11/02/2025
“AFURI WALAALKAA OO HEL AJARKIISA OO KALE
Bismillaah,
Laga soo bilaabo milaygii 2021, barnaamijka AFURI WALAALKA waa mid aan si sannadle ah uga qabanno magaalada Aw-barre. Waa barnaamij aan ku caawinno danyar isugu jirta kuwo biyo mooyee aan baad haysan, dabkana aan shidan iyo kuwo mar qada marna hela. Inkasta oo ay wacneyd inaan dadkeennaas wax buuran tarno sida inaan shaqo abuur u sameyno, haddana tog waliba taagtii ayuu rogmadaa e, tamar aan ku fulinno ayaan jirin.
Inaan iska fadhinno, gacmaha laabanno, afka xidhanno, ta shakhsiga ah uun ka fikirno iyo inaan bulshada ka warhayno oo aan kala baranno kiisa liita iyo kiisa ladan, ka baahan u damqanno oo aan ogaanno, kala doorashadeeda ayaa nala gudboonaatey. Waafajin Alle, tan dambe ayaan dooranney oo damiirkayagu wuu nasiin waayey in guryahayaga lagu dhergo, kuwa u xigana gaajo lagu lado. Nabigu ﷺ wuxuu yidhi: Dad waxa ugu wanaag badan, kooda ugu waxtarka roon.
Doorasho dabadeed, 12ka bilood ayaa waxa aan ka qabsanney bisha Ramadaan. Sababtuna, waa bil farxadeed oo ka geddisan bilaha kasoo hadhey.
Waa bil weyni badan oo rabbi inoogu deeqey, dhexdeedana ay dhacdo soonka oo ah shanta tiir ee islaamku ku taagan yahay kiisa 4aaad. Soonku waa camalka sida gaarka ah rabbi usheegey inuu isagu leeyahay, ruuxana isagu ka abaalinayo; wixii la xidhiidhana diintu aad bay inoogu boorisey.
Waa bil ay tahay in ka dheregsani ogaado ka juuca iyo gaajada la il-daran, ka ladani ogaado ka baahan, ka helaayina ogaado ka qada, si guudna bulshada meel wada degani ay si buuxda iskaga warhayso. Innaga oo og in ruuxa soomani uu ugu farxad badan yahay kolka uu afurayo, haddana waxa jira dadyow badan oo aan haysan oon ay ku af-xidhaan iyo mid ay ku af-furtaan labadaba; dadkaasi wax siintoodana ajar iyo xasanaad weyn baa ku sugnaadey. Arrintaasina isaga oo rasuulku ﷺ ka hadlaya wuxuu yidhi: Qofkii afuriya qof sooman, waxa u sugan ajarkiisa oo kale, iyada oo aan qofkii soomanaa ajarkiisa waxba laga dhimayn.
Waxa hubaal ah in howshaas hirgelinteedu ubaahan tahay hab, hannaan iyo qorshe intaba. Waxa baahidaas dabooleysaa ma ahan hadal iyo wax af laga yidhaa ee waa caawimo muuqata oo ruuxa lasiiyo. Hayeeshee, annagu Arday ayaan ubadneyn, si kasta oo aan udadaalno waxa aan isku keeni karaynay ma ahayn wax tiro badan gaadha ee wax tiro yar bishaas kaafisa uun bay ahayd. Sidaas darted, waxa ay nala noqotey inaan barnaamijka ballaadhinno, oo aan baahinno, lana wadaagno bulsho weynta ku nool magaalada Aw-barre iyo soomaalidaba guud ahaan.
Aalaa, dadka lagama waayo samo-falayaal haddii ay kheyr maqlaan uga dheereeya dadka intiisa kale; hawshii aan bilownay waxay noqotey mid nagu soo xidha ehelkeeda; barnaamijkuna sannad kasta wuu sii naaxayey oo wuu sii beekhaamayey.
Sannadii 1aad oo ku beegnayd 2021, wixii aan jeebkayaga ka keennay iyo wixii ay dadku noo soo direenba, waxaan ku afurinney oo aan noocyada kala duwan ee raashinka ah ugu dhigney 15-16 qoys. Alleylehe, farxad ayay noo ahayd iyo bilow fiican in aan qoysas intaa dhan aan Ramadanta ka saarney.
Halkaad shalay taagneyd h**e ayaa looga sikadaa e, tawfiiq ilaahay iyo dadaal badan kadib, sannaddii labaad kuna beegnayd 2022-kii, Rabbi wuxuu nagu guuleeyey inaan afurinno 46 qoys.
Sannaddii 3aad oo ahayd 2023, wuxuu Alle nagu sugey inaan caawinno 49 qoys oo kamid ah dadka intiisii liitay.
Sanandkii 4aad oo ahayd sannadkii h**e, sixir barar jirey iyo maciishaddii oo cirka ahayd awgeed, waxaan caawinney 29 qoys. Iyada oo aan qoys kasta u dhigeynay wax kasta oo ay bishaa u baahnaayeen.
Ugu dambeyn, sanadkan maciishadda iyo nolosha dadkaba korodh baa ku yimid, baahidii masaakiintuna waa halkii iyo siyaado, bishii ramadaanna waxaa innaga xiga labo toddobaad iyo waxooga; sidaas darteed, waxaan ka codsanaynaa dadka samaha jecel inay ka qeyb qaataan arrinkan kheyriga ah oo wixii ay awoodaan ku taageeraan oo ku taakuleeyaan dadka taagta daran ee Ramadaanna ay hayso.
Hala sheer gareeyo maqaalkan, si uu dad badan u gaadho, masaakiin badanna inoola farxaan bishaasi insha Allah.
[الزلزلة:7]
Mahadsanidin jaalayaal.”
W/Q: Hamza M Mumin
