25/07/2025
Nolosha Xoogsatada Boosaaso – Dhib, Dulqaad, iyo Rajada Maalinta walba Berri
Magaalada Boosaaso, waa albaabka ganacsiga ee Puntland, waana meel ku camiran deked, suuqyo, dhismayaal cusub, iyo mashquul joogto ah. Laakiin marka indhaha laga saaro ganacsatada waaweyn iyo gaadiidka culus, waxaad arkeysaa wejiyo kale – wejiyada xoog-maalayaasha magaalada.
Waa raggii iyo dumar kii oo waaberi toosa si ay shaqo u helaan, qaar u safra dekedda, qaar dhismaha u gala, qaarna suuqyada mara si ay culeys u qaadaan ama bacaha dadka ugu raraan. Waa dad aan lahayn damaanad maalin kale, balse maanta u taagan rajo.
Celcelis ahaan, xoogsatada Boosaaso waxay helaan $5 ilaa $10 USD. Qaar darawal ah ayaa maalintii ka hela $5 – $8 kadib marka uu shidaalka iyo kirada bixiyo.
Inta badan, lacagtaas yar waxaa looga bixiyaa kirada guri, raashinka carruurta, biyaha ceelka , iyo waxbarashada yar ee laga bixiyo dugsi hoose ama madaraso. Haddii uu jirro dhacdo, ama shaqo la’aan timaaddo, qofkaasi waxa uu halis ugu jiraa in qoyskiisa jiif iyo cunto midna aysan helin.
Haddana, waxaad arkaysaa iyaga oo faraxsan, salaad ku tukada suuqyada geesahooda, midba midka kale wax ku dhiira geliyaa, in uu u dulqaato kulaylka iyo cadceedda Boosaaso si uu u helo nolosha ubadkiisa .
Waana dadka nolosha u heellan, laakiin aysan helin fursado ay ku horumariyaan xirfadahooda ama noloshooda. Waa xoogga dadweynaha – laf-dhabarta dhaqaalaha suuqyada iyo dekedda Boosaaso.
Su’aashu waa: yaa dareemaya jiritaankooda?
Yaa u sameeya tababar si ay shaqo rasmi ah u helaan?
Yaa hubiya in carruurtooda ay helaan nolol ka wanaagsan tan ay maanta haystaan?
Waa waajib in la maqlo codkooda.
Waa waajib in la garab istaago
Waa waajib in mustaqbalkooda laga dhigo mid wanaagsan.
Boosaaso waa magaalo fursado leh — laakiin in ay ka faa’iideystaan xoogsatadu waxay u baahan tahay garab iyo garasho.
Hadaba comment nagula wadaag sida loo garab istaagi karo xoogsatada magaalada Boosaaso
