02/09/2026
البوست دا عايزكم ترجعوني ليهو بعد سنة من اليوم
وعايزكم تتأكدوا من حاجة واحدة بس... اني يوم من الايام ح أكون شخصية مؤثرة، وشخصية عندها صدى حقيقي في المجتمع إن شاء الله 🌼🤎.
حاليًا خلوني اعرفكم عن نفسي شوية...
اسمي عوض حسان، عشت على وجه الكرة الارضية 19 شتاءً 😂🤎.
امتحنت شهادة سودانية مع الدفعة العالقة دفعة 23، دخلت كلية العمارة والتخطيط والحمدلله خلصت المستوى الاول بنجاح 🫶🏽.
انا انسان شغوف، عندي احلام واهداف كتيييرة عايز احققها واكتر حاجة خايف منها انو احلامي تتدفن في مقبرة الاحلام وتفضل مجرد افكار في راسي.
عايز اتعلم حاجات جديدة، واخوض تجارب مختلفة، اقع واقوم تاني، وفي النهاية يكون عندي حياة مليانة حكاوي وقصص اقدر احكيها لأولادي بعدين ان شاء الله 🤎.
اتربيت وعشت في بيت مليان بالدفء والحنان، الوالد والوالدة ما قصروا معانا في حاجة... اي حاجة كانت في استطاعتهم يقدومها لينا، قدموها بكل الحب، ولو في استطاعتهم انهم يقدموا لينا اكتر اكيد ما كانوا ح يبخلوا علينا 🍂🤎.
لكن مع الوقت الانسان بكبر واحلامو بتكبر معاهو، وبكون عايز يحقق ذاته ويعمل حاجات تكون شبهو ويبني لنفسو طريقو الخاص 🌫️.
وانا قررت ما استنى الحياة المثالية عشان ابدا، وقررت اجرب حظي في الحياة احتمال تبتسم لي في اخر المطاف.
ما ح اخلي الخوف يمنعني من اني اتعلم مهارة نفسي اتعلمها او امشي مكان نفسي ازورو او حتى اجرب تجربة نفسي اخوضها، لأنو العمر والصحة اللي ربنا انعم بيهم علي اليوم اكيد في يوم من الايام ح تفنى لانو دي سنة الحياة وهذا امر الله لا اعتراض فيه 🍂🤎.
عشان كدا عايز اعيش الحياة الملوّنة اللي كنت راسمها في خيالي وانا صغير، لكن المرة دي على ارض الواقع 🌫️🤎.
وفي النهاية عايز اطلب منكم طلب بسيط...
لو في يوم من الأيام حسيتوا اني اختفيت، او وقفت عن المحاولة، او حتى فقدت الشغف والحماس اني اواصل... ذكروني بالبوست دا، ذكروني بي عوض الكتب الكلام دا، وذكروني اني في يوم من الأيام وعدت نفسي اني ما اخلي احلامي تموت جواي 😴🤎.
اما الآن...
دي البداية، نشوف بعض بعد سنة ونشوف عوض الكتب الكلام دا الليلة وصل وين 🤎.
02 سبتمبر 2026
اتذكروا التاريخ دا كويس 🇸🇩🤎.
