31/08/2026
Wasiirka Gaashaandhigga iyo Taliyaha Ciidanka Qaranka oo ku dhawaaqay in la fulinayo mushahar kordhintii Ciidanka Qaranka
Wasiirka Wasaaradda Gaashaandhigga Jamhuuriyadda Somaliland, Mudane Maxamed Yuusuf Cali iyo Taliyaha Ciidanka Qaranka, Sareeye Guuto Nimcaan Yuusuf Gaaxnuug, ayaa maanta jiiddaha h**e ee Ciidanka Qaranka ee Oog kulamo kula la yeeshay Saraakiil sarsare oo ka tirsan Ciidanka Qaranka.
Kulankan oo ujeeddadiisu ahayd is-xog-waraysi iyo dhegaysiga baahiyaha ciidanka, ayaa lagu falanqeeyay xaaladda askarta iyo sidii xal waara loogu heli lahaa arrimaha ay soo bandhigeen.
Masuuliyiinta ayaa si qoto dheer u dhegaystay qodobada ay ciidanku soo jeediyeen, iyagoo muujiyay in tixgelin weyn la siinayo daryeelka askariga iyo guud ahaanba Ciidanka Qaranka.
Wasiirka iyo Taliyaha ayaa markii uu kulanku soo dhammaaday waxay ciidanka ku bogaadiyeen kaalinta aan la beddeli karin ee ay ugu jiraan dalka, gaar ahaan ilaalinta qarannimada, nabadgelyada shacabka iyo difaaca xuduudaha Jamhuuriyadda Somaliland.
Masuuliyiinta ayaa ciidamada ugu bushaareeyey in qorshaha horumarinta ciidanka lagu daray korodhka mushaharka, kaas oo si rasmi ah u dhaqan-geli doona laga bilaabo bisha January ee sannadka 2027. Tallaabadan ayaa qayb ka ah qorshaha fog ee lagu tayaynayo nolosha iyo qalabka Ciidanka Qaranka, waxaana la balan qaaday in kordhinta mushahar kooda boqolkii konton loo kordhin doono 2027.
Ugu dambayn, Wasiirka iyo Taliyuhu waxay ciidamada fareen inay dhowraan anshaxa, midnimada iyo kala dambaynta ciidannimo, islamarkaana wixii dareen ama tabasho ah ee jira lagu waafajiyo anshaxa ciidaminnimo, ilaalinta kala dambaynta iyo nidaamka Ciidanka Qaranka, iyadoo tabashooyinka lagu gudbinayo habraacyada rasmiga ah ee ciidaminnimo.
Kulankan ayaa hoosta ka xariiqaya sida ay Wasaaradda Gaashaandhigga iyo Taliska Guudba uga go’an tahay dhagaysiga iyo daryeelka naf-huraayaasha qaranka, si loo sii xoojiyo wada-shaqaynta dhex marta hoggaanka iyo askarta safka h**e.
Xafiis
