https://www.facebook.com/120759764454656/

Usame Qiyasle, Usamahassan90@gmail. com, Mogadishu (2025)

20/06/2025

Dhallinyarada iyo Doorkooda Horumarinta Bulshada

Dhallinyaradu waa laf-dhabarta Ummad kasta, waxayna leeyihiin karti, tamar, iyo maskax curin kara isbeddel dhab ah. Soomaaliya, in ka badan kala bar bulshadeeda waa dhallinyaro, taasoo muujinaysa fursad dahabi ah oo lagu gaari karo horumar waara. Diinteennu waxay si gaar ah u xustay qiimaha waqtiga da’da yar, sida xadiiskii Nabiga uu ahaa:
“Shan ka faa’iideyso ka hor shan: dhalinyaranimadaada ka hor gawowgaaga...”
Tani waxay ina xasuusinaysaa in dhallinyarnimada ay tahay nimco weyn oo u baahan in laga faa’iidaysto.

Dhallinyarada: Tiirka Isbeddelka Bulshada

Dhallinyarada waxbaratay, wacyi leh, kuna qalabeysan hal-abuur iyo himilo, waa kuwa hormuud u noqon kara horumar kasta — hadday noqoto dhinaca dhaqaalaha, dhaqanka, bulshada, iyo fikradaha cusub ee xal u noqon kara caqabadaha taagan.

Dhallinyarada noocaas ah, marka la helo, waxay abuuraan bulsho togan, adeegyo casri ah, iyo hoggaan cusub oo daacad ah. Waa sida uu Nebigu (NNKH) ku tilmaamay dhallinyaradii u adeegay diinta — sida Muscab ibnu Cumayr, Usaama binu Zayd, iyo Cabdullaahi ibnu Cabaas — oo dhammaantood doorkooda laga dareemay xilli ay da’doodu yarayd.

Dhalinyarada Soomaaliyeed: Caqabadaha Dhaqaaleed, Bulsho iyo Maamul

Inkastoo ay jiraan fursado badan, haddana dhallinyarada Soomaaliyeed waxay wajahayaan caqabado soo jiitamayay:

▪︎ Shaqo la’aan iyo xirfad la’aan, kuwaasoo horseedi kara Tahriib iyo halis-galin nafeed.
▪︎ Jawiga bulshada oo mararka qaar niyad-jab iyo rajo beel xambaarsan
▪︎ In aan laga talo-galin/ka qayb-gal la'aan; go’aamada waaweyn ee saameeya noloshooda.

Sidee looga faa’iidaysan karaa Doorkaas Bannaan ?

Haddii si sax ah loo agaasimo, dhallinyaradu waxay noqon karaan xoog dhaqaajiya bulsho dhan. Waxaa muhiim ah in:

▪︎ La abuuro barnaamijyo xirfadeed iyo shaqo-abuur ah.
▪︎ La dhiirrigeliyo hal-abuurka iyo ganacsiga yar-yar.
▪︎ La sameeyo barnaamijyo tarbiyeysan oo kor u qaada wacyiga diineed, waddaniyadda, iyo mas’uuliyadda.
▪︎ Lagu barbaariyo hoggaan iimaan leh, akhlaaq leh, kana fogaada dan gaar ah.

📌 Dhallinyarada maanta waa kuwa qaadi kara mas’uuliyadda dalka berrito. Haddii aan maanta laga shaqeyn tayadooda, maskaxdooda, iyo akhlaaqdooda, berri waxaa la sugayaa dal iyo bulsho dayacan. Balse haddii la barbaarsho jiil ILLAAHEY ka baqa, aqoon iyo damiir diineed ku qalabaysan dalkiisuna u damqado, wuxuu noqon doonaa mid horseeda isbeddel dhab ah oo raalli laga yahay.

La wadaag saxiibadaa, Kuna soo biir boggeenna hadii aadan ka mid ahayn Saaxiibada ku xiran. Mahadsanid
Usame Qiyasle

19/06/2025

Aagga Raaxada (Comfort Zone): Cadowga Horumarka.

Aagga raaxadu waa xaalad nololeed ama maskaxeed oo uu qofku si joogto ah ugu dareemo nabadgelyo, xasillooni, iyo kalsooni. Waa meel aanu qofku ka filayn wax cusub, mana jirto baahi uu isugu dayo inuu isbeddel sameeyo ama wax ka beddelo noloshiisa. Waxa laga helaa caadooyin soo noqnoqda, hawlo fudud, iyo nolol aan wax culays ah lahayn. Laakiin marka si qoto dheer loo eego, waa meel laga fogaado koboc, u bareeridda Halisaha iyo horumakaba.

Aaggan raaxadu waxaa uu hoos u dhiggaa awoodda maskaxda, waxuuna yareeyaa hammiga qofka. Waxuu dadka ku beeraa Khiyaali. Inta aad ku nasanayso jawi aan caqabad kugu hayn, xirfadahaaga, kartidaada, iyo himilooyinkaaga ayaa hoos u dhacaya. Waxaad bilaabaysaa in aad ku qanacdo natiijooyinka yar yar, adigoo iska ilooba kartida aad u leedahay wax weyn.

Tani waa sababta uu u yahay cadowga horumarka. Maaha mid si lama filaan ah ku burburiya noloshaada, balse waa mid si tartiib tartiib ah kuu curyaamiya, kuu xaddida, kuguna beera raalli ahaansho aan xaqiiqo ku dhisnayn.

📌 Haddii aad ku sii negaato aagga raaxada, waxaad luminaysaa fursadaha koboca iyo guusha. Haku raalli noqon nolol caadi ah, adigoo leh karti sare. Ka gudub raaxada khiyaaliga ah, maxaa yeelay horumarka dhabta ah wuxuu ku jiraa meelaha adag.

Usame Qiyasle

18/06/2025

10 Xirfadood oo Muhiim ah Qarnigan, Fudud, La Baran Karo, Laguna Gaari Karo Guul Weyn

Maanta, dunidu waxay si xawli ah ugu socotaa jihada dhijitaalka, hal-abuurka, iyo isbeddelka. Qofka doonaya horumar iyo madax-bannaani dhaqaale wuxuu u baahan yahay xirfado la jaanqaadaya isbeddellada degdega ah ee teknoolojiyadda iyo suuqyada. Qormadan waxaan kugu soo koobay 10 xirfadood oo muhiim ah, la heli karo, fudud in la barto, isla markaana fursad weyn u haya qof walba oo raba inuu isbeddel nololeed sameeyo.

1.Curinta Qoraal Hal-abuur leh (Content Writing / Copywriting)

Qoraalka xirfadaysan wuxuu noqday laf-dhabarta isgaarsiinta casriga ah. Haddii aad taqaanid sida loo qoro qoraallo soo jiidasho leh, waxaad ka shaqayn kartaa blog-yada, xayeysiisyada iyo mareegaha bulshada.
✔️ Waxaa kuu furnaan kara fursado freelance, shaqo xafiiseed, ama inaad dhisto bog kuu gaar ah oo wax-tar leh.

2. Maaraynta Baraha Bulshada (Social Media Management)

Baraha bulshada waxay u baahan yihiin qorshe, habeynta jadwalka qoraallada iyo muuqaallada, falanqaynta natiijooyinka, iyo la falgalka bulshada.
✔️ Shirkado, hay’ado iyo shaqsiyaad badan ayaa raadinaya maareyayaal aqoon u leh arrintan.

3. Naqshadeynta Muuqaalka (Graphic Design)

Naqshadeynta waxyaabaha muuqda sida boorarka, Loogooyinka iyo xayeysiisyada waa xirfad looga baahan yahay meel kasta.
✔️ Waxaad u shaqayn kartaa freelancer ahaan, ama waxaad adeeg u bixin kartaa kuwa kale.

4. Suuq-geynta Casriga ah (Digital Marketing)

Waa xirfad fure u ah in adeeg ama badeecad lagu gaarsiiyo dad badan iyadoo la adeegsanayo aaladaha internet-ka.
✔️ Ganacsiyada cusub iyo kuwa horay u jirayba waxay u baahan yihiin suuq-geyn la jaanqaadaya caalamka casriga ah.

5. Naqshadeynta Mareegaha (Web Design)

Barashada sida loo dhiso mareegaha (websites) adigoo adeegsanaya aalado fudud sida WordPress, Wix, ama Carrd waa xirfad faa’iido badan leh. Waxay kuu oggolaanaysaa inaad sameyso bogag qurux badan oo ganacsi, waxbarasho ama shakhsi ah.
✔️ Waxaa furan fursado shaqo, freelance, iyo inaad ganacsi kuu gaar ah ku bilaabato online.

6. Fagaare Ka hadlidda (Public Speaking)

Kartida aad ku hadli karto si cad, kalsooni leh, iyo cod hufan waxay kaa dhigaysaa mid la dhagaysto oo la ixtiraamo.
✔️ Waxaa lagu shaqayn karaa warbaahin, casharro online ah, barnaamijyo cod ah (podcasts), ama duubista codad xayeysiis.

7. Adeegsiga Aaladaha AI (Artificial Intelligence)

AI-ga wuxuu fududeeyay wax-soo-saarka, qorshaynta, iyo hal-abuurka. Fahamka sida loo isticmaalo aaladahaas waxay kordhinaysaa waxtarka shaqo iyo waqtiga.
✔️ Waxaa looga faa’iidaysan karaa wax kasta oo digital ah—xitaa dadka aan xirfadlayaasha ahayn waa ay ku shaqeysan karaan.

8. Maaraynta Waqtiga iyo Wax-soo-saarka (Time Management & Productivity Tools)

Waqtiga waa hantida ugu qaalisan. Barashada sida loo qorsheeyo waqtiga, loo mudnaansiiyo hawlaha, loona gaaro yoolal waxay tahay xirfad hoggaan oo dhab ah.
✔️ Waxay kor u qaaddaa waxqabadkaaga maalinlaha ah, taasoo saameyn togan ku yeelata noloshaada guud.

9. Ganacsiga Online-ka ah (E-commerce & Online Selling)

Iibinta badeecado ama adeegyo online ah waxay noqotay dariiq muhiim ah oo lagu kasbado dhaqaale.
✔️ Waxaad bilaabi kartaa ganacsi yar oo online ah adigoo adeegsanaya Facebook, WhatsApp Business, ama aaladaha kale ee Baraha Bulshada.

10. Go'aan Qaadasho Xeeladaysan (Decision Making & Critical Thinking)

Noloshu waxay ku saleysan tahay go’aano. Barashada sida loo qiimeeyo fursado, loo fahmo cawaaqibka, loona doorto jihada saxda ah waxay kor u qaadaysaa kartidaada hoggaamineed.
✔️ Go’aanno wanaagsan waxay horseedaan natiijooyin wanaagsan—ha ahaato nolol shaqsiyeed ama mid xirfadeed.

📌 Xirfadaha kor ku xusan ma aha kuwo u baahan jaamacad ama khibrad dheer—waxay u baahan yihiin rabitaan, qorshe, iyo ku-dhiirasho. Haddii aad doorato xitaa hal xirfad, una dhabar-adaygto, waxaad noqon kartaa qof isbeddel dhab ah la yimaada, mustaqbalkiisana ifaya.

La wadaag saxiibadaa, Kuna soo biir boggeenna hadii aadan ka mid ahayn Saaxiibada ku xiran. Mahadsanid.
Usame Qiyasle

17/06/2025

War laga yaabo in uu ku dhex lumo dhacdooyinka kale:
Maanta oo keliya, mashruuca Sahyuuniyadda/Yahuudda ayaa dilay in la badan 74 walaalaheenna reer Gaza, intooda badan waxaa lagu beegsaday iyagoo sugayay "gargaarka" sunta ah.

Ilaahay ha lacnado Dulmi Falayaashan iyo cid walboo taageerta. Waxaan Alle ka baryayaa inuu Umaddan U yeelo hogaan suuban iyo jihayn sax ah.

Usame Qiyasle

16/06/2025

Farqiga u dhaxeeya Asal-Dhaladka iyo Mashruuca Sahyuuniyadda.

Usame Qiyasle

15/06/2025

Mashruuca Sahyuuniyadda (Zionism) Ee Lagu Beeray Bariga Dhexe

1. Waa maxay Sahyuuniyaddu?

Sahyuuniyad (Zionism) waa mabda’ isugu jira siyaasad iyo mid diimeed oo Yuhuuddu adeegsadeen si ay u sheegtaan lahaanshaha dhulka Falastiin. Waxaa la aasaasay dabayaaqadii qarnigii 19aad, iyadoo ay hormuud u ahaayeen Yuhuud u arka in aysan nabad iyo karaamo ka heli karin dunida inteeda kale haddii aysan helin "dal u gaar ah oo Yuhuud ah" (Jewish nation-state).

Sahyuuniyaddu ma ahayn aragti kaliya; waxay noqotay mashruuc la fuliyay oo si xeeladaysan dadka loogu guuriyay Falastiin, laguna dhisay Israa’11l sannadkii 1948.

2. Sababta Falastiin loo doortay:

▪︎ Meel istaraatiiji ah oo ku taal isu-gudubka qaaradaha Aasiya iyo Afrika.
▪︎ Qiimo diimeed aad u weyn oo Diinteena Suuban ee Islaamka u leedahay sidoo kale Kiristaanka iyo Yahuuddu-na ay sheegtaan.

▪︎ Mashruuca Sahyuuniyadda wuxuu u arkay qabsashada dhulkan inay tahay furaha saameynta diimeed iyo mid siyaasadeed oo lagu tirtiri karo calaamadaha Islaamka, laguna abuurayo awood juqraafiyeed oo Yuhuud gaar u ah.

3. Sidee loo fuliyay mashruucan?

A. Taageero Shisheeye:

▪︎ 1917: Ingiriiska ayaa soo saaray Balfour Declaration, oo ah ballanqaad rasmi ah oo lagu taageerayo "guriga qaran ee Yahuudda" (national home for the Jewish people) ee Falastiin.

▪︎ Dagaalkii Labaad ee Adduunka (WWII) kadib, Maraykanka iyo Reer Galbeedku waxay billaabeen inay si buuxda u taageeraan Sahyuuniyadda, iyagoo adeegsanaya qaddiyadda holocaust si loo abuuro marmarsiiyo sharci ah.

B. Barakicinta Falastiiniyiinta:

▪︎ 1948: In ka badan 700,000 Falastiiniyiin ah ayaa laga masaafuriyay guryahoodii.
▪︎ Tuulooyin iyo magaalooyin badan ayaa la burburiyay si loogu banneeyo Israa’iil.
▪︎ Qabiilo dhan ayaa la xasuuqay — si qorshaysan.

C. Tirtiridda Astaamaha Islaamka:

▪︎ Masaajidyo, taallooyin, iyo magacyo Islaami ah ayaa la beddelay ama la burburiyay.
▪︎ Magaalooyinkii sida Qudus (Jerusalem) ayaa magacyo Yahuudi ah loo bixiyay.
▪︎ Wax walba oo muujinaya jiritaanka Islaamka ayaa la bartilmaameedsaday.

4. Farqiga u dhexeeya Yahuudda iyo Sahyuuniyadda:

▪︎ Yahuuddu (Jews) waa dad haysta diinta Yahuudiga, oo ku kala firdhisan dunida oo dhan, waxayna leeyihiin aragtiyo kala duwan. Sahyuuniyadda (Zionism) waa dhaqdhaqaaq siyaasadeed iyo qaranimo raadis ah oo ay qaateen qaar ka mid ah Yahuudda si ay u dhistaan ama u taageeraan “guriga qaran ee Yahuudda” ee Falastiin. Dhammaan Yahuuddu maaha Sahyuuniyiin, mana wada taageersana Israa’iil.

▪︎ Guriga Qaran ee Yahuudda (Jewish National Home):

Waa fikrad ah in Yahuuddu ay helaan dhul ay si rasmi ah u degaan oo ay ka dhigtaan dawlad u gaar ah, taasoo Sahyuuniyiintu u doorteen Falastiin, iyagoo u maraya taageerada quwadaha reer Galbeedka sida Ingiriiska (1917 Balfour Declaration).

▪︎ Qadiyadda Holocaust:

Waxay ahayd xasuuqii Nazi-ga Jarmalka ay u geysteen Yahuudda intii lagu jiray Dagaalkii 2aad ee Adduunka, iyagoo dilay ku dhawaad lix milyan. Sahyuuniyiintu waxay u adeegsadeen dhacdadan si ay u helaan taageero caalami ah oo lagu dhiso Israa’iil.

5. Hadafka Ugu Dambeeya ee Sahyuuniyadda

▪︎ In laga dhigo Falastiin dal Yahuud u gaar ah.
▪︎ In la dumiyo Masjidka Al-Aqsaa, si meeshaas loogu dhiso waxa ay ku sheegaan "macbadkii Nabi Sulaymaan" (Temple of Solomon).
▪︎ In la xakameeyo Bariga Dhexe si Israa’iil u noqoto awoodda ugu weyn gobolka.
▪︎ In la hor istaago midnimada Muslimiinta iyo xornimada siyaasadeed ee ummadaha kale.

6. Xaqiiqada Maanta ka Taagan Gobolka Bariga Dhexe.

▪︎ Kumannaan Falastiiniyiin ah ayaa ku dhimanaya duqeymo, go'doomin iyo cunaqabatayn joogto ah.
▪︎ Israa’iil waxay helaysaa taageero aan xadidnayn oo ka timaadda Maraykanka iyo Yurub.
▪︎ Wixii ay ku sheegi jireen Xuquuqda aadanaha ayaa noqday mashruuc ay ku adaagtaan reer Galbeedka.
▪︎ Dadka Falastiin ee ku nool Qaza carruur iyo cirooleba ma hasytaan ama waa dhif iyo naadir quutul-yowmkooda islaba daa adeegyo kale.

7. Maxay Tahay Mas’uuliyaddeenna ( Dadka Muslimka ah) ?

Waa inaan Fahannaa👇:

Sahyuuniyadda (Zionism) waa mashruuc siyaasadeed oo lagu qabsaday dhul Islaam ah — Falastiin. Waxaa loo adeegsaday xanuunkii Holocaust si loo helo cudud caalami ah. Qadiyaddu ma aha muran dhuleed, ee waa dagaal diimeed istaraatiiji ah oo lagu baabi'inayo astaamaha Islaamka. Falastiin waa masuuliyad qof kasta oo Muslim ah saaran tahay. Sidaa darteed waa in aanan ku sirmin erayada marin-habaabinta ah sida " Xal laba dowladood ah " iyo kuwa la midka ah.

Usame Qiyasle

13/06/2025

-- Dhacdadii Diyaaradda India: Cibrooyin iyo Casharro Nololeel --

Burburkii diyaaraddii Air India wuxuu xambaarsanaa murugo weyn, laakiin sidoo kale wuxuu bixinayey casharro nololeed oo maskaxda qof kasta gilgilaya—cibrooyin dhab ah oo muujinaya sida noloshu u tahay mid aan la saadaalin karin, iyo sida Qaddarka Alle mar walba uga sarreeyo qorshayaasheena.

1.Qoyskii U Socday UK: Riyo Lix Sano Jirsatay, Balse...

Waxaa jiray qoys muddo lix sano ka shaqaynayey qorshe ay ku riyoonayeen—iney degaan oo ay ku noolaadaan UK. Laakiin Dib-u-dhacyo iyo hawlo kale ayaa hakinayay. Wayna u dulqaateen, u shaqeysteen, una samreen. Markii ugu dambeysay waxay heleen firsadii ay mudaba sugayeen. Balse waxay saarnaayeen diyaaraddii burburtay.

💡 Cibro:
In badan oo naga mid ah waxay noloshooda u huraan qorsheyaal fogfog, iyagoo ilaawa inuu waqtigu socdo, naftuna aysan dammaanad lahayn. Waxaan u nool nahay "Maalin uun", laakiin mararka qaar maalintaas ma timaaddo. Farxadda, mahadnaqa, iyo xiriirka wanaagsan—dhammaan waxay mudan yihiin in maanta la helo, ee aysan noqon "Maalin uun".

2. Haweeneydii Diyaaradda ka hartay: Ilaahay Waa Badbaadiye

Haweeney diyaaradda raaci lahayd ayaa ka soo daahday. Way ku dadaashay, Ooyday oo baryootantay si aysan uga harin Diyaaradda balse looma ogolaan diyaaraddii oo sidaa ayay uga hartay Duulimaadkaas. Diyaaraddii ay ka hartayna waxay ahayd middaas burburtay.

💡 Cibro:
Qaar ka mid ah waxyaabaha aan u aragno nasiib-darrooyinka ugu xun ee nagu dhaca, waxay noqdaan nimcooyin qarsoon. Mararka qaar waxaad rabtaa wax—laakiin Alle ayaa kaa hor istaagayo, sababtoo ah wuxuu ogyahay wax aadan adigu ogeyn. Waxaa jiri kara khatar aad u socoto, iyo badbaado Alle kuu qarinayo.

3. Ninkii Alle sida Mucjisada ahayd u badbaadiyay.

Nin rakaab ahaa ayaa si mucjiso ah uga badbaaday shilka. Markii diyaaraddii kala jabtay, isagu wuxuu ka dhacay qaybta dambe oo banaanka ayuu u baxay— rakaabkii oo dhan baa dhintay —laakiin isagu wuxuu helay fursad labaad oo nololeed.

💡 Cibro:
Waqtigaaga dhimasho ma aha mid adiga gacantaada ku jira. Waxaa jira dad kaa xoog badan, caqli badan, ama caafimaad qab badan—balse waqtoodu yimid. Haddii aad nooshahay, waxaad haysataa fursad aad ku toobad keento, ku guulaysato, kuna naxariisato.

📌 Ku Noolow Qaddarka, Balse Ku Shaqee Iimaan iyo Fikir

Noloshu waa safar u dhaxeeya riyooyin aan rumownin, qorshayaal aan suuragalin, iyo qaddar Alle oo mar walba ah kan ugu dambeeya. Ma jirto cid og waqtigeeda, mana jiro qorshe ka xoog badan amarka Rabbi. Laakiin intaad nooshahay —waxaad haysataa fursad dahabi ah:

✔️ Inaad Alle u laabato.
✔️ Inaad maanta u noolaato sidii inaysan berri jirin

Marka ha sugin berri—waayo berri dammaanad ma leh. Noloshaada maanta qiimee, wanaaji, kuna nooloow niyad wanaagsan, tawakal iyo camal wanaagsan.

La wanaag saaxiibadaa. Mahadsanid

Usame Qiyasle

10/06/2025

-- 10 Astaamood Oo Lagu Garto Qofka Maskaxda Fayow --

Qofka maskax ahaan fayoow oo dabeecad wanaagsan leh waxaa lagu gartaa tilmaamo gaar ah oo ka tarjumaya isku dheelitirnaan, faham bulsho, iyo naxariis. Waa kuwan 10 astaamood oo lagu garto dadka noocaas ah:

1. Waxay amaanaan dadka kale – Markay wanaag arkaan, si daacad ah bay u bogaadiyaan.

2. Nafahooda ma buunbuuniyaan – kuma faanaan waxqabadkooda, waxeyna ka fogaadaan isla-wayni.

3. Weligood wejigooda farxad baa ka muuqata – Qosolkooda iyo dhoolla-caddayntoodu waxay dejisaa qalbiyada dadka kale.

4. Waxay u daayaan dadka kale fursad ay dareenkooda ku muujiyaan – Ma gooyaan hadalka, waxayna qadariyaan codka dadka kale.

5. Si dhab ah bay u dhagaystaan – Ma aha dhagaysi kaliya, balse waa mid leh feejignaan iyo faham.

6. Qosol iyo kaftan wanaagsan bay leeyihiin – Waxay qoslaan iyagoo aan ku jeesjeesin ama dhaawicin dadka kale.

7. Waxay diyaar u yihiin inay caawiyaan dadka kale – Markaad u baahato, waxaad ku ogaan doontaa garabkooda.

8. Talooyinkooda waa kuwa daacad ah oo waxtar leh – Uma hadlaan si ay u muujiyaan kartidooda, balse si ay kuu anfacaaan.

9. Wanaagga waxay u nisbeeyaan cidda mudan – Marna ma lunsadaan xaqa dadka kale, waxayna qadariyaan dadaalka qof walba.

10. Way dhiirrigeliyaan dadka kale si ay u guulaystaan – Guusha dadka kale waxay u arkaan farxad, ma aha tartan.

📌 Hadii aad taqaanno qof leh dabeecadahan, ilaali oo dhawr saaxiibtinimadiisa waa Nimco weyn

Usame Qiyasle

08/06/2025

-- Saddex Guul Maalinle ah oo Kaa Dhigi Kara Guuleyste Buuxa --

🏆 Guusha Jirka
(Socod, orod, jimicsi, miisaan qaadis, dabaal...)
“Jirka caafimaadka qaba ma aha keliya muuqaal qurux badan — waa saldhigga firfircoonida, dhiirranida maskaxda, iyo kalsoonida nafta.”

🧠 Guusha Maskaxda
(Akhris, qorid, curin, barasho, falanqayn...)
“Maskaxda waa sida beerta, waxa aad ku beerto maalin walba, waa midhaha aad guran doonto berri.”

🌱 Guusha Ruuxda
(Salaadda, xasuusta Alle, fikir nafeed, akhlaaq kobcin...)
Qof kastaa wuxuu leeyahay baahi ruuxi ah — baahi aan lagu dabooli karin cunto, maal, ama sumcad. Waa baahida micnaha, is-barashada, iyo xiriirka qofka uu la leeyahay abuurihiisa (Allah).

Noqo qof guushiisu aanay ku xirneyn nasiib ama duruufo dibadda ah. Noqo guuleyste dhameystiran, maalin kasta xoog iyo xikmad ku dhisan.
“Horumarka uma yimaado si lama filaan ah — waa natiijada guulo yaryar oo la isu geeyay maalin kasta.”

✨ Hadda Bilow!

1. Dooro hal fal oo faa’iido leh mid kasta oo ka mid ah saddexda qeybood (jir, maskax, ruux)

2. Ku celi si joogto ah muddo 21 maalmood ah – si caado caafimaad leh aad u sameysato

3. U dabaaldeg tallaabo kasta oo aad qaaday — guusha dhabta ahi waxay ku jirtaa socodka joogtada ah, ee maaha degdegga

Usame Qiyasle

07/06/2025

Jacaylka iyo Daryeelka: Daawada Dhibaatooyinka Nolosha

Runtu waxay tahay in noloshu ay tahay mid adag — mid mararka qaar culayskeedu ka bato dulqaadka qofka. Waa caqabad joogto ah oo aan kala garanayn farxad iyo murugo, rajo iyo niyad jab, guul iyo guuldarro. Xitaa markaad dareemayso farxad iyo qanacsanaan, noloshu haddana waxay wadataa daal, walaac iyo halgan joogto ah.

Been buu sheegay qofkii yidhi noloshu waa sahlan tahay.

Haddana, waxaa jira arrimo yarayn kara culaysyadaas: jacaylka, naxariista, daryeelka iyo kalgacalka ka yimaada dadka nagu xeeran — ehel, asxaab, ama kuwa qalbiyadeenna u dhaw.

Qofka maalin walba la kulmaya nolol adag isagoo aan helin dareen jacayl, daryeel iyo qiimeyn, waxa uu si sahal ah ugu nuglaan karaa dhibaatooyin nafsi ah sida kelinimo, niyad jab, ama hoos u dhac kalsooniyeed. Noloshu maaha safar lagu gudbi karo kalinimo — bani’aadamku wuxuu u baahan yahay inuu dareemo in la garab taagan yahay, in uu yahay qof qiimo leh, in jiritaankiisu leeyahay macno.

Marka aan helno kalgacal iyo daryeel dhab ah, waxa ay noqdaan sidii gaashaan naga difaaca dhibaatada iyo culaysyada nolosha. Waxa ay ina siiyaan xasilooni, tamar iyo rajo. Hal erey oo wanaagsan, hal garab istaag, hal aragti oo isfaham leh — intaas kaliya ayaa isbedel weyn u keeni kara gudaha qof bini’aadam ah.

Sidaa darteed, Daryeel dadka ku xeeran. U sheeg in aad u aragto muhiim. U sheeg dadka aad jeceshahay inaad jeceshahay. Is-garab istaaga, Hana Ilaawina Xuska Alle.

Usame Qiyasle

04/06/2025

Ibnu Al-Qayim Allah Ha u Naxariistee wuxuu yiri:

"Raalli gelinta dadka: ma aha wax la awoodo – mana aha wax la amray – mana aha wax la soo weriyey."

✔️ Ma aha wax la awoodo: Qofna ma awoodo inuu dadka oo dhan raalli geliyo, waa wax aan suurto gal ahayn, waana khasab inay dadka qaar kaa caroodaan.

✔️ Ma aha wax la amray: Alle subxaanahu watacaalaa kuma uu farin in dadka oo dhan aad raalli geliyo.

✔️ Ma aha wax la soo weriyey: Kuma iman xadiis ama aathaar (Qiso dadkii h**e laga soo wariyay) in qof ay raalli ka wada noqdeen dadka oo dhan. Taa micnaheedu waa in aysan jirin cid taariikhda soo martay oo dadka oo dhan raalligaliyay.

Ha ka dhigin hamigaaga ugu weyn inuu noqdo raalli gelinta dadka, sababtoo ah qalbiyada bini’aadamku way is beddelaan – maanta way ku jeclaan karaan, berrina way ku nici karaan.

Laakiin hadafkaaga ha noqdo raalli gelinta Rabbigaaga, maxaa yeelay marka aad isaga raalli geliso, isagaa kuu furaya qalbiyadii dadka wanaagsan si ay kuu jeclaadaan, wuxuuna kaa kaafinayaa sharka kuwa xun.

Usame Qiyasle

03/06/2025

"Dagaalka kaliya ee faa’iido leh waa dagaalka lagula jiro caajiska
iyo dagaalka lagula jiro jaahilnimada...
iyo ku dadaalida in la qaato sababaha guusha…
iyo in lagu tiirsanaado naftaada."

Waa wixii ay sameeyeen Japan – waxay ka soo bilaabeen eber, waxayna gaareen heer sare iyo horumar buuxa dhowr sano gudahood.
Waa wixii ay sameeyeen Singapore,
waa wixii ay sameeyeen Malaysia,
waana wixii ay sameeyeen dadka kabaha la’ (Saboolka ah) ee Shiinaha.

Annaguna waan samayn karnaa sidaas.
Waa xal adag oo ah daawo qadhaadh, balse xal kale ma jiro.

Inta maskax fayow aad leedahay iyo laba gacmood oo karti leh, cudurdaar ma jiro.

Haddii qof wax ikhtiraaco oo uu kaa rabo xuquuqda hal-abuurkiisa,
waxa kaliya ee aad ugu jawaabi karto waa adigoo adna wax ikhtiraaca oo ka dalbada xuquuqda hal-abuurkaaga."

— Dr. Mustafa Maxamuud
Buugga: زيارة للجنة والنار

Usame Qiyasle

Usame Qiyasle

20/06/2025

19/06/2025

18/06/2025

17/06/2025

16/06/2025

15/06/2025

13/06/2025

10/06/2025

08/06/2025

07/06/2025

04/06/2025

03/06/2025

Address

Website

Alerts

Shortcuts

Share

Category