25/01/2025
အင်အား ၇၀၀ ကျော်ဖြင့် ပအိုဝ်းဒေသကို တိုက်ခိုက်ဖျက်ဆီးနေသည့် စစ်ကောင်စီနှင့်လက်ပါးစေပြည်သူ့စစ်က ပအိုဝ်းဒေသကို အဆိပ်ဖြင့် ပစ်ခတ်တိုက်ခိုက်
ဇန်နဝါရီ ၂၅ ရက် ၂၀၂၅ ခုနှစ်
ပအိုဝ်းဒေသကို ထိုးစစ်ဆင် တိုက်ခိုက်ဖျက်ဆီးနေသည့် စစ်ကောင်စီနှင့်စစ်ကောင်စီလက်အောက်ခံ PNOပြည်သူ့စစ်တို့သည် သာမန်လက်နက်ကြီးများသာမက လက်နက်ကြီးပစ်ခတ်မှုတွင် အဆိပ်များဖြင့်ပါ အသုံးပြုတိုက်ခိုက်လာသည်။
လက်ရှိတွင် စစ်ကောင်စီသည် ဆီဆိုင်မြို့နယ်အရှေ့ဘက်ခြမ်းရှိ ပအိုဝ်းကျေးရွာများကို လက်နက်ကြီးများဖြင့် နေ့စဥ်ပစ်ခတ်ဖျက်ဆီးလျက်ရှိရာ သာမန်လက်နက်ကြီးကျည်များသာမက အဆိပ်ပါဝင်သည့် လက်နက်ကြီးကျည်များဖြင့်ပါ ကျေးရွာအတွင်းထဲသို့ ပစ်ခတ်ဖျက်ဆီးနေခြင်းဖြစ်သည်။
ဇန်နဝါရီ ၂၄ ရက်နေ့တွင် စစ်ကောင်စီက ပစ်ခတ်လာသည့် လက်နက်ကြီးကျည် ၁ လုံးကို ပအိုဝ်းအမျိုးသားလွတ်မြောက်ရေးတပ်မတော်က တူးဖော်ရရှိခဲ့ပြီး ထိုမပေါက်ကွဲသေးသည့် လက်နက်ကြီးကျည်မှာ အဆိပ်ကျည်ဖြစ်သည်ကို တွေ့ရှိရသည်။
ထိုအဆိပ်ကျည်မှာ ကျည်ပေါ်တွင် အဆိပ် ဟုရေးသားထားသည်ကို တွေ့ရှိရပြီး အဆိပ်ထွက်ပေါက်များပါ ပါဝင်သည်ကိုတွေ့ရှိရသည်။ ယခင်တွင် ယင်းကျည်အမျိုးအစားများအား စစ်ကောင်စီက အသုံးပြုသည်ကို မတွေ့ရှိဖူးပဲ ယခုတွေ့ရှိမှုသည် ပထမဆုံးအကြိမ်ဖြစ်သည်။
စစ်ကောင်စီသည် ကျင့်ဝတ်မဲ့စွာ စစ်ရာဇာဝတ်မှုများကို ပြောင်ပြောင်တင်းတင်းကျူးလွန်နေပြီး ပအိုဝ်းဒေသ ပအိုဝ်းလူမျိုးများအား အဆိပ်အသုံးပြုကာ တိုက်ခိုက်လာခြင်းဖြစ်သည်။
ယခင်ရက်များတွင်လည်း စစ်ကောင်စီက ပစ်ခတ်သည့် အဆိပ်ကျည်သင့်မှုကြောင့် ရဲဘော်တချို့မှာ အရေပြားယားယံခြင်း ၊ အပြင်းအထန်ဖျားနာခြင်း၊ မူးဝေအော့အန်ခြင်း စသည်များ ခံစားခဲ့ရသည်။
ထို့အပြင် အကြမ်းဖက်စစ်ကောင်စီနှင့်စစ်ကောင်စီလက်အောက်ခံPNO ပြည်သူ့စစ်က အင်အား ၇၀၀ ကျော်ဖြင့် ထိုးစစ်ဆင်တိုက်ခိုက်နေသဖြင့် ဆီဆိုင်မြို့နယ်တွင် နေ့စဥ်တိုက်ပွဲပြင်းထန်နေလျက်ရှိသည်။
ထိုးစစ်ဆင်လာသည့် စစ်ကောင်စီအင်အား ၇၀၀ ကျော်တွင် ၂၀၀ ထက်မနည်းကို ပအိုဝ်းအမျိုးသားလွတ်မြောက်ရေးတပ်မတော်က ခုခံချေမှုန်းတိုက်ခိုက်နိုင်ခဲ့သော်လည်း စစ်ကောင်စီသည် ပအိုဝ်းပြည်သူများအား ပေါ်တာဆွဲပြီး လူသားဒိုင်းပြုလုပ်ကာ အင်အားဖြည့်တင်းပြီး ဆက်လက်တိုက်ခိုက်နေဆဲဖြစ်သည်။
ထို့အပြင် စစ်ကောင်စီသည် နေ့စဥ် ပအိုဝ်းဒေသကို တိုက်လေယာဥ်ဖြင့် ဗုံးကြဲကာ တိုက်ခိုက်ဖျက်ဆီးနေလျက်ရှိသည်။ ဇန်နဝါရီ ၂၂ ရက်နေ့တွင် ၄ ကြိမ် ၊ ၂၃ ရက်တွင် ၂ ကြိမ် ၊ ၂၄ ရက်တွက် ၂ ကြိမ် စစ်ကောင်စီက ဆီဆိုင်မြို့နယ်အရှေ့ခြမ်းရှိ ပအိုဝ်းကျေးရွာများကို ဗုံးကြဲတိုက်ခိုက်ခဲ့သည်။
စစ်ကောင်စီနှင့်PNOပြည်သူ့စစ်တို့၏ တိုက်ခိုက်မှုကြောင့် ပအိုဝ်းကျေးရွာများမှ ပြည်သူလူထု ၄ ထောင်ကျော်မှာ တောတောင်ထဲ ထွက်ပြေးတိမ်းရှောင်နေရသည်။
စစ်ကောင်စီက လက်နက်ကြီးများ ၊ ဒရုန်းများ ၊ မီးလောင်ဗုံးများ၊ တိုက်လေယာဥ်များဖြင့် တိုက်ခိုက်မှုကြောင့် ပအိုဝ်းပြည်သူလူထု၏ အိုးအိမ်စည်းစိမ်များစွာ ဆုံးရှုံးပျက်စီးခဲ့သည်။
စစ်ကောင်စီ၏ တိုက်ခိုက်မှုကြောင့် ဆီဆိုင်မြို့နယ် ထီစုံကျေးရွာသည် နေအိမ် ၆၀ ကျော် မီးလောင်ပျက်စီးခဲ့ရသည်။
PNLA သတင်းစဥ်
#ပအိုဝ်းအမျိုးသားလွတ်မြောက်ရေးအဖွဲ့ချုပ် #ပအိုဝ်းအမျိုးသားလွတ်မြောက်ရေးတပ်မတော်
