17/07/2025
14 july 1974: Haji Abdi passed away:
Maanta waxa ay ku beegan tahay: [ 51] sanno ka hor geeridii AHN Xaaji Cabdi Ayuub ( aabbihii saxaafadda Soomaalida). Xaaji Cabdi Ducaale; waxa uu maantoo kale ku geeriyooday Cusbitaalka Hargeysa 14 july 1974.
"Geel horweyn ah oo sumadda caynkaasa leh ayaa maanta ka cabbay ceelka Hargeysa, waxaanu u fulay koonfur iyo carro Ciidagale." – AHN Xaaji Cabdi.
Xalay ayaan akhriyay maqaallo teelteel ah oo Af Ingiriisi iyo Soomaali ku qoran oo BBC-du ka qortay taariikhdii Xaaji Cabdi Ayuub, markii uu geeriyooday 1974. Runtii waxaan odhan karaa haddii maqaaladaas la habeeyo oo si fiican loo soo turjumo waxay noqon karaan buug dhan oo taariikhdiisii ah!
Xaaji Cabdi, waxa lagu xusuustaa:
1• Wuxuu ahaa Xaaji Cabdi shakhsigii ugu horreeyay ee ka hadla Radio Hargeysa markii la furay 1942! Waxa isna ku xigay AHN Xaaji Muuse Galaal iyo Yuusuf Xaaji Aaden Qabille, halka ninkii u gu horreeyay ee Kaban 'music' ka tumaana ahaa fannaankii carabka ahaa ee ( Gu' roon jire), oo abwaan Huryo ahaa inaabtigii ruma.
2• Wuxuu ahaa Xaajigu shakhsigii u gu horreeyay ee codkiisa lagu furay ( BBC laanta Afsoomaaliga, 1957 ).
3• Wuxuu ahaa ninkii u gu horreeyay ee saxafi Soomaaliyeed ah ee boqrtooyada Ingiriiska lagu casuumay, markii uu geeriyoodayna ay siiyeen xaqiisii iyo hanti faro badan and He had a BEM ( British Embire Medal), bestowed to him by the Queen.
4• Wuxuu aqoon cajiiba u lahaa Af Soomaaliga oo waagaas u akhrin jiray 'hab taqliidi ah' oo soo jiidasho leh, sidoo kale afka Ingiriisiga turjumaaddiisa ayuu si fiican u soo Afguurin jiray.
5• Wuxuu ahaa ninka keli ah ee Radio Hargeysa iyo BBC-da furi jiray ee bakhtiin jiray xilliguu doono.
6• Wuxuu ahaa ninka keliya ee shaqaalaha Radio Hargeysa (abwaan, Fannaan, saxafi, farsamoyaqaan) isagu qori jiray shaqada oo ingiriisku u xilsaaray.
7• Xaaji Cabdi; wuxuu qayb wayn ku lahaa aasaaskii Fanka Soomaalida. Isaga iyo Yuusuf Xaaji Aden; waxay ahaayeen labada nin ee hablihii heesi jiray xorriyadda ka hor ka beddeli jiray magacyada si aan reerahoodu u soo haybsan, maadaama waqtigaa fanka wax xun laga aaminsanaa. Xaajigu Guduuda Carwo iyo fanaanaddada Shankaroon oo uu "Sagal" u bixiyay 1972 baan xusuusnahay.
8• Xaaji Cabdi; waxa uu geeriyooday isagoo Soomaalidu u aqoonsan tahay (Aabbihii saxaafadda Soomaaliyeed 14 july 1974 ). Guddoomiyaha golaha guurtida SL Saleebaan Maxamuud; ayaa ahaa ninkii u gu horreeyay ee buuggiisa jaamacadda ka diyaariy xaaji Cabdi: "Gather Round The Speakers" (A History Of The Firs Querter Century Of Somali Broadcasting 1941– 1965 ). Waxa uu Xaajigu shaqada idaacadda ka hawlgabay 1966kii.
9• Wuxuu ku daray afka Soomaaliga erey bixinno cajiiba oo illaa hadda warbaahinta Soomaalidu adeegsato iyagoon aqoon u lahayn halkii ay ka timi!
10• Waxa uu soo saaray raggii ugu magaca waynaa jiilkii waagaas ee saxaafadda Soomaalida: Mustafe Xaaji Nuur, Maxamed Xaashi, Axmed Faarax Kahin, Cismaan Faarax Kaahin, Cabdiraxiim Caabbi, Yaasiin X Ismaaciil Jirde, Ibraahim Meygaag Samatar... IQB, halka qaarkoodna ay soo wada shaqeeyeen.
FG: waxaan saxaafadda Soomaalida ka codsan lahaa gaar ahaan ta SL maadaama ay maanta ku beegan tahay geeridii (aabbihii saxaafadda Soomaalida) in ay xusaan Xaaji Cabdi Ayuub. Taariikhdiisa lama soo koobi karo.
Alle ha janneeyo Xaaji Cabdi Ducaale ( 1915 — 1974).
Diyaarintii: Barkhad Ciise Odowaa
