05/02/2026
RASMI
Waxaa goordhow si rasmi ah loo soo afjaray dagaal culus oo socday in ka badan 24 saacadood, kaas oo u dhaxeeyey Ciidamada Dowlad-goboleedka Koonfur Galbeed Soomaaliya iyo ciidamo ka amar qaata Wasiirka Xanaanada Xoolaha XFS, Xasan Eelaay.
Dagaalkan ayaa ka qarxay gudaha iyo hareeraha magaalada, waxaana uu sababay khasaare isugu jira dhimasho iyo dhaawac. Sida ay xaqiijiyeen ilo-wareedyo lagu kalsoon yahay, in ka badan 10 ruux ayaa ku geeriyootay halka dhaawacuna uu gaarayo illaa 30 qof, kuwaas oo intooda badan la geeyey xarumaha caafimaadka.
Ciidamada Koonfur Galbeed ayaa ugu dambeyn la wareegay guriga Wasiir Xasan Eelaay, waxaana weli mararka qaar laga maqlayaa rasaas goos-goos ah oo ka dhacaysa bannaanka magaalada, taas oo muujinaysa in xaaladdu weli tahay mid feejignaan u baahan.
Dagaalkan ayaa salka ku haya khilaaf siyaasadeed oo muddooyinkii dambe u dhaxeeyey Madaxweynaha Koonfur Galbeed Soomaaliya, Cabdicasiis Xasan Maxamed (Laftagareen), iyo Wasiir Xasan Eelaay. Ilo xog-ogaal ah ayaa sheegaya in dhowr jeer la isku dayey in khilaafka si hoose loo xalliyo, balse dadaalladaas ay fashilmeen.
Maamulka Koonfur Galbeed iyo Dowladda Federaalka Soomaaliya ayaan weli si buuxda uga hadlin dhacdadan, hase yeeshee waxaa socda dadaallo lagu doonayo in lagu dejiyo xaaladda, laguna soo celiyo amniga iyo xasilloonida.
