07/08/2026
๐๐๐๐๐ฑ๐ฐ๐๐ฒ๐ง๐๐ก๐ ๐๐๐ฆ๐ก๐ฎ๐ฎ๐ซ๐ข๐ฒ๐๐๐๐ ๐๐จ๐ฆ๐๐ฅ๐ข๐ฅ๐๐ง๐ ๐จ๐จ ๐๐๐๐ฌ๐ก๐ ๐๐๐๐ฅ๐๐ฆ๐ค๐ ๐ฎ ๐ฌ๐จ๐จ ๐๐๐ง๐๐ก๐ข๐ ๐๐ฒ ๐ก๐จ๐ซ๐ฎ๐ฆ๐๐ซ๐ค๐ ๐๐จ๐ฆ๐๐ฅ๐ข๐ฅ๐๐ง๐ ๐ข๐ฒ๐จ ๐ก๐ข๐ข๐ ๐ฌ๐ข๐ ๐๐๐๐ ๐ข๐ฌ๐ค๐๐๐ฌ๐ก๐ข ๐๐๐๐ฅ๐๐ฆ๐ข ๐๐ก
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), oo safar shaqo ku jooga magaalada Nairobi ee dalka Kenya, ayaa kulan muhiim ah la yeeshay wakiillada Beesha Caalamka iyo Hayโadaha Caalamiga ah ee fadhigoodu yahay Nairobi, isaga oo u soo bandhigay horumarka ay ku tallaabsatay Jamhuuriyadda Somaliland, mudnaanta Qaranka iyo hiigsiga Xukuumadda ee ku aaddan xoojinta iskaashiga caalamiga ah.
Madaxweynuhu waxa uu adkeeyey in Jamhuuriyadda Somaliland ay doonayso iskaashi iyo maalgashi ku dhisan dano-wadaag iyo wax-wada-qabsi, halkii ay ku tiirsanaan lahayd gargaar dibadeed iyo gacan-hoorsi.
Madaxweynaha Jamhuuriyadda Somaliland waxa uu wakiillada Beesha Caalamka iyo Hayโadaha Caalamiga ah u sheegay in nabadda iyo xasilloonidu ay yihiin mudnaanta koowaad ee Xukuumaddiisa. Waxa uu tilmaamay in ka badan 6,000 oo ciidan-beeleed ah, iyaga iyo qalabkoodiiba, si nabad ah loo qarameeyey, tababarna loo furay, kaddibna lagu daray Ciidanka Qaranka Somaliland.
Madaxweynuhu waxa kale oo uu xusay in shaqaaqooyinkii ka dhacay Gobolada Galbeedka lagu wajahayo wada-hadal, dib-u-heshiisiin iyo hannaanka nabadaynta iyo wada-xaajoodka ee ay bulshada Somaliland muddada dheer ku soo caano-maashay.
Sidoo kale, Madaxweynaha Jamhuuriyadda Somaliland waxa uu Beesha Caalamka u caddeeyey in Somaliland ay ka goโan tahay in arrinta Laascaanood lagu xalliyo wada-hadal, is-afgarad iyo hannaan nabadeed oo walaaltinimo ku dhisan.
Madaxweynuhu waxa uu xusay in aqoonsigii ay Dawladda Israaโiil 26-kii Diseembar 2025 ku aqoonsatay qarannimada Jamhuuriyadda Somaliland uu ahaa dhacdo taariikhi ah. Waxa uu tilmaamay in aqoonsiga Israaโiil aanu ahayn dhammaadka geeddi-socodka aqoonsi-raadiska Jamhuuriyadda Somaliland, balse uu qayb ka yahay xaqiijinta himilada ay shacabka Somaliland muddada dheer ku taamayeen, kuna dhisan amni iyo xasillooni, dimuqraadiyad, hayโado dawli ah oo si dhab ah u shaqaynaya iyo talada dalka oo si nabad ah oo daah-furan la isugu wareejiyo; kuwaas oo dhammaantood saldhig u yihiin rabitaanka shacabka Jamhuuriyadda Somaliland.
Xagga horumarka, Madaxweynaha Jamhuuriyadda Somaliland waxa uu sheegay in Xukuumaddu mudnaan gaar ah siinayso horumarinta waddooyinka, biyaha, tamarta, caafimaadka, waxbarashada iyo isgaadhsiinta. Waxa uu tilmaamay in dalka ay ka socdaan mashaariic waddooyin istaraatiiji ah, halka hoos-u-dhigista qiimaha korontada iyo maalgashiga tamarta nadiifta ahi ay qayb muhiim ah ka yihiin dadaallada lagu dardargelinayo koboca dhaqaalaha dalka.
Dhinaca kale, Madaxweynuhu waxa uu tilmaamay muhiimadda sugnaanshaha biyaha dalka, gaar ahaan sahminta iyo ka faaโiidaysiga kaydka biyaha dhulka hoostiisa ku jira, isaga oo Beesha Caalamka ugu baaqay iskaashi dhinacyada khibradda, farsamada iyo tiknoolajiyadda ah.
Madaxweynuhu waxa uu carrabka ku adkeeyey in Somaliland aanay Beesha Caalamka ula iman liis codsiyo iyo gacan-hoorsi ah, balse ay la wadaagayso natiijooyin horumarineed oo dhab ah, waxqabad la taaban karo iyo fursado iskaashi oo labada dhinacba dan u ah.
Madaxweynaha Jamhuuriyadda Somaliland waxa uu saaxiibbada iyo bah-wadaagta caalamka ugu baaqay inay Somaliland ku qiimeeyaan xaqiiqada ka jirta dalka, waxqabadkeeda iyo hannaankeeda dawladnimo, isla markaana ay ula macaamilaan si waafaqsan xaqiiqooyinkaas, loona sii xoojiyo wax-wada-qabsi dhab ah.
Waxa uu sidoo kale ku boorriyey Beesha Caalamka inay garwaaqsato xaqiiqada biyo-kama-dhibcaanka ah ee Jamhuuriyadda Somaliland iyo doorka lama huraanka ah ee ay ku leedahay nabadda, amniga, ganacsiga iyo guud ahaan horumarka Gobolka Geeska Afrika.
Madaxweynaha Jamhuuriyadda Somaliland waxa uu hadalkiisa ku soo afmeeray in iskaashiga Somaliland iyo Beesha Caalamku uu ku dhisnaado xaqiiqo, waxqabad, is-ixtiraam iyo dano-wadaag, si loo abuuro mustaqbal ku salaysan nabad, xasillooni, horumar iyo barwaaqo waarta oo faaโiido u leh shucuubta Gobolka Geeska Afrika.
๐๐๐๐๐ ๐๐๐๐๐ ๐๐๐,
๐๐ฎ๐ฌ๐๐๐ง ๐๐๐๐๐ง ๐๐ข๐ ๐ (๐๐๐ฒ๐ซ),
๐๐๐ก๐๐ฒ๐๐๐ง๐ค๐ ๐๐๐๐๐ฑ๐ฐ๐๐ฒ๐ง๐๐ก๐ ๐๐๐ฆ๐ก๐ฎ๐ฎ๐ซ๐ข๐ฒ๐๐๐๐ ๐๐จ๐ฆ๐๐ฅ๐ข๐ฅ๐๐ง๐
