29/08/2025
منقول من الجميلہ
🔺ما حصل مرة خطر في بالي "الكولر" ده تابع لمنو، المهم كل البهمني أشرب ويلا اللَّاب أو أي مكان تاني.
الليلة جاني إتصال من إنسان سلَّم وقال أنا بسأل من "كولر" قاعد في علوم عايزك ترسلي لي صورة ليهو.
لحدي هنا الموضوع عادي لأني افتكرتو من دكاترة الجامعة وأكيد "الكولر" تابع للكلية.
بس الأدهشني إنو قال لي "الكولر" ده أنا عاملو صدقة لي صحبي في الجامعة، وعايز أعرف هو سليم ولا حصل ليهو شنو وأعمل ليهو صيانة وكده.
فبقيت أفكر هو معقولة في أصحاب ح يتصدقو لينا بعد نموت!
ومش يتصدقوا بس، يكونوا متابعين وعايزين يعرفوا إنو الحاجة العملوها لينا دي ماشة على أكمل وجه.
يعني سبحان الله بعد إنو هو عمل "الكولر"، كان حريص إنو لازم يكون سليم وشغال.
أزيدكم من الشعر بيت؟ لو شايفين في الصورة إنو المكتب حق الحسابات بالجهة التانية الدانة وقعت فيهو واتدمر، أما المكتب التاني سليم وكان وراهو" الكولر"، وبي سببو "الكولر" ما اتضرر.
وسبحان الله حتى في البوست ده وأنا وشغالة أكتب كل ما أجي أكتب "الكولر" بتتكتب "الكوثر" بسبب التنبؤ التلقائي للكيبورد، وبرجع أصلحها،
فيا رب كلنا نشرب من نهر الكوثر وصاحب "الكولر" والمعمول ليهو "الكولر".
وقبل ما تختار طريقك، أبقى واثق من رفيقك💜
✍️سارة دياب - كلية العلوم
