SOLJA - Somaliland Journalists Association

01/10/2026

"iyadoo marka horeba loo xidhay qaab sharciyadda ka baxsan, haddana waxaanu rajaynaynaa in cadaali halkaa ay ka soo baxdo" Guddoomiyaha SOLJA oo ka hadlay Kiiska Wariye Cabdiqani Baylood oo saaka Maxkamadda la hor keenay.

29/09/2026

Ururka Suxufiyiinta Somaliland ee SOLJA waxa uu Suxufiyiinta Somaliland la wadaagayaa tartan sheeko samayn ah oo ay ku heli doonaan abaal marin lacageed.
Suxufiyiinta Somaliland waxa lagu war-galinayaa inay ka qayb galaan oo ay sameeyaan sheeko wareedyo la xidhiidha mawduucyada:
1. Samaynta sheeko wareed saamayn leh oo ku saabsan is beddelka cimilada iyo saamaynta ka dhalata sida masiibooyinka dabiiciga ah.
2. Saamaynta ay masiibooyinka dabiiciga iyo kuwa dad sameega ahiba ay ku yeeshaan haweenka iyo dhibaatooyinka ay ka dhaxlaan, sida dhibaatooyinka soo gaadha noloshooda iyo ganacsigooda.
Suxufiyiinta ku tartama labada mawduuc ee sare ku xusan waxa la siin doonaa abaal marin ay ku guulaysan doonaan 10 wariye, hadaba wariye si aad uga qayb gasho fadlan faah faahinta ka eeg lifaaqa hoose.

https://soljaorg.com/?p=4672

27/09/2026

27/09/2026

Ururka Suxufiyiinta Somaliland ee SOLJA ayaa Warbaahinta gobolka Gabiley u qabtay kulan muhiim ah oo ku saabsan doorka warbaahinta ee wacyigelinta bulshada gaar ahaan saamaynta isbedalka cimilada.
kulanka ayaa ahaa mid aqoon is waydaarsi iyo wada-tashi ah kaasi oo diirada lagu saarayey sidii bulshada looga wacyigelin lahaa saamaynta ka dhalan karta is badalka cimilada, sida abaaraha, duufaanada, fatahaadaha iyo u-diyaargarowga musiibooyinka dabiiciga ah.
Kulanku wuxuu diiradda saaray xoojinta wacyigelinta bulshada iyo doorka warbaahinta ee maaraynta khataraha musiibooyinka dabiiciga ah.

27/09/2026

Ururka Saxafiyiinta Somaliland (SOLJA) waxa uu soo dhaweynayaa in xorriyadoodii ay dib u heleen labada wariye ee kala ah Maxamed Cabdi Qalinle iyo Cabdiqaadir Ismaaciil Foodhaadhi, oo ka hawlgala KF Media, kuwaas oo shalay galab lagu xidhay magaalada Hargeysa xilli ay gudanayeen waajibaadkooda shaqo ee saxaafadeed.

Ururka SOLJA waxa uu si gaar ah ugu mahadcelinayaa Taliyaha Ciidanka Booliska Somaliland, kaalinta uu ka qaatay fududaynta iyo xaqiijinta in labada wariye dib loogu soo celiyo xorriyaddooda.

Ururku waxa kale oo uu uga mahadcelinayaa cid kasta oo gacan ka geysatay dadaalladii lagu xaqiijiyey sii-daynta labada wariye.

SOLJA waxay tixgalinaysaa muhiimadda ay leedahay wada-shaqaynta hay’adaha amniga iyo ururka saxaafadda, si loo ilaaliyo xorriyadda saxaafadda, loona xaqiijiyo in suxufiyiintu si xor ah oo nabadgelyo leh u gutaan waajibaadkooda shaqo.

26/09/2026

Ururka Suxufiyiinta Somaliland ee SOLJA waxa uu walaac xooggan ka muujinayaa xadhigga sii kordhaya ee loo geysanayo suxufiyiinta Somaliland.

Galabta magaalada Hargeysa waxa lagu xidhay laba wariye oo kala ah Wariye Maxamed Cabdi Qalinle iyo Wariye Cabdiqaadir Ismaaciil Foodhaadhi, oo labaduba ka hawlgala KF Media.

Suxufiyiinta ayaa la sheegay in laga soo qabtay iyaga oo ka warbixinaya Kulanka Islaamka ee ka socday duleedka bari ee magaalada Hargeysa.

Ururka SOLJA waxa uu walaac ka muujinayaa xadhigga suxufiyiintan, iyada oo uu weli xabsiga ku jiro Wariye Cabdiqani Baylood, kaas oo maanta ku jira maalintii 29-aad ee xadhigiisa.

Ururka SOLJA waxa uu laamaha ammaanka ugu baaqayaa in si degdeg ah xorriyaddooda loogu soo celiyo suxufiyiinta xidhan, isla markaana la ixtiraamo xorriyadda saxaafadda ee uu damaanad qaadayo Dastuurka Jamhuuriyadda Somaliland.

24/09/2026

SOLJA oo Cambaareysay Xadhiga Wariye Sakariye Siciid Bulaale

Ururka Saxafiyiinta Somaliland (SOLJA) waxa uu walaac ka muujinayaa, isla markaana cambaareynayaa xadhiga Ciidanka Booliska Gobolka Saraar ay magaalada Caynaba ugu geysteen Wariye Sakariye Siciid Bulaale, oo ahaa Wakiilka Warbaahinta Sahan TV ee gobolka.

Ciidanka Booliska Caynaba ayaa Wariye Sakariye Siciid Bulaale xabsiga u taxaabay. Xogta uu ururku helayo ayaa tilmaamaysa in xadhigiisu la xidhiidho warar uu wariyuhu baahiyey oo ku saabsanaa arrimo la xidhiidha Wasaaradda Waxbarashada.

Ururka SOLJA waxa uu ogaaday in xadhiga wariye Sakariye uu amray Isuduwaha Wasaaradda Waxbarashada ee Gobolka Saraar.

SOLJA waxa ay xasuusinaysaa dhammaan hay’adaha ay khusayso in saxafiyiintu xaq u leeyihiin inay gutaan waajibaadkooda shaqo, isla markaana ay baahiyaan wararka iyo xogaha la xidhiidha danaha guud, iyadoo la dhowrayo shuruucda iyo anshaxa saxaafadda.

21/09/2026

Wariye Cabdiqani waxa uu xidhan yahay maalintii 24aad

21/09/2026

Maalinta Caalamiga ah ee Nabadda iyo Doorka Saxaafadda

Maalinta Caalamiga ah ee Nabadda ayaa sannad kasta la xusaa 21-ka Sebtembar, iyadoo dunidu xoogga saarto muhiimadda nabadda, wada noolaanshaha iyo xalinta khilaafaadka si nabad ah.

Ilaalinta badqabka wariyaasha ayaa iyaduna door muhiim ah ka qaadata habsami-u-socodka nabadda, maadaama wariyuhu yahay qofka bulshada gaadhsiiya xogta, xaqiiqooyinka iyo dhacdooyinka saameeya noloshooda.

Saxaafaddu waxay door muhiim ah ka qaadan kartaa xoojinta nabadda, gaar ahaan xilliyada ay jiraan khilaafaadyo iyo xiisado bulsho. Wariyayaashu waxay masuuliyad ka saaran tahay inay gudbiyaan xog sax ah, dhexdhexaad ah oo la hubiyey, kana fogaadaan wararka iyo hadallada sii hurin kara colaadda.

Saxaafadda Somaliland waxay qayb muhiim ah ka noqon kartaa dadaallada nabadda iyadoo dhiirrigelinaysa wada hadalka, is-fahamka iyo xalinta khilaafaadka, isla markaana siinaysa bulshada xog lagu kalsoonaan karo.

Sidaa darteed, badqabka iyo xorriyadda wariyayaasha iyo helitaanka xogta saxda ahi waa tiirar muhiim u ah saxaafad si wax-ku-ool ah uga qayb qaadata nabadda iyo wada noolaanshaha bulshada.

20/09/2026

Hoggaanka Ururka Saxaafadda Somaliland (SOLJA) ayaa kulan muhiim ah la qaatay Maamulka Mac’hadka Shaqaalaha Dawladda (CSI), kaas oo diiradda lagu saaray xoojinta wada-shaqaynta labada dhinac iyo horumarinta aqoonta iyo xirfadaha saxaafadda dalka.
Agaasimaha Mac’hadka, Maxamuud Siciid Cadaad, iyo ku-xigeenka Agaasimaha, Cabdiqaadir Kaamil Ibraahim, ayaa muujiyey sida ay uga go’an tahay inay kaalin mug leh ka qaataan kobcinta iyo tayeynta aqoonta suxufiyiinta Somaliland. Mac’hadka oo si dhaw ula shaqeeya Ururka SOLJA ayaa door muuqda ka qaatay horumarinta aqoonta iyo xirfadaha warbaahinta, isagoo sannad walba fursado waxbarasho oo bilaash ah siiya qaar ka mid ah suxufiyiinta dalka.
Guddoomiyaha SOLJA, Axmed Khaalid Faarax, Xoghayaha, Muuna Ibraahim Dhakhtar, iyo Agaasimaha Ururka, Ismaaciil Axmed Ismaaciil, ayaa si wadajir ah ugu mahadnaqay Mac’hadka fursadaha waxbarasho ee uu siiyey weriyeyaasha iyo bahda warbaahinta. Dhankiisa, Agaasimaha Mac’hadka CSI ayaa ku bogaadiyey Ururka SOLJA doorka uu ka qaato tayeynta iyo horumarinta suxufiyiinta Somaliland.
Ururka SOLJA waxa uu Mac’hadka CSI uga mahadcelinayaa deeqda waxbarasho ee uu sannadkan siinayo qaar ka mid ah suxufiyiinta dalka, taas oo fursad u ah inay kor u qaadaan aqoontooda.
Dhanka kale, Ururka SOLJA waxa uu ugu baaqayaa suxufiyiinta danaynaya deeqdan waxbarasho inay ka faa’iidaystaan fursaddan oo ay codsiyadooda soo gudbiyaan ugu dambayn Arbacada, 23-ka September 2026, iyagoo codsiga ku soo hagaajinaya Xafiiska Ururka SOLJA ee Hargeysa.