27/10/2024
Waxaa jira waxyaabo cajiib ah oo maanta la maqlay!
Markii u horreysay tan iyo bilowga dagaalka , Wasiirka difaaca Israa’iil, Yoav Gallant wuxuu ka sheegay hadal uu ka jeediyay munaasabad lagu xusay weerarkii 7 Oktoobar oo lagu qabtay waqooyiga Telaabiib; “ Soo celinta maxaabiista lagu heysto Qasa waxay u baahantahay tanaasul xanuun badan— Waa inaan tan u sameynaa maxaabiista iyo qoysaskooda.” Wuxuu intaa ku daray ; “ Hadaf kasta laguma gaari karo howlgal militari.”
Hadalkan iyo goobta laga jeediyayba waxaa laga arki karay surtagalnimada in la arki karo isbeddelo ku yimaada dagaalka, balse waxyar kaddib waxaa la maqlay hadal kale ; Madaxweynaha Masar, Cabdifitaax Al Sisi ayaa ka sheegay maanta Qaahira in uu soo bandhigayo hindise xabbad-joojin labo maalin ah oo laga hirgeliyo Qasa, si loo sii daayo afar maxbuus oo Israa’iiliyiin ah oo ay Xamaas ku beddelanayo maxaabiis Falastiiniyiin ah iyo gargaar loo oggolaado inuu Qasa galo gaar ahaana waqooyiga oo go’doon ah, haddii la isla qaato isla waqtigaaba wuxuu sheegay in laga shaqeynayo hindise kale oo muddo dheer ah, si loo gaaro hadafka dagaalka oo la soo afjaro. Wakaaladda wararka ee Reuters, ayaa sidoo kale maanta soo bandhigtay in Dooxa lagu diyaariyay heshiis ugu yaraan bil ah , oo la doonayo dhinaca Israa’iil inay ku caddeyso in muddadaa lagu gaaro heshiis soo afjaraya dagaalka oo ah waxa ay doonayso Xamaas.
Suragal ma tahay in dagaalka Qasa la soo afjaro?
Waxaa jira calaamado badan oo ku filan inay ku qasbaan Israa’iil joojinta dagaalka , sababtoo ah si aysan horey u qiyaasin Israa’iil ayaa u dhiig baxaysa, waxayna xaka-meyn la’dahay dagaalka, hadda celcelisay in ka badan 2 bilyan oo dollar ayaa toddobaad ka yar ku baxaya dagaalka , waxaa dheer in sidoo kale celcelis 3 askari ay ka dhimanayaan 6 saac oo kasta Israa’iil, sidoo kale Israa’iil ayaa ku dhacday dabin, howlgalka dhulka ee Lubnaana wuxuu noqday mid argagax iyo dhul-gariir ka dhaliyay gudaha Israa’iil, sababtoo ah wax ka yar labo bilood ku dhawaad kun askari ayaa lagu qiyaasaya inay dagaalka ku lumisay Israa’iil , waxaana laga saaray dagaal ku dhawaad labo kun oo kale oo dhaawacyo halista loo geystay , sababtoo ah ciidanka Israa’iil ayaa ku soconaya dhul la geliyay miinooyin la hago , taasoo ah waxa ay kala kulmayaan dhulka kala dheer ee xadka koonfurta Lubnaan. Waxayna halkaa kala kulmeen dagaal ku dhufo oo ka dhaqaaq ah oo loo adeegsaday hub awood badan oo casri ah iyo gantaallo la hago, waxaana la curyaamiyay dhaqdhaqaaq kasta oo ciidanka Israa’iil.
Wax ka badan labo toddobaad , dadka ku nool magaalada saddexaad ee ugu weyn dhulka Israa’iil ay heysato ee Haifa iyo guud ahaan gobolka waqooyi ayaa la kulmaya bandow, ka dhashay weerarrada joogtada ah ee gantaallada iyo diyaaradaha aan duuliyaha lahayn ee Xisbullah ay ku weerarrayso dhulkaa, tana waa wax kale oo ku qasbaya Israa’iil, inay qaadato tanaasul, sababtoo ah maalin kasta hal milyan oo qof ayaa lagu qasbaya inay gabaad galaan, halkii ay ahayd in gobolka waqooyi Israa’iiliyiinta lagu celiyo, wuxuu dhaliyay duulaanka dhulka ee Lubnaan in kumannaan kun oo kale ay barakacaan, tana waa sababta uu Gallant u adeegsanayo ‘xalku inuusan ku jirin dagaal iyo howlgal militari’.
Maxay ka dhigantahay joojinta dagaalka?
Dhab ahaantii dagaalka oo la joojiyo , waxay la macno tahay Netanyahu oo is deldelay, sababtoo maalinta ciidanka laga saaro dagaalka, waxaa xigta waqti mugdi ah oo uu la kulmayo Netanyahu, tani waxay la xiriirtaa kooxda midigta fog ee xukuumadda Netanyahu, kuwaasoo aan dooneyn dagaalka in la soo afjaro, haddii ay dhacdana waxay maxkamad geynayaan illaa ay xabsiga geliyaan Netanyahu, xalku waa in dabaal siyaasadeed uu ka helaa Mareykanka , markaa wuxuu ku dhiirran karaa Netanyahu inuu ku raaco Gallant joojinta dagaalka, sababtoo ah wuxuu doonayay wasiirka difaaca ka hor howlgalka Lubnaan in ciidanka laga saaro Qasa , balse waxaa diidday Netanyahu oo ay riixayeen kooxda midigta fog illaa Gallant loogu hanjabay in la casilayo.
Hanjabadaa Iran;
Intii uu booqanayay wasiirka arrimaha dibadda Iran , Abbas Araghchi dalalka Carabta iyo Turkiga , wuxuu la wadaagay inay Iran geli doonta dagaal, haddii aan la soo afjarin duulaanka Israa’iil ee Qasa iyo Lubnaan, sababtoo ah dagaalka ayaa hadda u muuqda inuu isku beddeli doono mid ka soo horjeeda Iran, waqtigaanna ma ay doonayso Iran inay gasho dagaal ballaaran, waxayna hadda adeegsanaysa kaarkeeda cadaadiska ee dalalka gobolka , sida ay ku warrantay wakaaladda wararka Turkiga ee Anadolu.
Muxuu ka dhiganyahay hadalkan?
Waxay u muuqataa inay Iran markan dareemayso hoos u dhaca, sababtoo ah dhimashada hoggaanka sare ee dhaqdhaqaaqyada iyo dagaalka uu ku dhow in lagu soo jiido Mareykanka , waxay ku dhaweynaysa Iran khatarta, waqtigan waxay u aragtaa Iran marxalad muhiim ah oo ay u baahantahay dib u habeyn ballaaran , sababtoo ah dagaalka sannadka ka badan socda wuxuu hab dhaqaale iyo awoodeed u sameeyay Iran , horumarinteeda nidaamyada gantaallada iyo barnaamijka nukliyeerka ayaa sidoo kale ku dhow inay naafo noqdaan, taana waxay Iran ka doorbidaysa inay gasho dagaal gobol oo kaliya bartilmaameedku uusan ahayn Israa’iil ee markaa waxay Iran ku dhufan doonta bartilmaameedyada gudaha dalalka khaliijka , sida laga maqlay saraakiisha Iran, iyadoo warbixin lagu baahiyay wargeyska New York Times, lagu sheegay inuu Abbas Araghchi, ku wargeliyay Sacuudiga iyo dalalka khaliijka inuusan siin doonin dammaanad qaad amni haddii Israa’iil ay ku sii socoto dagaalka , khatartuna waxay gaaraysa ceelasha shidaalka!, tana waa mid ka mid ah waxyaabihii hoos u dhigay weerarkii Sabtidii ay ku qaaday Israa’iil gudaha Iran.
Arrimahan oo dhan waxay u muuqdaan inay ka dhigantahay maalmaha iyo bilaha soo socda inay yihiin waqti muhiim ah u ah colaadda bariga dhexe.
Hadda , waxaa soo dhammaaday qormadan waxaan kaga tagaya fikradaada..!
