04/06/2026
Gaalkacyo, 04 Juun 2026 – Guddoomiye Ku-xigeenka 1-aad ee Golaha Wakiillada Dowladda Puntland, Hon Mohamed Baarri Shire, ayaa maanta kulan la qaatay Guddiga Nabadaynta Shacabka Gobolka Mudug.
Kulanka ayaa diiradda lagu saaray xaaladda nabadgelyo ee gobolka, dadaallada socda ee nabadaynta bulshada, iyo sidii loo xoojin lahaa wada-shaqaynta u dhexeysa dowladda, isimada, waxgaradka iyo bulshada si loo adkeeyo nabadda iyo xasilloonida Gobolka Mudug.
Kulanka waxaa sidoo kale ka qayb galay qaar ka mid ah Xildhibaannada Golaha Wakiillada Dowladda Puntland, xubno ka tirsan Golaha Wasiirrada Dowladda Puntland, Guddoomiyaha Gobolka Mudug iyo Agaasimaha Madaxtooyada ee Gobolka Mudug, kuwaas oo ka dhagaystay warbixin ku saabsan hawlaha nabadaynta iyo caqabadaha jira.
Guddoomiye Ku-xigeenka 1-aad Ee Golaha ayaa bogaadiyey shaqada ay Guddiga Nabadayntu ka hayaan gobolka, isaga oo xusay muhiimadda ay leedahay in la sii xoojiyo dadaallada lagu xallinayo khilaafaadka, laguna dhisayo kalsoonida iyo wadajirka bulshada.
Dhankooda, xubnaha Guddiga Nabadaynta ayaa la wadaagay Guddoomiyaha iyo mas’uuliyiinta kale warbixinno iyo talooyin la xiriira xaaladda gobolka, iyagoo adkeeyey baahida loo qabo in la sii taageero qorshayaasha nabadaynta iyo dib-u-heshiisiinta bulshada.
