20/09/2026
Afhayeenka Madaxweynaha Jamhuuriyadda Somaliland, Mudane Xuseen Aadan Cige Dayr, ayaa sheegay in Madaxweyne Cabdiraxmaan Maxamed Cabdillaahi Cirro iyo weftiga sare ee uu hoggaaminayo ay si qorshaysan u sii wadaan hawlaha iyo kulammada diblomaasiyadeed ee uga socda magaalada Washington, D.C. ee caasimadda Maraykanka.
Afhayeenka ayaa tilmaamay in Madaxweynaha iyo weftigiisu ay Somaliland codkeeda, waxqabadkeeda, himilooyinkeeda iyo muhiimaddeeda istiraatiijiyadeed si toos ah ugu gudbinayaan xarumaha iyo goobaha ay ka dhacayaan doodaha iyo go’aan-qaadashooyinka la xidhiidha siyaasadda arrimaha dibadda ee Maraykanka iyo nidaamka caalamiga ah.
Qoraal Afhayeenku ku baahiyey bartiisa X oo ay soo xigatay Wakaaladda wararka Somaliland ee SOLNA Waxa uu ku sheegay in ujeeddada dadaalladan diblomaasiyadeed ay salka ku hayso in qaddiyada Somaliland la gaadhsiiyo meel ka fog xarumaha lagu gorfeeyo arrimaha saamaynta ku leh mustaqbalka gobolka iyo kan caalamka.
Afhayeenka Madaxweynaha ayaa sidoo kale xusay in joogitaanka Madaxweyne Cirro iyo weftigiisa ee Washington uu fursad u siinayo Somaliland inay si dhow ula falgasho dhinacyada siyaasadeed iyo hay’adaha saamaynta ku leh dejinta siyaasadda Maraykanka, gaar ahaan arrimaha khuseeya Geeska Afrika, amniga gobolka iyo xasilloonida Badda Cas.
Afhayeenka Madaxweynaha ayaa intaas ku daray in dadaallada socda ay yihiin diblomaasiyad ujeeddo leh, oo Somaliland ku xaqiijinayso in codkeeda si toos ah looga maqlo goobaha ugu muhiimsan ee lagu qaabeeyo go’aannada istiraatiijiga ah ee saamaynaya gobolka iyo nidaamka caalamiga ah.
