24/10/2025
Shirka Isbuucalaha ee Golaha Fulinta Madasha Badbaadada Gobolka Banaadir oo Maanta lagu qabtay Magaalada Muqdisho
Magaalada Muqdisho Shir ku yeeshay qaar ka mid ah Xubnaha Golaha Fulinta ee Madasha Badbaadada Gobolka Banaadir.
Shirkaas ayaa waxaa looga hadlay arrimo dhowr ah oo ay ka mid yihiin:
1. Boobka iyo Barakicinta Joogtada ah ee lagu hayo Shacabka Soomaaliyeed ee ku nool Magaalada Muqdisho, taas oo ah fal xadgudub ku ah xuquuqda lahaanshaha Muwaadiniinta Soomaaliyeed.
2. Boobka Doorashada iyo Xaqiraadda Xuquuqda Doorasho ee uu Guddiga Doorashada lagu muransan yahay ku sameeyay degmooyinka Kaxda, Daarusalaam, Gubadley iyo Garasbaaley, taas oo dhaawaceyso mabaadi’da sinnaanta xuquuqda doorashada shacabka.
3. Diiwaan-galinta qasabka ah ee uu Maamulka Gobolka Banaadir ku haayo shaqaalaha gobolka iyo shacabka Soomaaliyeed ee adeegyo kala duwan u doonta xarumaha gobolka iyo degmooyinka, taas oo ka hor imaaneysa xorriyadda fikirka siyaasadeed muwaadinka.
4. Banaanbaxa Nabadeed ee ay si wadajir ah u qabanayaan Madasha Badbaadada Gobolka Banaadir iyo Madasha Samatabixinta Soomaaliyeed, kaas oo lagu muujinayo dareenka shacabka ee ku aaddan cadaaladda, xuquuqda iyo dimuqraadiyadda.
Ugu dambeyn, dood iyo falanqeyn dheer kadib, shirka ayaa ku soo dhammaaday is-afgarad iyo guul, iyadoo xubnaha Madasha ay ku heshiiyeen in la sii xoojiyo wadajirka, midnimada iyo u adeegidda danaha shacabka Gobolka Banaadir.
