14/08/2025
Dibu habeyn shaqo oo ka socota Hay’adda Caymiska qaranka Jsl .
Hay’adda Caymiska Qaranka JSL oo Qabatay Kulan Hawleed ku Saabsan Dib-u-habeynta Qaab-dhismeedka, Shaqada iyo Shaqaalaha Hay’adda, iyo Mideynta Shaqooyinka Qaranka ee dhammaan goboladda dalka.
Hargeysa – Maanta oo ay taariikhdu tahay 14-ka August 2025, waxaa magaalada Hargeysa ka qabsoomay kulan hawleed muhiim ah oo ay isugu yimaadeen dhammaan shaqaalaha Hay’adda Caymiska Qaranka (HCQ) ee ka kala socday xarunta dhexe iyo gobollada dalka.
Kulanka waxaa si rasmi ah u furay masuuliyiinta sare ee HCQ, oo u ugu horeeyo Guddoomiyaha HCQ Mudane: Axmed Xirsi Ducaale, Guddoomiye-ku-xigeenka HCQ Mudane Cabdirashiid Saleebaan Maxamed, iyo Agaasimaha Guud HCQ Mudane Cabdisalaan M. Maxamuud.
Ujeeddada kulanka ayaa ahayd in lagu falanqeeyo geeddi-socodka qorshaha dib-u-habeynta qaab-dhismeedka, shaqada iyo shaqaalaha Hay’adda Caymiska Qaranka, iyo kor-u-qaadista, dardargelinta, iyo mideynta shaqooyinka hay’adda.
Agaasimaha Guud ee HCQ, Mudane Cabdisalaan M. Maxamuud, ayaa soo bandhigay qorshaha istiraatiijiga ah ee dib-u-habeynta qaab-dhismeedka iyo shaqooyinka hay’adda, isagoo sharaxaad ka bixiyey hababka lagu mideyn karo hawlaha iyo qorshayaasha shaqo ee xarunta dhexe iyo gobollada, iyo sida ay uga qayb qaadan karto horumarinta adeegyada caymiska qaranka.
Isu-duweyaasha gobollada ayaa sidoo kale soo jeediyey warbixino faahfaahsan oo ku saabsan heerka shaqo ee gobolladooda, guulaha la gaaray, caqabadaha jira, iyo xalalka la hirgelin karo.
Sidoo kale, kulanka waxa qayb ka ahaa tababar xirfadeed oo shaqaalaha gobollada lagu siiyey aqoon ku saabsan:
1. Qaababka Kormeerista iyo Dabagalka Shirkadaha Caymiska.
2. Habka Liisan Bixinta iyo Fahamka Caymiska.
3. Qorshayaasha Siyaasadaha Caymiska iyo Xeerarka.
4. Fahanka Xeerarka Shaqaalaha Dawladda.
5. Maamulka Maaliyadda iyo Shuruucda Hoos yimaada.
Ugu dambeyntii, shaqaalaha Goboladda ayaa lagu guddoonsiiyey shahaadooyin, taas oo ka tarjumaysa dadaalka HCQ ee ku aaddan horumarinta xirfadaha shaqaalaheeda.
Hay’adda Caymiska Qaranka waxay mar walba ka go’an in ay si dhow ula shaqeyso dhammaan qaybaha ay ka kooban tahay, iyadoo mudnaanta siinaysa tayeynta iyo horumarinta xirfadaha shaqaalaha si loo gaadho ujeeddooyinka qaran ee bulshada loogu adeego.
Warbaahinta hay’adda Caymiska qaranka .
