05/09/2025
Taliyaha guud ee Taliska Mareykanka ee Afrika (AFRICOM) ayaa sheegay in cutubka gaarka ah ee Soomaaliya ee Danab uu yahay ciidanka ugu awoodda badan ee qaaradda Afrika dhanka dagaalka, Xeeladaha iyo la dagaallanka argagixisada.
Intii uu ku sugnaa Muqdisho, taliyaha AFRICOM waxa uu bogaadiyay doorka Danab ay ku leeyihiin dagaalka ka dhanka ah ururka AS, isagoo tilmaamay in khibradooda dagaal, geesinimada iyo xirfadaha gaarka ahi ay ka dhigeen ciidan tusaale u ah Afrika oo dhan.
Cutubka gaarka ah ee Danab Brigade, ayaa kaalinta 1aad ka galay dhoolatus AFRICOM samaysay labadii sano ee la soo dhaafay.
Danab waxa ay taageero tababarro iyo qalab ka heshaa Mareykanka, iyadoo sidoo kale ay yihiin laf-dhabarta hawlgallada qaranka Soomaaliya ee ka dhanka ah argagixisada. Ciidankan ayaa si joogto ah uga qeyb gala howlgallo qorshaysan oo ka dhaca gobollada Hiiraan, Shabeellaha dhexe Shabeellaha Hoose, Jubbada hoose, Galmudug iyo qeybo kale oo dalka ah.
Hadalkan taliyaha AFRICOM ayaa xoojinaya sumcadda iyo kalsoonida Danab ee caalamka, iyadoo loo arko ciidan awood u leh fulinta hawlgallo adag iyo difaaca qarannimada Soomaaliya.
Dhan kale waxaa jira soo jeedin ah in kordhiyo tirada cutubka iyo helis qalab casri oo la jaanqaadaya baahiyaha gaarka ah ee ciidanka.
