25/08/2026
ልቢ መንእሰያት ዝማረኸ ድምጻዊ ኡስታዝ ዩሱፍ ስዒድ ብሞት ተፈልዩና!
ትማሊ ኣብ መላእ ኤርትራውያን ኣፍቀርቲ ስነ-ጥበብ ዓቢ ሓዘን ዝተሰመዓሉ መዓልቲ እዩ። እቲ ብህዱእ ድምጹ፡ ብምዑዝ ዜማታቱን ተንከፍቲ ግጥምታቱን ልቢ ህዝብናን መንእሰያት ኤርትራን ክማርኽ ዝጸንሐ ፍሉይ ተውህቦ ዝተዓደለ ስነ-ጥበባዊ ኡስታዝ ዩሱፍ ስዒድ ካብዛ ዓለም ብሞት ተፈልዩና ኣሎ።
ስነ-ጥበባዊ ጉዕዞን ታሪኽ ሂወቱን:
ኡስታዝ ዩሱፍ ኣብ ከባቢ መንደፈራ ተወሊዱ፡ ኣብታ ከተማ ስፍየት ክዳን ብምምሃር ናብ ዓለም ስራሕ ኣብ ኢትዮጵያ ዝተሳተፈ እዩ ኔሩ። ዋላ’ኳ ቅድሚኡ ዝኾነ ወግዓዊ ናይ ስነ-ጥበብ ድሕረ-ባይታ ኣይሃልዎ፡ ብተፈጥሮኣዊ ፍሉይ ተውህቦኡ ግና ንመላእ ህዝቢ ዘንቀሳቕሱ ተኣምራታዊ ስርሓት ከበርክት ክኢሉ እዩ።
ኡስታዝ ዩሱፍ ጥበብ ንዕኡ ናይ ሂወቱ ኣካል፡ መግለጺ ውሽጣዊ ቃንዛኡን ሓጎሱን እምበር ከም ስራሕ ይኹን ንውልቃዊ ክብርን ውዳሰን ዝጥቀመሉ ኣይነበረን። በዚ ምኽንያት ድማ ከምቲ ዝግብኦ ከይተዘመረሉን ከይተነግረሉን ጸኒሑ። ንሱ ድምጻዊ ጥራይ ዘይኮነስ፡ ብደፋር ባህሪኡ፡ ብልዑል ናይ ምዝካር ክእለቱ ዝፍለጥን ዘይርሳዕ ውሽጣዊ ጽንዓት ዝነበሮን ዓቢ ሰብ እዩ ኔሩ።
ኡስታዝ ዩሱፍ ስዒድ ኣብ 2015 ምስ SBS ትግርኛ ቃለ-መጠይቕ ግር ነይሩ ቅንዲ ነጥብታት ካብቲ ቃለ-መጠይቕ
ናይ ስነ-ጥበብ ሓቀኛ ትርጉም: ስነ-ጥበብ ንዕኡ ንግዳዊ ስራሕ ወይ ናይ ውዳሰ መድረኽ ዘይኮነስ፡ ናይ ውሽጡ ቃንዛ፡ ሓጎስን ሓቀኛ ስምዒትን መተንፈሲ ጥራይ ምዃኑ ኣስሚሩሉ።
ተዘከርቲ ስርሓት: ኣብ ሰብዓታት ብጊታር ኣሰንዩ ዘቕረቦም ከም «ግመለይ ግመለይ»፡ «ንፋታሕ ንፋታሕ»፡ ከምኡ’ውን «ምሳኺ» ዝኣመሰሉ ደርፍታቱ ንልቢ መንእሰያት ብፍቕርን ሃገራዊ ስምዒትን ዘንቀሳቐሱ ስርሓት ምዃኖም ተገሊጹ።
መሪር ናይ ሂወት ስምዒት: «ኣብዚ እዋን ክደርፍ እንተኾይነ፡ ናይ ብኽያት ደርፍታት ጥራይ እየ ክደርፍ ዝኽእል» ብምባል፡ ኣብ ሂወቱ ዘሕለፎ መሪር ናይ ስደት፡ ሕማምን ማሕበራዊ ፈተናታትን ብሓደ ሓያል ቃል ገሊጽዎ።
ምሕዳስ ዝኽሪ: ንነዊሕ ዓመታት ሃለዋቱ ጠፊኡ ድሕሪ ምጽናሕ፡ እዚ ኣብ ታሕሳስ 2015 ዝተኻየደ ቃለ-መጠይቕ ንብዙሓት ኣፍቀርቱ ዝኽሮም ዘሐደሰን ሓደሽቲ ወለዶታት ድማ ታሪኹን ድምጹን ክድህስሱ መገዲ ዝኸፈተን ኔሩ።
ትሕትናን ውሽጣዊ ጽንዓትን: ብዛዕባ ነብሱ ካብ ምግናን ወጺኡ፡ ኣብ ውሽጡ ዝነበረ ፍሉይ ናይ ምዝካር ክእለትን ጥበባዊ ተውህቦን ብትሑት መንገዲ ኣቕሪብዎ።
ዋላ’ኳ ኣብ መወዳእታ ዕድሚኡ ብኸቢድ ሕማምን ዝተፈላለዩ ማሕበራዊ ጸገማትን ተፈቲኑ እንተሓለፈ፡ ሞራሉን ውሽጣዊ ሓይሉን ከይተተንከፈ እዩ ናብቲ ዘይተርፍ ናይ ኩልና ጉዕዞ ኣንቂዱ። ፈጣሪ ንነብሱ ብሰላም የዕርፋ፡ ንስድራቤቱን መላእ ኣፍቀርቱን ድማ ጽንዓት ይሃብ።
ኣላህ ይርሓሙ ወይቅፊርሉ!
