22/08/2026
Somaliland, shidaalka ayaa galay xaalad walaac leh, halka litter ee Patrol-ka ah ayaa meelaha qaar maraya ilaa 16,000 oo SLSH, halka kaalmaha qaarkood ay haawanayaan shidaal la'aan darteed, magaalada Hargeisa. Korodhka qiimaha shidaalku wuxuu si toos ah u saameeyay gaadiidka, ganacsiga iyo badi nolol-maalmeedka bulshada, maadaama oo uu shidaalku yahay laf-dhabarta adeegyo badan oo dhaqaaluhu ku tiirsan yahay.
Xaaladdani waxay soo noolaynaysay hadallo ay h**e u jeediyeen mas'uuliyiin maanta xilal ka haya xukuumadda madaxweyne Cirro, xilligii ay mucaaridka ahaayeen.
Muuqaalkan hoose waa afar sanno ka hor 23 June 2022-kii, markaas oo Sadiiq Dhamme, oo hadda haya mas'uuliyadda Keyd Haamaha Shidaalka Somaliland, oo markaa ahaa xoghayaha arrimaha bulshada ee Waddani, uu si adag uga hadlayey qiimaha shidaalka oo xilligaas marayey ku dhowaad 12,000 SLSH halka litter ee Patrol-ka ahi, isaga oo ku tilmaamey qiimahaas mid aan loo dulqaadan karin. Wuxu ku goodiyey amintaas in shidaal yaraanta iyo qiimaha sare ee lagu iibinayaa uu khal-khal galin karo amniga iyo maamulka dowladda, xilligaas oo xisbiga Kulmiye iyo madaxweyne Biixi ay hoggaanka dalka hayeen.
Maanta, qiimaha litter-ka patrol-ka ahi wuxuu marayaa 16,000 oo SLSH ah, taas oo ka dhigan inuu kordhey boqolkiiba 33.3%, marka la eego qiimaha wakhtigaa uu ahaa iyo halka uu hadda marayo.
Waxa kasoo wareegtay 1 sanno, 7 bilood iyo 4 maalmood, maalintii uu xilka la wareegay Sadiiq Dhamme Maareeyaha Keydka Haamaha Shidaalka Somaliland, taas oo ahayd 18 January 2025-kii. Muddadaas ka dib waxa sare u kac xoogan ku yimid qiimaha shidaalka, weli kamuu hadal xaaladda sii cakirmeysa, wax tallaabo oo xakame u noqday qiimaha cirka isku shareerayna may qaadin Sadiiq Dhamme iyo xukuumadiisu.
Go'aamo ay h**e usoo saartay xukuumadda Cirro, inkastoo uu shirkaas kasoo muuqday Sadiiq Dhamme oo Isha Camera-rada ka dhuumanayey mararka qaar dhaliilihiisa badnaa iyo waxqabad la'aantiisa awgeed, waxba k**a fulin amaradaas oo ganacsatada shidaalku subixii danbe ba ganafka ayay ku dhufatay. Xilligaas oo ahayd bishii March ee sannadkan xukuumaddu waxay go'aamisay in halka litter ee Patrol-ka ah lagu iibiyo 12,500 oo SLSH, balse go'aankaas waxa buriyey ganacsatada Shidaalka oo hal bacaad kagu lisay ka dhigey, iyagoon wax tallaabo ah laga qaadin.
Shidaalku ma aha badeecad caadi ah, balse waa waa qiime go'aamiye ay ku xidhan yihiin gaadiidka, badeecadaha iyo adeegyada kale. Sidaas darteed, marka shidaalku kaco, culeysku wuxuu si toos ah ugu dhacayaa jeebka shacabka, sidaas darteed amusnaanta Dhammihii dhaliilaha badnaa iyo go'aan qaadasho la'aanta ay weheliso fulin la'aanta xukuumaddu waxay muujinayaan maanta oo u muuqaal eeg shalay.
Su'aalaha maanta taagan waxa ka mid ah, Sadiiq Dhamme iyo xukuumaddii shalay qiimaha 12,000 SLSH ku tilmaami jirtay mid aan loo dulqaadan karin, maxay qabanayaan maanta oo uu marayo 16,000 SLSH?
