03/06/2026
Maxaa Kasoo Baxay Shirkii Golaha Wasiirada Somaliland ee maanta.
𝐖𝐀𝐑 𝐒𝐀𝐗𝐀𝐀𝐅𝐀𝐃𝐄𝐄𝐃
Fadhigii 64-aad ee Shirka Golaha Wasiirrada Jamhuuriyadda Somaliland oo uu shir-guddoominayey Madaxweynaha JSL, Mudane Cabdiraxmaan Maxamed Cabdillaahi (Cirro) ayaa ka qabsoomay Qasriga Madaxtooyada JSL.
Qodobbada lagaga wada hadlay Fadhiga 64-aad ee Shirka Golaha Wasiirrada Jammhuuriyadda Somaliland waxa ka mid ahaa:
𝟏) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐟𝐢𝐢𝐬𝐤𝐚 𝐔𝐧𝐮𝐠𝐠𝐚 𝐖𝐚𝐱-𝐪𝐚𝐛𝐚𝐝𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 (𝐏𝐫𝐞𝐬𝐢𝐝𝐞𝐧𝐭𝐢𝐚𝐥 𝐃𝐞𝐥𝐢𝐯𝐞𝐫𝐲 𝐔𝐧𝐢𝐭-𝐏𝐃𝐔):
Waxa Golaha warbixin wadajir ah ka siiyey Wasiirka Madaxtooyada JSL, Mudane Khadar Xuseen Cabdi iyo Madaxa Unugga Wax-qabadka Madaxweynaha (Head of Presidential Delivery Unit (PDU) Mudane Dr. Axmed Maxamed Muse, iyaga oo faahfaahiyey in Xafiiskani uu yahay mid farsamo oo shaqadiisu tahay isku dubbaridka, qiimaynta iyo hubinta hirgelinta ballanqaadyada Madaxweynaha iyo qorshayaasha mudnaanta u leh Xukuumadda Wadajir iyo Waxqabad. Waxa ay sheegeen in ujeedooyinka ugu muhiimsan ee loo aasaasay Unugga Wax-qabadka Madaxweynaha (PDU) ay ka mid yihiin:
1. Taageeridda iyo dardargelinta fulinta mudnaanta Madaxweynaha.
2. La socodka iyo cabbiridda horumarka laga gaadhayo mudnaanta Madaxweynaha.
3. Xoojinta isku-duwidda iyo wada-shaqaynta Hay’adaha Xukuumadda ee fulinaya mudnaanta Madaxweynaha.
4. Siinta hay’adaha dowladda taageerada farsamo ee ay u baahan yihiin si ay si hufan ugu fuliyaan mudnaanta Madaxweynaha.
5. Ururinta, falanqaynta iyo maaraynta xogta la xidhiidha mudnaanta Madaxweynaha.
6. U gudbinta Madaxweynaha warbixino joogto ah oo ku saabsan heerka fulinta, caqabadaha jira iyo horumarka laga gaadhay mudnaanta Madaxweynaha.
𝟐) 𝐗𝐚𝐚𝐥𝐚𝐝𝐝𝐚 𝐆𝐮𝐮𝐝 𝐞𝐞 𝐀𝐦𝐧𝐢𝐠𝐚 𝐃𝐚𝐥𝐤𝐚:
Wasiirka Wasaaradda Arrimaha Gudaha iyo Amniga Qaranka JSL Mudane Cabdalle Maxamed Carab ayaa Golaha Wasiirrada la wadaagay warbixin la xidhiidha xaaladda guud ee amniga dalka, isaga oo xusay in guud ahaan ammaanka dalku uu sugan yahay, isla markaana aanay jirin wax qalalaase ama xasilooni darro ah.
𝟑) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐃𝐡𝐚𝐪𝐚𝐚𝐥𝐚𝐡𝐚 𝐃𝐚𝐥𝐤𝐚 𝐢𝐲𝐨 𝐂𝐚𝐬𝐡𝐮𝐮𝐫𝐚𝐡𝐚 𝐆𝐒𝐓:
Wasiiru-Dawlaha Wasaaradda Maaliyadda iyo Horumarinta Dhaqaalaha JSL, Mudane Ismaaciil Mawliid Cabdilaahi ayaa Golaha Wasiirrada uga xog-warramay saamaynta uu dagaalka Bariga Dhexe ku yeeshay dakhliga Qaranka uga soo xerooda Cashuuraha Kastamada, maadaama uu hoos-u-dhac ku yimid dhaqdhaqaaqa ganacsiga, isu-socodka badeecadaha dunida, kor u kaca qiimaha shidaalka iyo Caymiska Gaadiidka Badda.
Dhinaca kale, Wasiiru-Dawluhu waxa uu Golaha la wadaagay Qorshaha Wasaaradda ee lagu daraasadaynayo suuqyo kale oo ganacsi iyo ilo dakhli oo la isku hallayn karo. Wasiirku waxa uu sheegay in ay Wasaaraddu ku hawllan tahay dib-u-habayn weyn oo lagu samayn doono Cashuuraha Badeecadaha iyo Adeegyada (GST) iyo weliba sal-ballaadhinta cashuurtan iyada ah, si loo xoojiyo dakhliga gudaha, loo kobciyo hufnaanta nidaamka cashuuraha, loona xaqiijiyo danaha bulshada iyo horumarka dhaqaalaha Qaranka.
𝟒) 𝐖𝐚𝐫𝐛𝐢𝐱𝐢𝐧𝐭𝐚 𝐖𝐚𝐬𝐚𝐚𝐫𝐚𝐝𝐝𝐚 𝐀𝐫𝐫𝐢𝐦𝐚𝐡𝐚 𝐃𝐢𝐛𝐞𝐝𝐝𝐚 𝐢𝐲𝐨 𝐈𝐬𝐤𝐚𝐚𝐬𝐡𝐢𝐠𝐚 𝐂𝐚𝐚𝐥𝐚𝐦𝐢𝐠𝐚:
Wasiirka Wasaaradda Arrimaha Dibedda iyo Iskaashiga Caalamiga ah ee JSL, Mudane Cabdiraxmaan Daahir Adam Bakaal ayaa Golaha Wasiirrada warbixin ka siiyey hab-sami-u-socodka iyo dadaalladii ugu dambeeyey ee Qaranka Somaliland ee la xidhiidha Aqoonsi Raadiska iyo xoojinta xidhiidhada diblomaasiyadeed.
Wasiirku waxa uu Golaha la wadaagay horumarka laga sameeyey kor u qaadista muuqaalka iyo doorka Somaliland ee fagaarayaasha caalamka, ballaadhinta xidhiidhada saaxiibtinimo iyo guulaha laga gaadhay xoojinta wada-shaqaynta caalamiga ah ee danaha Qaranka Somaliland.
Wasiirku waxa uu Golaha la wadaagay in Kongareska Maraykanku ay haatan Somaliland u aqoonsadeen dal leh muhiimad istiraatiiji ah oo la xidhiidha amniga Badda Cas, la-dagaallanka argagixisada iyo xasilloonida gobolka.
Wasiirku waxa uu hoosta ka xarriiqay in wada-shaqayn
firfircoon oo dhex marta Somaliland iyo Maraykanka ay tahay hannaan abuuraya fursado iskaashi, gaar ahaan dhinacyada amniga, diblomaasiyadda, kaabeyaasha dhaqaalaha, ganacsiga iyo maalgashiga.
𝟓) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐧𝐮𝐮𝐧𝐧𝐚𝐝𝐚 𝐗𝐮𝐦𝐦𝐚𝐝𝐝𝐚 𝐢𝐲𝐨 𝐗𝐚𝐚𝐥𝐚𝐝𝐝𝐚 𝐠𝐮𝐮𝐝 𝐞𝐞 𝐂𝐚𝐚𝐟𝐢𝐦𝐚𝐚𝐝𝐤𝐚 𝐃𝐚𝐥𝐤𝐚:
Wasiirka Wasaaradda Horumarinta Caafimaadka JSL, Mudane Dr. Xuseen Bashiir Xirsi ayaa Golaha Wasiirrada warbixin ka siiyey xanuunnada xummadda kaneecada ee Dengue Fever iyo Chikungunya oo saameeyey shan gobol oo ka mid ah dalka. Wasiirku waxa uu Golaha uga warramay calaamadaha lagu garto xanuunnadan, kuwaas oo ay ka mid yihiin xummad sare, madax-xanuun, xanuunka kala-goysyada jidhka, matag iyo daal badan.
Sidoo kale, Wasiirku waxa uu Golaha la wadaagay tallaabooyinka degdegga ah ee ay Wasaaradda Caafimaadku qaaday, kuwaas oo ay ka mid yihiin hawlgelinta kooxaha gurmadka degdegga ah, buufin ballaadhan oo lagula dagaallamayo kaneecada, qaybinta maro-kaneecada iyo xoojinta wacyigelinta bulshada. Waxa kale oo uu sheegay in Wasaaraddu ay magacawday Guddi Heer Qaran iyo Guddi Farsamo oo u xilsaaran diyaar-garowga, ka hortagga iyo isku-dubbaridka dedaallada lagula tacaalayo xanuunnadan.
𝟔) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐃𝐡𝐨𝐨𝐟𝐤𝐚 𝐗𝐨𝐨𝐥𝐚𝐡𝐚:
Wasiir-ku-xigeenka Wasaaradda Xannaanada Xoolaha iyo Horumarinta Reer Miyiga JSL, Mudane Cali Axmed Cabdi (Cali-Cantar) ayaa Golaha Wasiirrada warbixin ka siiyey xaaladda dhoofka xoolaha dalka. Wasiirku waxa uu Golaha la wadaagay heerka dhoofka xoolaha sannadkan ee suuqyada dibedda, gaar ahaan Mooshinkii Xajka, xaaladda caafimaadka xoolaha iyo dedaallada ay Wasaaraddu ku xoojinayso tayada nolosha xoolaha iyo tartanka suuqyada xoolaha.
Sidoo kale, Wasiirku waxa uu tilmaamay in Wasaaraddu sii waddo adkaynta adeegyada caafimaadka xoolaha, kor u qaadista kormeerka iyo fulinta shuruudaha suuqyada caalamiga ah si loo ilaaliyo loona kordhiyo dhoofka xoolaha oo laf-dhabar u ah dhaqaalaha Qaranka JSL. Wasiir-ku-xigeenku waxa uu carrabka ku adkeeyey in ay lama huraan tahay in Xoolaha aynu dhoofinno loo sameeyo Deked u gaar ah oo laga dhoofiyo.
𝟕) 𝐖𝐚𝐫𝐛𝐢𝐱𝐢𝐧𝐭𝐚 𝐗𝐚𝐚𝐥𝐚𝐝𝐝𝐚 𝐊𝐨𝐫𝐨𝐧𝐭𝐚𝐝𝐚 𝐃𝐚𝐥𝐤𝐚:
Wasiirka Wasaaradda Tamarta iyo Macdanta JSL, Mudane Axmed Jaamac Barre ayaa Golaha Wasiirrada uga xog-warramay kor u kaca qiimaha shidaalka iyo saamaynta uu ku yeeshay kharashka korontada. Wasiirku waxa uu Golaha la wadaagay dedaallada ay Xukuumaddu ku yaraynayso culayska bulshada, oo ay ka mid tahay kabka la siiyo Shirkadaha soo dejiya Shidaalka si looga hortago in korodhka qiimuhu uu si toos ah ugu dhaco adeegga korontada.
Dhinaca kale, Wasiirku waxa uu Shirkadaha Korontada uga digay kordhinta qiimaha korontada ee bulshada, isla markaana waa in ay u hoggaansamaan heshiisyada iyo waajibaadka ay la leeyihiin Xukuumadda.
𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇
𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫),
𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝
