11/07/2025
Ballanqaad Been Noqday: Dib u Milicsi Heshiiskii 8-da Juun 2022 ee Weerarkii Radio Baraawe.
Saddex sano ayaa ka soo wareegtay heshiiskii nabadeed ee la gaaray 8-da Juun 2022, kaddib weerarkii lagu qaaday xarunta Radio Baraawe.
Heshiiskaas oo ay hormuud u ahaayeen masuuliyiin sare oo uu horkacayay gudoomiyaha gobolka shabeellaha hoose Mudane ibraahim Najax , kaasoo lagu rajo weynaa in uu dhameyn doono xiisaddii ka dhalatay tacaddigii loo geestay agaasimaha idaacadda iyo qalabka warbaahinta.
Si kastaba ha ahaatee, dib u milicsiga maanta lagu sameynayo heshiiskaasi wuxuu muujinayaa in dhammaan ballanqaadyadii uu garwadeenka ka ahaa mudane ibraahim adam cali najax ay noqdeen kuwo aan waxba ka hirgalin
taasoo wiiqday kalsoonidii laga qabay Maamulka gobolka si looga dhabeeyo ilaalinta xorriyadda saxaafadda.
Heshiiskii 8-da Juun 2022:
Balanqaadyada beenta ee ku dhisan nolosha siyaasiyiinta.
Wada-hadalladii dhacay 8-da Juun 2022 oo lagu qabtay magaalada Baraawe, waxaa kasoo qeyb galay:
Guddoomiyaha Gobolka Shabeellaha Hoose – Ibraahim Aadan Cali Najax,
Guddoomiyahii h**e degmada Baraawe – Liibaan Abuukar Baafo,
Ku-xigeenkiisii h**e Amniga iyo Siyaasadda degmada – Ismaaciil Jaadane,
Mas’uuliyiin ka tirsan maamulka Koonfur Galbeed,
Maamulka Radio Baraawe.
Waxaa kulankaasi lagu gaaray qodobo muhiim ah oo ay ka mid yihiin:
1. In maamulka gobolka uu gacan ka geysto daaweynta Agaasimaha Radio Baraawe, Cismaan Aweys Baxar, oo dhaawac ka soo gaaray gacanta.
2. In qalabkii idaacadda ee la burburiyay la mago iyo in booliska degmada ay dib ugu soo celiyaan qalabka idaacadda.
3. In maamulka degmada uu iibiyo qalabkii laga burburiyay idaacadda oo ay ku jiraan kombuyuutaradii iyo mikrofoonada.
4. In maamulka degmada ay booqdaan xarunta idaacadda qiimeeyaanna qalabka la burburiyay.
Ballanqaadyadaasi oo dhan waxey noqdeen kuwo la jebiyay oo dhamaanba xubnihii gobolka iyo kan degmada ee dhibka geeystay ay ka gaabsadaan iney jawaab ka bixiyaan waxaa ku dhacay heshiiskii la gaaray.
Dareenka Maamulka Idaacadda:
Maamulka Radio Baraawe wuxuu si cad u muujiyay in heshiiskii 8-da Juun uu ahaa mid lagu marin habaabiyay bulshada iyo saxaafadda. Agaasimaha idaacadda, Cismaan Aweys Baxar, ayaa sheegay:
"Waxaan sugaynay caddaalad iyo cudud dowladeed oo sax ah, balse waxay noqotay marin habaabin. Wax qiil ah looma heli karo in heshiis rasmi ah oo masuuliyiin sare ku dhawaaqeen saddex sano laga aamuso."
Baaq Ku Wajahan Maamulka Cusub & Ururrada Saxaafadda
Saxaafadda deegaanka ayaa ku baaqaysa:
In maamulka cusub ee degmada iyo gobolka ay dib u eegaan heshiisyada laga baxay,
In la helo daba-gal sharci ah oo lagu hubinayo ciddii ku xadgudubtay ballanqaadyada,
In ururrada u dooda xuquuqda saxaafadda ay kordhiyaan cadaadiska ay saarayaan maamulka deegaanka si loo xaqiijiyo badbaadada saxafiyiinta iyo jiritaanka idaacadaha madaxa bannaan.
Heshiis aan la fulin wuxuu ka dhigan yahay dhaawac laba-geesood ah:
mid ku dhacay kalsoonida shacabka, iyo mid ku dhacay haybadda maamulka.
Dib u milicsiga heshiiskii 8-da Juun 2022 wuxuu na xasuusinayaa in danta guud aysan ku fuli karin hadal kaliya, balse ay u baahan tahay ficil muuqda, xushmad la siiyo saxaafadda, iyo u istaagid dhab ah oo lagu difaacayo xaqa dadweynaha ee helitaanka warar madax bannaan.
Xorriyadda warbaahinta waa tiirka dowladnimada — lagama gorgortami karo, lagamana baaqan karo ilaalinteeda.
DHAMAAD
Taariikh: 11 Luulyo 2025
Goobta: Baraawe, Shabeellaha Hoose
Qore: Weriye Fu'ad Shoble Kafe
