیصلہ فیس بک کے تبصروں اور پوسٹوں سے ہونا ہو۔
میں واضح کرنا چاہتا ہوں کہ میرا کام ہر شخص کو جواب دینا، ہر الزام کا دفاع کرنا یا ہر گلی کوچے میں اپنی خدمات کا اشتہار لگانا نہیں۔ میری ذمہ داری ان ضرورت مندوں تک پہنچنا ہے جو رات کے اندھیروں میں مدد کے منتظر ہوتے ہیں، ان مریضوں کے ساتھ کھڑا ہونا ہے جن کے پاس علاج کے پیسے نہیں ہوتے، اور ان مجبور خاندانوں کا سہارا بننا ہے جن کے دروازے پر کوئی اور دستک نہیں دیتا۔
الحمدللہ
رضا الٰہی سماجی خدمات کے ذریعے جتنے بھی فنڈز استعمال ہوئے ہیں، ان کا مکمل ڈیجیٹل ریکارڈ، رسیدیں، سکرین شاٹس اور تمام تفصیلات موجود ہیں۔ جو حضرات حقیقت جاننے میں سنجیدہ ہیں، وہ تشریف لائیں، پورا ریکارڈ دیکھیں اور اس کی کاپی بھی لے جائیں۔ ہم نے کبھی حساب سے فرار اختیار نہیں کیا اور نہ ہی کبھی امانت میں خیانت کی ہے۔
چند عقل کے اندھے یہ اعتراض بھی کرتے ہیں کہ ذاتی اکاؤنٹ کیوں استعمال کیا جاتا ہے؟
اس کا جواب یہ ہے کہ میرے لیے میرے معاونین کا اعتماد، سہولت اور ضرورت مندوں کی فوری مدد زیادہ اہم ہے، نہ کہ بے بنیاد تنقید۔ بہت سے مستحق افراد کے پاس بینک اکاؤنٹ، ایزی پیسہ یا جاز کیش کی سہولت موجود نہیں ہوتی، اور اگر ہوتی بھی ہے تو کئی عملی مسائل درپیش ہوتے ہیں۔ ایسے مواقع پر اگر میرا ذاتی اکاؤنٹ کسی غریب کے علاج، کسی مریض کی جان بچانے یا کسی مجبور خاندان کی مدد کا ذریعہ بنتا ہے تو مجھے اس پر کوئی شرمندگی نہیں بلکہ فخر ہے۔
میں ان تمام ناقدین کو کھلا چیلنج دیتا ہوں کہ صرف ایک دن کے لیے میرا موبائل فون اپنے پاس رکھ لیں۔ دن رات آنے والی خون کی اپیلیں، مریضوں کی فریادیں، مالی امداد کی درخواستیں، ہسپتالوں کے چکر، جنازوں اور تدفین کے انتظامات، یتیموں، معذور افراد، طلبہ اور بے سہارا خاندانوں کے مسائل خود سنبھال کر دکھا دیں۔
اگر کوئی ایک دن بھی یہ ذمہ داری اسی جذبے، صبر اور اخلاص کے ساتھ نبھا لے تو میں اپنی طرف سے ایک لاکھ روپے انعام دینے کے لیے تیار ہوں۔
تنقید کرنا آسان ہے، کردار کشی کرنا آسان ہے، لیکن انسانیت کی خدمت کے لیے اپنا وقت، سکون، عزت، نیند اور وسائل قربان کرنا ہر کسی کے بس کی بات نہیں۔
الحمدللہ ہمارے کاموں کے گواہ فیس بک کے تبصرے نہیں بلکہ وہ ہزاروں لوگ ہیں جن کے آنسو پونچھنے، جن کی زندگیاں آسان بنانے اور جن کی مشکلات کم کرنے میں اللہ تعالیٰ نے ہمیں ذریعہ بنایا۔
ہم پہلے بھی خدمت کرتے تھے، آج بھی کر رہے ہیں اور ان شاء اللہ آئندہ بھی کرتے رہیں گے۔ کیونکہ ہمارا مقصد لوگوں کی واہ واہ نہیں بلکہ اللہ تعالیٰ کی رضا ہے۔
تنقید کرنے والوں کو صرف اتنا پیغام ہے
میدان میں اتر کر خدمت کرنا اور بات ہے، اور سوشل میڈیا پر بیٹھ کر فیصلہ سنانا اور بات۔
اللہ تعالیٰ ہمارے اخلاص، نیت اور خدمت کو اپنی بارگاہ میں قبول فرمائے۔ آمین۔

سمیع الدین رئیس

04/06/2026

04/06/2026

دریائے چترال

04/06/2026

امریکی اخبار نے دعویٰ کیا ہے کہ امریکی صدر ڈونلڈ ٹرمپ اب ایران کے خلاف مزید فوجی کارروائی یا جنگ کا ارادہ نہیں رکھتے۔

04/06/2026

بونی بزند روڈ پر کام میں سست روی کے خلاف اتوار کو شاگرام میں جلسہ ہوگا

بونی بزند روڈ پر جاری کام میں انتہائی سست روی اور درکار مشینری نہ لانے کے خلاف تورکھو تریچ یونین کونسل کے عوام کا ایک عظیم الشان جلسہ اتوار کے روز شاگرام میں منعقد ہوگا۔
تورکھو تریچ روڈ فورم (ٹی ٹی آر ایف) کے اعلامیے کے مطابق فورم کی مرکزی شوریٰ نے متفقہ فیصلہ کیا ہے کہ محکمہ سی اینڈ ڈبلیو، متعلقہ ٹھیکیدار اور محکمے کے حکام 17 سال سے زیرِ تعمیر بونی بزند روڈ کی جلد تکمیل میں سنجیدہ دلچسپی نہیں رکھتے۔ متعدد وعدوں اور کمٹمنٹس کے باوجود نہ تو روڈ پر کام کی رفتار بڑھائی جا رہی ہے، نہ معیار کا خیال رکھا جا رہا ہے اور نہ ہی درکار مشینری سائٹ پر پہنچائی گئی ہے۔

ٹی ٹی آر ایف کے مطابق فورم کے وفود اس منصوبے کے حوالے سے پشاور میں سیکریٹری سی اینڈ ڈبلیو اور چیف انجینئر نارتھ سے کئی ملاقاتیں کر چکے ہیں۔ اس معاملے کو وزیراعلیٰ کے فوکل پرسن برائے ڈیجیٹل میڈیا کے ذریعے وزیراعلیٰ کے نوٹس میں بھی لایا جا چکا ہے۔ سی اینڈ ڈبلیو کے چیف انجینئر نارتھ رواں سال دو مرتبہ پشاور ہائی کورٹ میں پیش ہو کر یہ یقین دہانی کرا چکے ہیں کہ منصوبہ جون 2026 کے آخر تک مکمل کر لیا جائے گا، جبکہ درکار فنڈز بھی محکمے کے اکاؤنٹ میں موجود ہیں۔ اس کے باوجود نہ کام کی رفتار میں اضافہ کیا گیا ہے اور نہ ہی سائٹ پر موجود مشینری میں اضافہ کیا گیا ہے۔

متعلقہ ٹھیکیدار اور محکمہ سی اینڈ ڈبلیو کے حکام نے وعدہ کیا تھا کہ عید کے بعد اس منصوبے پر بھرپور کام شروع کیا جائے گا، لیکن عید کے بعد دس دن گزرنے کے باوجود یہ وعدہ بھی حسبِ معمول محض وعدہ ہی ثابت ہوا ہے۔

عدالتِ عالیہ پشاور میں دی گئی یقین دہانیوں اور درکار فنڈز کی دستیابی کے باوجود اس منصوبے پر کام کی رفتار نہ بڑھانا اور مزید مشینری لا کر کام کو تیز نہ کرنا بظاہر اس امر کی نشاندہی کرتا ہے کہ منصوبے کے لیے مختص فنڈز کو حسبِ سابق خرد برد کا شکار بنایا جائے اور بعد ازاں موسم کو جواز بنا کر ٹھیکیدار کو واپس بھیج دیا جائے۔

ٹی ٹی آر ایف نے واضح کیا ہے کہ اس منصوبے کی تکمیل اور اس میں ہونے والی مبینہ کرپشن کے خلاف جدوجہد کے دوران وہ مقدمات، گرفتاریاں، دہشت گردی کی ایف آئی آرز، لاٹھی چارج اور سٹریٹ فائرنگ جیسے حالات کا سامنا کر چکے ہیں، لیکن منصوبے کی جلد اور معیاری تکمیل کے مطالبے سے پیچھے نہیں ہٹیں گے۔

فورم نے فیصلہ کیا ہے کہ اتوار کے روز شاگرام میں ایک عظیم الشان جلسہ منعقد کیا جائے گا جس میں آئندہ کے لائحۂ عمل کا اعلان کیا جائے گا۔

ٹی ٹی آر ایف اس بات پر بھی غور کر رہی ہے کہ اتوار کے روز علاقے کے تمام لوگ، بشمول خواتین اور بچے، بونی میں چترال-شندور روڈ پر پہنچ کر دھرنا دیں۔ یاد رہے کہ شندور پولو فیسٹیول ایک اہم بین الاقوامی ایونٹ ہے جس میں ملک بھر اور بیرونِ ملک سے سیاح اور شائقین شرکت کرتے ہیں، اور ہم بطور میزبان تمام مہمانوں کو خوش آمدید کہتے ہیں۔

ہم محکمہ سی اینڈ ڈبلیو اور متعلقہ حکام کو متنبہ کرتے ہیں کہ عوام کو اس حد تک مجبور نہ کیا جائے کہ وہ شندور فیسٹیول سے قبل یا اس کے دوران احتجاج پر مجبور ہو جائیں اور بونی-شندور روڈ بند کرکے اپنا احتجاج ریکارڈ کرے۔ ہمیں اگر مجبور کیا گیا اور دیوار سے لگایا گیا تو ہم اس انتہائی قدم اٹھانے سے بھی گریز نہیں کریں گے۔۔۔۔۔

ٹی ٹی أر ایف تورکہو

03/06/2026

وزیر اعلیٰ خیبرپختونخوا محمد سہیل آفریدی کی اسلام آباد ہائیکورٹ میں میڈیا سے گفتگو

آج عمران خان سے ملاقات کے لیے اسلام آباد ہائیکورٹ سے رجوع کیا ہے۔ خیبرپختونخوا حکومت مالی سال 2026-27 کا بجٹ پیش کرنے جا رہی ہے اور بجٹ کو حتمی شکل دینے سے قبل اپنے قائد سے مشاورت کرنا چاہتے ہیں۔

خیبرپختونخوا کے عوام نے عمران خان کو مینڈیٹ دیا ہے اور صوبائی حکومت بھی اسی عوامی اعتماد کی بنیاد پر قائم ہے۔ بجٹ کو عمران خان کے وژن کے مطابق ترتیب دینے کی کوشش کی گئی ہے۔

عدالتوں کی جانب سے ہفتہ وار ملاقاتوں کی اجازت کے باوجود اس پر عملدرآمد نہیں ہو رہا۔ عدالتوں سے اپیل ہے کہ اس معاملے میں فوری مداخلت کرتے ہوئے ملاقات کا راستہ ہموار کیا جائے۔

حکمرانوں کو سیاسی انتقام کے بجائے معیشت کی بہتری، مہنگائی کے خاتمے، برآمدات میں اضافے، صنعت و زراعت کے فروغ اور عوامی مسائل کے حل پر توجہ دینی چاہیے۔

ملکی قرضے، تجارتی خسارہ، مہنگائی اور بے روزگاری میں مسلسل اضافہ ہو رہا ہے جبکہ عوام کو قرضوں کے استعمال کے ثمرات نظر نہیں آ رہے۔ لاکھوں خاندان معاشی مشکلات کا سامنا کر رہے ہیں۔
ملک اس طرح نہیں چل سکتا۔ عوام ہی فیصلہ کریں گے کہ ان کا لیڈر، وزیراعظم اور وزیراعلیٰ کون ہوگا۔ زبردستی فیصلے مسلط کیے گئے تو مسائل مزید بڑھیں گے۔

خیبرپختونخوا کے عوام کو عمران خان کے ساتھ کھڑے ہونے کی سزا دی جا رہی ہے۔ ضم اضلاع کے حقوق اور ترقیاتی فنڈز روکے جا رہے ہیں جبکہ این ایف سی میں بھی صوبے کا مکمل حق نہیں دیا جا رہا۔

رواں مالی سال میں ضم اضلاع کے لیے مختص فنڈز میں 12 ارب روپے کی کٹوتی کی گئی۔ دہشت گردی کے خلاف فرنٹ لائن صوبہ ہونے کے باوجود خیبرپختونخوا کے وسائل کم کیے جا رہے ہیں۔

وفاقی حکومت کی غلط پالیسیوں کے باعث دہشت گردی دوبارہ سر اٹھا رہی ہے۔ گزشتہ چھ برسوں کے دوران صوبائی حکومت پولیس کی استعداد بڑھانے اور امن و امان کے قیام کے لیے 30 ارب روپے سے زائد خرچ کر چکی ہے۔

صوبے میں اہم ڈیم منصوبے تیار ہیں لیکن غیر ملکی انجینئرز کے دوروں کے لیے این او سی جاری نہیں کی جا رہی، جس سے ترقیاتی عمل متاثر ہو رہا ہے۔

عدالتوں سے ایک بار پھر اپیل ہے کہ عمران خان سے ملاقات کی اجازت دی جائے تاکہ ساڑھے چار کروڑ عوام کی مؤثر نمائندگی اور ان کے مسائل کے حل کے لیے مشاورت ممکن ہو سکے۔

03/06/2026