04/08/2025
كتبت✍️Asmaa Hereka من كادقلي ….👇
الاحد 3 اغسطس 2025 الساعة 11 ونص صباحا
ربنا كتب لينا عمر جديد أنا وأمي
الحمدلله والشكر لله حتي يبلغ الحمد والشكر منتهاه
قل لن يصيبنا إلا م كتبه الله لنا
انا اقتنعت تماما انو الحاجة الربنا م كاتبها ليك م بتصيبك م بتصيبك( يخرج الحي من الميت ومخرج الميت من الحي)
حوالي الساعة 11ونص صباحا انا راقدة في البيت محمومة حمي مبالغة الا متغطية بالبطانية
فجأة اسمع صوت انفجار ( م بقدر اوصفو ) انا في البداية افتكرت دي القيامة ..ولا انا في كابوس المهم صوت كده م بتوصف
مع الصوت ده الحيطة بتاعتنا وقعت والطوب اتشتت في المكان كلو لامن الطوب المكسر جاني في مكاني الانا راقدة فيهو بعديهو شفت سواد مغطي المكان كلوو وطالع لفوق وسامعة باب الشارع فتح بقوة والمواسير المركبة في الباب اتفكت وطارت وانا قاعدة بشوف في الحصل قدامي ده كلووو حتي استوعبت انو الحاصل ده دي دانة ووقعت م بين بيتنا والارضية الفاضية من الجهة الشرقية لبيتنا ( امي عاملاها جبراكة ) وانا من الانفجار ده علي بعد خطوات بس فجأة اتذكرت انو امي قاعدة في نفس المكان الوقعت فيهو الدانة ده لأنها كانت بتشتل في الطماطم
انا لحظتها فقدت عقلي تقريبا وطوالي من محلي قمت جارية علي امي وما شايفة اي شيء قدامي من الدخان والتراب بتاع الانفجار فجأة اتذكرت انو امي قاعدة مع خالتي في بيتها لانو قبل 10 دقايق تقريبا من وقت الانفجار خالتي رسلت ليها قالت تجيها
مشيت بيت خالتي وهو البيت التاني من البيت القصادنا لقيت الباب فاتح لزيتو واول زول يقع في عيني امي
انا لامن شفت امي قاعدة وحية اقسم بالله العظيم كأني شفت الجنة
كانت قاعدة في البمبر جيت قعدت جمبها في الارض ومسكتها من نصها وقعدت ابكي باعلي صوت عندي
وامي مخلوعة انو انا جيت ليهم في الانفجار ده كيف
قلت ليها ي يمة الدانة الوقعت دي وقعت في بيتنا
امي قالت لي الحمدلله ي بتي مش إنتي كويسة؟؟وبقت تهبش في جسمي تتأكد انو انا ما فيني شي لأنو هي تقريبا م مصدقة انو انا طلعت من الدانة دس سليمة
وانا ببكي لانو ما مصدقة انو انا لقيتها حية
امي بتقول لي انتي جيتي في الانفجار ده ي كاكا ؟؟ تاري انتي قوية إنتي بطلة والله ي بتي اسي لو كان دي مريم ولا فاطمة كان ماتو الحمدلله الحمدلله
بعديها بدقايق بس الدانات بقت تقع في اتجاهنا ده قريب لل 8 دانة ويمكن اكتر بفترات متفاوتة واستمرينا في الحال ده في بيت خالتي لغاية الساعة 2 تقريبا حركتنا اتشلت تماما بس راقدين في الارض عاملين ساتر م قدرنا نطلع زاتو لانو التدوين شغال وحلف كن يقيف
انا حاليا بكتب ومستغربة من القوة الربنا اداني ليها في الزمن داك لكن تقريبا انا م كنت واعية لأنو كان في راسي حاجة واحدة بس انو امي في المحل الوقعت فيهو الدانة ده
غيتو الحمدلله احنا بخير والجيران برضه بخير لانو البيوت الحولنا كلها اتاثرت بالدانة الوقعت البيوت اتشققت والزنكي اتشرط وفي جيرانا عريشتهم وقعت لكن مافي زول جاتو خدشة ساي وده بقدرة ربنا ولطفو الكبير بينا
احنا بس عايزين نعرف حربكم التقليدية والعشوائية والبتستهدفونا فيها إحنا الابرياء دي حتقيف متين ؟؟
و إحنا ذنبنا شنو ؟؟
هل ذنبنا إننا بننتمي للبقعة دي من الارض؟؟ الاحنا صامدين فيها بجوعها ومرضها وحربها لاننا م بنملك خيار تاني ؟؟
المشكلة انتو م اديتونا اي خيار تاني يعني ي اما الموت ي اما الموت مافي اي خيار تاني
لو م مت بالجوع تموت بدانة ويمكن تموت بيهم الاتنين انت وحظك تاني
ياخي انتو ممرات آمنة ساي عشان نطلعو بيها لمكان آمن م عايزين تفتحوها لينا دي حرب شنو الما محترمة دي؟ ولا انتو عاملننا وقود لحربكم دي؟؟
المهم
حسبنا الله ونعم الوكيل في اي زول عندو علاقة بالحرب دي لو من بعيد او قريب
وحسبنا الله ونعم الوكيل في اي زول هو سبب في انو الحرب دي م تقيف
وحسبنا الله ونعم الوكيل في اي زول بقول بل بس لأنو في كل الحالات قاعدين نتبل نحنا الابرياء ديل
وحسبنا الله ونعم الوكيل في اي زول هو سبب ولا عندو يد في معاناتنا وفي وضعنا المأساوي المعقد ده
وحسبنا الله ونعم الوكيل في اي زول بمسك سلاح وبوجهو في وش الابرياء والأطفال وكبار السن وبتسبب بموتهم
تاني لا انقذوا كادقلي ولا انقذو الدلنج لانو اصلا لا في زول سامعنا ولا في زول حاسي بالشي الأحنا عايشنو
إحنا تاني بس خليناكم لربنا الخلقكم ده وهو قادر عليكم
