13/06/2026
ضلع لاڙڪاڻو جي نئوديرو شهر واسي پورهيت تي مبينا طور تشدد ڪري اک ضايع ڪرڻ واري ڪيس جي ٻڌڻي ٿي گذري جتي ڏوھ ثابت ٿيڻ تي عدالت پاران هاڻوڪي لکي غلام شاهه ۽ اڳوڻو نئون ديرو ٿاڻي جو ايس ايڇ او شاهد ميمڻ کي سزا ٻڌائي هٿڪريون هڻائي جيل موڪلي ڇڏيو آهي،
خبر موجب سال 2023 ۾ نئوديرو شھر واسي پڪوڙا کپائيندڙ فھيم علي مھر کي ايس ايڇ او شاهد ميمڻ پوليس ٽيم سان گڏجي گرفتار ڪري مٿس مبينا تشدد ڪيو هو، تشدد دوران سندس نوجوان جي کٻي اک ضايع ٿي وئي هئي، متاثر نوجوان پنھنجي وڪيلن الطاف حسين ميراڻي ۽ رياض حسين ميراڻي معرفت عدالت ۾ درخواست داخل ڪرائي ھئي، جيڪو ڪيس عدالت ٻڌڻ جوڳو قرار ڏيندي ڪيس جي ٻڌڻي شروع ڪئي ھئي، ڪيس لاڳيتو 2 سال کان وڌيڪ ھلڻ کانپوءِ اڄ ان ڪيس جي ٻڌڻي لاڙڪاڻو جي فورٿ ايڊيشنل اينڊ سيشن جج عبدالحسيب ابڙو جي عدالت ۾ ٿي جتي،حاضري تي آيل اڳوڻو نئون ديرو ٿاڻي جو ايس ايڇ او جيڪو هن وقت ضلعي شڪارپور جي لکي غلام شاھ ٿاڻي تي مقرر ٿيل ايس ايڇ او شاهد ميمڻ مٿان ڏوھ ثابت ٿيڻ تي کيس 2 سال قيد جي سزا ٻڌائيندي سندس کي گرفتار ڪرائي جيل اماڻيو ويو آهي.
