15/06/2023
شقة في شندي غرفتين وهول ومطبخ وحمام
المراوح والمكيف ما شغالين وما فيها لا عدة لا غسالة ومعفنة ووسخانة بي مليار و200 مليون والسمسار حقو ١٥٠ مليون
ليه !؟
بدون اسباب
شقة في مدني .. غرفة وصالة وحمام
ب مليار و200 ..
ليه !؟
عشان في جنريتر
والبدون جنريتر ب750
صالون وحمام بدون عفش وبدون مطبخ في دنقلا ب 600
ليه !؟
بدون اسباب
شقة استديو فيها كولر موية وبويلر شاي و4 سراير في دنقلا ب 600 ..
ليه !؟
بدون اسباب
ايجار الغرفة الواحدة في بيت عادي مع حمام بلدي مشترك في حلفا للناس الراجين التأشيرات اليوم بي ٤٠ الف يعني للشهر مليار و 200 وفي ناس شهر تأشيرتهم ما بتطلع
ليه !؟
بيت ارضي في بورسودان مبني من زمن البنا عيب بدون موية وكهربا اليوم ب 35 مع دفع تأمين يومين
ليه !؟
بدون اسباب
بيت تحت الانشاء بدون بياض وشبابيك بدون قزاز في دنقلا الشهر ب200
وتمشي تحنس الجيران يدوك كهربا .. علي حسب طلب سيدو
ليه !؟
بدون اسباب
ماحلوم زول في حقو .. ابداً
والقال حقي غلب ..
لكن .. نحن كنا امنا مكر ربنا بينا .. في الخرطوم
وكنا بنعمل نفس العمايل دي وبنستغل حواجات بعض لاقصى مدى وكنا بنسميها شفتنة وكنا بنسميها طواقي ..
ووصلنا مرحلة قروشك في جيبك ما بتلقا حقنة مسكن لمريضك ..
ونمنا في حال .. وصحينا في حال
لانو لايأمن مكر ربك الا القوم الخاسرون ..
- الخـــاسرون -
مرقنا وخلينا (القروش ورانا )
خلينا عربات ودهب ..
خلينا الما بتحلمو تمتلكوه في الطف احلامكم .. والبتسمعو بيهو سمع
وخلينا ارواحنا معلقة في حيط بيوتنا .. وذكرياتنا .. واحلامنا لاطفالنا ... ودا للبعاين بعين بصيرتو ( اغلي الممتلكات)
غلو وتاجرو فينا قدر ما تقدرو .. دا حقكم
وماتتذكرو ابدا لمن كنتو بتجو الخرطوم باللواري والبكاسي لعلاج او لعزا او لقراية ..
ماتتذكرو ابدا انكم كنتو بتقعدو ماكلين شاربين نايمين متعالجين متواصلين بكل رحابة صدر ...
استغلونا كمان وكمان ... اصلو ما ترحمونا
ولا ترأفو بحالنا ..
اختارو تكونو غربان ورخم تقتات بالجيف .. علها تشبعكم
بس اسأل الله انو البقت علينا ما تبقا عليكم ...
واسأل الله انو ربنا يلطف بيكم وقدر الدم البتمصوهو من اخوانكم دا .. ما تصرفوه علي علاج اطفالكم لو لقيتو ليهم علاج ...
واسأل الله انو اكفانكم تكون فيها جيوب ... عشان تقدرو تشترو من سوق المقابر موية تبل ريقكم لما ربنا يسألكم من نجدة الملهوف .. وتأمين الخايف ..
كفار قريش كانو في وادي غير ذي زرع .. وكانو بخلطو الموية بالذبيب في موسم الحج ..
وحتي ذوات الرايات الحمر كانو طلبا للبركة بفتحو خيامهم للحجاج الاغراال مجان للمبيت والاكل والشرب
ما بنقول ابقو زي كفار قريش في النخوة ..
لكن كمان ماتبقو الي.هود ...
مبروك عليكم غناكم .. مبروك عليكم الاصفار البتزيد في حساباتكم في البنوك ...
مبروك عليكم سمسرتكم وشفتنتكم ..
وبرضو .. شكرا للفتحو بيوتهم بدون مقابل وسترو العروض واتحملو فوق طاقتهم نجدة ونخوة لكل محتاج
شكرا ليكم وعليكم ..
قبيل لقيت زول في سوق دنقلا عرضو عليه 150 في اوضة وبرندة وحمام ورفض وقال حيشيل 80 بس لانو دا حقو
كل زول تاجر تجارتو ..
والرابح حيتعرف قدااام ..
واعرفو انو تراب بيوتكم دا ذاتو .. غالبيتو تحلل اجساد القبلكم والقبل القبلكم والقبلهم ..
ولسا مؤمن جواي ان الخير موجوود .. حتي مع ندرتو
ودايما النادر .. هو الغالي
والكتير هو الرخيص ...
* مواطن خرطومي نازح في بلدو .. الابت ترحم
والله المستعان
#منقول
