Awad

Awad ‏وكيف يرجى الثبات بلا سريرة صالحة ولا مجاهدة في الخلوة ولا ورد قراني ولا قيام ليل

12/09/2025

بتكون سعيد لما تكون متصالح مع نفسك
لما تقبل بالوضع الانت فيهو من غير مقت وجلد لي ذاتك
لما تحب نفسك وتقدرها وفي نفس الوقت تاخد بي نفسك لي مراحل الوعي المختلفة وتتدرج بيها خطوة بخطوة وتخليها تسمو وتطغي على كل التعلقات الزائلة وترتبط فقط بخالقها الدائم الباقي
لما تفهم انو قرار السعاده في حقيقتو موجود في يدك انت وتحت سيطرتك وانت البتتحكم فيهو
لما تفهم أنو سعادتك في واقعها مرهونة بي وعيك للحظة الانت فيها وقدرتك على العمل والإستفادة والإستمتاع بيها قبل تفوت
لما تكون مدرك أنو القبوع في الماضي والتحسر عليهو وعلى خسارة الفرص فيهو أو التفكير في المستقبل من غير ما تعمل أي خطوة عشان ماتصل لي حلمك في المستقبل دا استدراج من الشيطان عشان يخليك تخسر اللحظه الحاضره الكان ومازال بامكانها انها تعدل النتيجه لي صالحك
ف سعادتك واقع مرهون بمدى وعيك وإدراك وبشكل حصري وثابت.

09/09/2025

أشدّ أنواع الابتلاء أن تُلازِمَ مَن غُلِظَ فهمه
وضاق إدراكه وثقل ذوقه ويظنّ نفسه سيّد العارفين
وهو أجهلهم
فبعض الابتلاءات في العقول التي‏
لا ترى ولا تفهم ولا تعترف أنها ‏لا تفهم بل الأسوأ أنها تظن أنها على صواب دائم🤦

05/09/2025

إحساس إنك بتصلي الخمس فروض كل يوم وبتعمل أي شي عشان ترضي ربنا دا براهو كفيل إنه ينور طريقك ويكون مصدر سعاده بالنسبه ليك الصلاه هي بدايه لكل حاجه حلوه في حياتك ابدأ و عود نفسك انك تصلي لو انت مابتصلي الصلاه هي البتميز دينك عن غيره صلي وانت ح تلقي الحياه متيسره وترتاح نفسيا وتحس بالسكينه والطمأنينه صلي عشان الصلاه هي اول ماتُسأل عنه يوم القيامه
اللهم إجعلنا من المحافظين على الصلاة في أوقاتها اللهم أرزقنا الخشوع فيها وأدائها على الوجه الذي يرضيك عنا يارب

03/09/2025

احمد ربنا إنك مسؤل عن نفسك قادر تاخد قراراتك وبتتحمل ضريبتها لـوغلط بتتحمل قرار انك تصلحها بي نفسك ولو صاح بتسعى علي قدر ماتقدر انها تكون مفيدة ومثمرة ليك وللمحيطين بيك بتسعى انك ماتحمل الحوليك همك حتى لو الظروف صعبة والدنيا وقاسية وانت براك في رحلتك
شي كويس شديد إنك قادر تكون مستمع جيد لي اصحابك قادر تهون عليهم وتساعدهم بالشي البتقدر عليهو قادر تكون داعم ليهم رغم وحدتك ورغم حاجتك انت للمساعدة والدعم
حتي لو الدنيا خذلتك أكثر من مرة صدقني شي عظيم جدا إنك بتسعى ماتخذل نفسك من جديد وبتسعى انك ماتخذل ثقة أو عشم زول فيك بتجاهد رغم كل الخذلان المريت بيهو انك ماتكون سبب في خذلان غيرك
في تفاصيل بتبين وتوضح صدق ونقاء وقوة الشخص
وأعظم مكاسبك في الدنيا إنك تكون شخص مسؤل عن نفسه وقلبك ابيض مافيهو ذرة غل أو حقد تجاه أي زول شخص سوي وبتحب الخير لي كل الناس

02/09/2025

مرات ربنا بسبب الاسباب ويخليك تعدي بي مواقف صعبة تخليك تفقد الثقة في كل الناس وتنعزل وتقفل علي نفسك وتبعد عن الكل وتعيش براك
لابقيت تأمن زول ولاعندك ثقه في اي زول
وفي وسط كل دة بتلاقي ربنا زرع في طريقك زول يغير فكرتك تماما زول يخفف عنك خوفك ووجعك وقلقك ويشاركك احلامك وشغفك بالحجات الانت بتحبها زول تعرف تتناقش معاهو بهدوء حتي لو كان رأيه مخالف ليك
زول بيخليك ترجع تأمن انو لسه في قلوب طيبة وصافية بتحس وبتقدر
في قلوب لسة بتحن وتطبطب وتهون وجع غيرها
حتي لو كانت موجوعه
الدنيا لسة بخير ماتخلي النماذج السيئة الشفتها فيها حياتك تعقدك وتكرهك في الحياة وتكرهك في الحلو الجواك جايز اختيارك كان غلط وجايز هم كانو درس ليك عشان تتعلم وتفهم حجات ماكنت ح تتعلمها غير بالطريقة دي وبالوجع دة ماتوقف دنيتك علي زول وماتقفل قلبك وتخلي زول يحتكرو لي حسابه
اتعلم وافهم واستوعب الحصل معاك وعيش من جديد اقيف علي رجليك من تاني وافتح قلبك من جديد ربنا ح يزرع في طريقك الشخص البستاهلك ويستاهل قلبك

01/09/2025

لما تكون في علاقة اي علاقه من اي نوع بتستنزفك وبتستهلك من طاقتك وكرامتك وبتطفئ نور قلبك ماتتردّد لحظه في انك تغادر
كتير بنقع في فخ التمني ظنانين انو الحب وحده قادر على انو يغيير وانو صبرنا علي الاشخاص البنحبهم ممكن يصنع معجزات ويغيرهم
بس الواقع صادق اكتر من امانينا وأحلامنا وقاسي اكتر من خيالنا
لانو ماف زول بتغير بعد ماتتشكل ملامحو النفسيه وتترسخ عاداتو جواهو التغيير الحقيقي بكون نابع من جواهو هو مابنقدر نحنا نفرضو عليهو ولابنتج من ضغوط ولا تضحيات نحنا بنقدمها ليهو
في شعور اسمه الاعتياد ودا دايما بضللنا وبخلينا نحس انو مابنقدر نعيش من غير الطرف التاني بس في الحقيقه اننا مابنخاف من فقدان الشخص علي قدر ما بنخاف من الفراغ اللي ح يتركو جوانا لو رحل
ماتخلي الخوف من التغير و وهم الامل ولا الحنين لي لحظات جميله بسيطه انت عشتها معاهو تسرق من عمرك سنين
وخليك فاكر انو كل يوم بتبادر فيهو بالانسحاب من علاقة بتأذيك هو يوم انت بتربحو من عمرك.

31/08/2025

انا بشوف انو الناس وأنا واحد منهم بيبقى أسير لي مشاعرو مهما حاول انو يكون عقلاني أو منطقي مع انو عقلك دايما بزكرك بالصاح وبالغلط وهو سيد الحكمه
الا انو قدام لحظة شعور واحده صادقة بيصبح ضعيف جدا وكأنو كل البناه من منطق وعقلانيه انهار قدام دفقة شعور واحدة
نحنا مابنقدر نفصل نفسنا عن عاطفتنا لانها بي بساطة هي جزء من كيانا وتكاد تكون هي جوهرنا الحقيقي
لما الواحد يكون في صراع بين عقلو وقلبو بتلقي دايما انو مشاعرك هي الاسبق لأنها مابتنتظر إذن مننا بتقتحم داخلك وبتفرض حضورها بتملأك بالحنين والشوق بالخوف والضعف بالفرح الحزن
أما عقلك بكون دايما متأخر خطوة بحاول أنو يلحق الاحداث ويخت الخطوط الحمراء والقوانين بس قلبك بكون اندفع قبل ماتقدر توقفو ودا ابدا مابعني اننا ما بنملك عقل بالعكس دا بيعني أننا كائنات حيه مابنقدر نتعامل مع انفسنا وكأننا آلة حساب
أنا مؤمن انو مشاعرنا ماضعف بل هي دليل على أننا بنعيش بي صدق ممكن تجرحنا أحيانا ممكن تخلينا هشين ممكن تخلينا متناقضين بس في نفس الوقت هي البتدينا معنى وبتخلينا نحس أننا عايشين وعلي قيد الحياه حتى اللحظات اللي بنتكسر فيها رغم قسوتها الا انو بتخلينا نتذوق عمق إنسانيتنا أكثر من فعل أي فكرة عقلانية
نحنا مابنقدر ننفصل عن مشاعرنا او نتحرر منها لأنها ببساطة هي البتحدد ملامحنا وتشكلينا

30/08/2025

إذا مريت بي مشاكل كتيره وفشلت انك تحلها واكتشفت في النهاية أنك أنت المشكلة خليك متاكد أنو الاكتشاف دا رغم ألمه إلا انو هو بداية النضج الحقيقي لأنو الاعتراف بأنك جزء من المشكلة هو أول خطوة عشان تكون انت جزء من الحل
الوعي بالخلل الداخلي هو بدايه نقطة التحول ماف زول مولد كامل وكلنا شالين في جوانا مشاكل وجراحات وتجارب شكلت سلوكنا المهم هو إنو نمتلك القوه الشجاعة و نواجهة أنفسنا بس ما نجلدها ونحاول نفهم سلوكيتنا ونغيرها
اللوم عمرو مايصنع التغيير لكن صدقك مع ذاتك ممكن يصنع المعجزات

29/08/2025

أكثر شيء اتعلمتو من تجاربي الفاشله
هو أنو ماف زول مستعد ينقذنك ويمد ليك يدو مالم تقوم وتنهض براك
وأنو الطيبة الزايدة كلفتها غاليه جداً وقلبي البمنح وبدي بدون حساب كان لازم يتعلم أنو يقول "كفى"
وأنو ماكل زول بقرب منك عايز ليك الخير وأنو الحب وحدو ماكافي انو يصلّح إنسان أو يرمم علاقة
فشلي علمني أميز بين منو البشوف ألمي جد ومنو البستهين بيهو وانو بعض الناس مابستحقو حتى تبرير ليهم رحيلك
وأن الكسره مابتعني النهاية بالعكس ممكن تكون بداية فهم أعمق لنفسك
اتعلمت أنو أسمع لي قلبي لكن ما أسلمو شاره القيادة
وأنو أثِق في نفسي وكلامها حتى لو كذبني الجميع
وأهم شي طلعت بيهو من السقوطات دي كلها انو انا أقوى مما كنت متخيل

29/08/2025

يُعطي دون أن يُسأَل فكيف به إذا سُئل أتُراه يبخل
ألحِّوا ولا تبرحوا، سيستجيب💚

28/08/2025

إحساس إنك ناقص او إنك ما كفاية بيجي من جواك انت مامن بره حتى لو في ناس حواليك دايماً بينتقدوك أو بيقارنوا بينك وبين غيرك وبحسسوك بالنقص لأنك في لحظة معينة من حياتك صدقت الفكرة دي وخليتها قاعدة في مخك وبنيت عليها نظرتك لي نفسك
وعشان تتخلص من الإحساس دا لازم تكون مدرك إنو ماحقيقة مطلقة وانو دا مجرد رأي انت كونتو عن نفسك من تجارب أو تربية أو مواقف مريت بيها بس انت كبرت ولسه شايل الاحساس دا معاك وكأنك مجبور إنك تمشي بيهو
كل ماتسمع صوت جواك بيقول ليك إنك ناقص او ما كفاية لازم توقف لحظة وتسأل نفسك هل الكلام دا حقيقي بيوصفك؟ وانت ليه بتصدقو؟
وابدأ شوف نفسك من منظور أوسع وإنك اكبر من غلطاتك واكبر من مقارنات الناس وانتقاداتهم واكبر من الحاجات الانت لسه ما حققتها وإنو قيمتك مامربوطة بأداء او شكل او مقارنة مع زول
الخطوة البعد كدا ابدا اعمل حاجات صغيرة تثبت لي نفسك إنك بتعمل حاجه وإنك مكتفي حتى لو مخك لسه مامصدق دا ومع الوقت ومع تكرار التجارب ح تبتدي الافكار القدميه عن نفسك تضعف
لازم تعرف إنو إحساس الكفاية بتبني واحدة واحدة كل ما توقف نفسك من جلد الذات وكل ما تدي لنفسك التقدير الانت طول عمرك كنت مستنيهو من غيرك
وطول ما انت بتفتس على الإحساس ده بره عمرك ما ح تلقاهو لأنو ما ح يجي غير من جواك انت لما تختار إنك تشوف نفسك بعيون أرحم وأعدل

26/08/2025

أعيش قصة حب مع نفسي عميقة جداً جداً بدأت حين قدرت نقاط القوة في روحي وفي العُمق ثمّنتها ومنحتها قيمة عالية وثُقل شعوري ومن ثمّ انطلقت إلى عالم الشغف ومارسته بكل حب وتفاني وتوسع هذا الشغف ودخل في نطاقه أشخاص اخرين تأثروا به تشربوه آمنوا بمحتواه
حين يصل أثرك إلى أكبر عدد من الناس ويتشبعوا بالرائحة الفريدة التي تُخلفها تصل إلى وعي الحب اللامشروط وهذا هو الحب الكوني تمتلىء بالحب وتفيض به ومن ثمّ تسكبه على الآخرين ببذخ أجمل قصة حب تحياها هي قصة شغفك قصة لذيذة وممتدة لا تخونك ولا تتخلى عنك اكتشف شغفك تكتشف كل مواطن القوة فيك وتعثر على الحب الحقيقي واللامتناهي .

Address

Sennar

Website

Alerts

Be the first to know and let us send you an email when Awad posts news and promotions. Your email address will not be used for any other purpose, and you can unsubscribe at any time.

Shortcuts

Share

Category