10/06/2026
MUHIIM AH
Pluralism Democratic Development Organization (PDDO) waa urur bulshada rayidka ah oo u heellan horumarinta dimuqraadiyadda, kobcinta aqoonta bulshada, xoojinta ka-qaybgalka muwaadiniinta, iyo taageeridda dowlad-wanaagga.
Ururku wuxuu aaminsan yahay in bulsho aqoon leh, ka warqabta xuquuqdeeda iyo waajibaadkeeda, ay saldhig u tahay dimuqraadiyad xooggan, dowladnimo hufan, iyo horumar waara.
Iyadoo laga ambaqaadayo himiladaas, PDDO waxay si guul leh u dhammaystirtay turjumaadda Af-Soomaaliga ah ee buugga Electoral System Design: The New International IDEA Handbook, oo ka mid ah tixraacyada ugu miisaanka culus uguna sumcadda badan caalamka ee la xiriira nidaamyada doorashooyinka, matalaadda siyaasadeed, iyo dhismaha hay’adaha dimuqraadiga ah.
Turjumaaddani waxay ka tarjumaysaa dadaalka PDDO ee lagu ballaarinayo helitaanka aqoonta, lagu kobcinayo fahamka nidaamyada doorashooyinka, laguna dhiirrigelinayo dood cilmiyeed iyo wada-tashi wax ku ool ah oo ka qayb qaata horumarinta dimuqraadiyadda, dowlad-dhiska, iyo ka-qaybgalka bulshada ee Puntland iyo Soomaaliya guud ahaan.
Buuggan waxaa dhawaan loo gudbin doonaa aqoonyahannada, hay’adaha dowladda, jaamacadaha, ururrada bulshada rayidka ah, culimada, iyo khubarada arrimaha dimuqraadiyadda si looga helo aragtiyo, falanqayn iyo talooyin wax-ku-ool ah oo ka qayb qaata tayeynta iyo kobcinta fahamka bulshada.
📖 "Marka aqoontu kororto, dimuqraadiyaddu way xoogaysataa."
PDDO Promoting Democracy, Political Pluralism and Inclusive Development