09/08/2025
Cisbitaalka Gol-nugaal Guddiga Xaqiiqo Raadinta oo Cadeeyey Inuu Yahay Xarun Dawladeed.
"Guddiga madaxa-bannaan ee loo xilsaaray xaqiiqo raadinta Cisbitaalka Gol-nugaal ayaa baaritaan kadib soo saaray 12 qodob oo ay uga marag kaceen kaalinta weyn ee Wasaaradda Caafimaadku ka qaadatay jiritaanka iyo shaqo socodsiinta xarunta.
Baaristu waxay muujisay in Sebteembar 2023 ay Wasaaraddu si rasmi ah u la wareegtay maamulka cisbitaalka, iyadoo heshiis lagu saxiixay in xarunta lagu maamulo nidaamka dawladnimada, laguna daro mashruuca Damal Caafimaad. Taas ayaa suurto gelisay in dowladda ay xarunta ka hirgeliso adeegyo caafimaad oo aan laga fulin karin goob aan dawli ahayn.
Tan iyo maalinta heshiiska la saxiixay, Wasaaraddu waxay bil kasta bixisaa $18,400 mushaharka shaqaalaha iyo $1,500 adeegyo kale. Sidoo kale, waxaa la fuliyey dayactir iyo Dhismo ballaaran oo qeybaha qalliinka, dhalmada, iyo kaydka ah, iyadoo ku baxay in ka badan $130,000
Caddaymaha kale ee guddigu soo bandhigay waxaa ka mid ah:
Fududeynta bixinta daawooyinka iyo adeegyada kale ee cisbitaalka.
Ku wareejinta xarunta gaari ambalaas oo leh taariko GD 1412, taas oo ka tirsan hanti-dawladda.
Tababar joogto ah oo shaqaalaha ka helaan Wasaaradda.
Shaqaalaha oo si toos ah uga amar qaata Wasaaradda, fasaxyaduna ay ka yimaadaan halkaas.
Gunaanad:
Guddigu wuxuu caddeeyey in Cisbitaalka Gol-nugaal yahay xarun dawli ah, laguna wareejiyey si sharci ah, isla markaana lagu maamulo siyaasadda Wasaaradda Caafimaadka, uusan ahayn goob gaar loo leeyahay."
