21/07/2024
Dhacdooyinka Calamka 🇮🇳
Dal maanta ka horreeya dhaqaale ahaan iyo ciidan ahaanba dalkii gumaystay, dal 70sano kahor kamid ahaa kuwa dunida ugu faqrisan. Maantana ah awood dunida hogaaminaysa dhaqaale ahaan, ciidan ahaan iyo aqoon ahaanba.
Hindiya waxa ay dhacdaa koonfurta qaaradda Eeshiya, waa dalka 7aad ee caalamka ugu baxadda weyn ahna kan 3aad guud ahaan Eeshiya. Sidoo kale waa dalka labaad ee dunida ugu dadka badan, waxa ku nool 1.3Bilyan oo qof, waa ku dhawaad shan meelood meel bulshada dunida inay Hindiya ku nooshahay.
Sanaddii 1948 ayay ka qaateen xornimadooda boqortooyadii Britishka, xilligaa Hindiya waxa ay ahayd tiro ahaan dad kor u dhaafaya 300 oo malyan. 16% kaliya ayaa wax qori karayay waxna akhrin karayay bulshada reer Hindiya xilligaa. Faqrigu 70% ayuu dhaafsiisanaa, intaa wixii ka danbeyay Hindiya waxa ay qaadday waddo ka dhigtay inay noqoto awood maanta jaangoysa xaaladda dunida.
Maanta Hindiya waa dalka 5aad ee dunida ugu dhaqaalaha badan, waxa ay ka dhaqaale badan tahay UK oo ah dalkii gumaystay. Sanaddii 2018-kii ayay booska kala baxday dalkaas. Sidoo kale guud ahaan qaaradda Afrika ayay ka dhaqaale badan tahay. Waa mid kamida wadamada dhaqaalahoodu aadka u korayo waxaana la rajaynaya 10-ka sano ee soo socota inay noqoto dalka 3aad ee ugu dhaqaalaha badan dunida. 30sano kahor UK dhaqaalaheedu hal Trillion ayuu ahaa, halka Hindiya uu ahaa $340Bilyan. Maanta Hindiya waa $3.2 Trillion halka UK ay tahay $2.9Trillion.
Dhanka aqoonta Hindiya waxa ay kasoo tagay darajo hoose oo ahayd 16% maantana 74% dadkeedu waa kuwo waxbartay. Sidoo kale waxa ay leedahay jaamacadaha ugu heer sarreeya Eeshiya iyo dunidaba. Dakhli sanadeedka soo gala qofka Indianka ah celcelis ahaan maanta waa $9kun halka 70sano kahor uu ahaa $70 wax ka yar.
Waa mid kamida wadamada ay ku nool yihiin bulshooyinka ku kala duwan afka, dhaqanka, diinta, isirka, midabka, cuntooyinka iyo deegankaba. Waxa looga hadlaa dalkaas in ka badan 122luuqadood oo luuqadda u yari ay ku hadlaan 10kun oo qof wax ka badan. 22luuqadood. Sidoo kale waxa ku nool in ka badan 2kun oo qowmiyadood. Waa dal kulansaday dhammaan diimaha waawayn ee dunida ka jira. 80% dadkiisu waa Hinduu, halka 14% ay yihiin Islaam. Waana dalka ay ku nool yihiin Muslimiinta saddexaad ee ugu badan caalamka kadib Indonesia iyo Pakistan.
Faqrigu Hindiya waxa uu maanta ka yahay wax ka yar 17% halka faqriga daran uu 6% ka hooseeyo. Aad bay ula dagaallameen, 10kii sano ee u danbeeyay dawladda dalkaasi 250milyan ayay xayndaabka faqriga ka saartay.waxa ku nool maanta in ka badan 139Bilyanneer waa in 10jeer ka badan inta ku nool Afrika oo idil. Waana dalka saddexaad ee ay Bilyanneerada ugu badani ka soo jeedaan.
Waa dal aad u awood badan oo saamayn muuqata kuleh mandaqadda uu dhaco. Waa dalka afaraad ee ugu ciidamada xoogan dunida. Waa mid ku hubaysan hubka wax gumaada ee Nukliyeerka. Sidoo kalana kamida shanta dal ee dhaqaalaha ugu badan ku baxsha ciidamada.
Dalku waxa uu ka kooban yahay 29gobol. Gobolka Maharatshtra ayaa ka dhaqaale badan guud ahaan dalka Pakistan oo daris la ah, halka gobolka Uttar Pradesh uu ka dad badan yahay isku darka UK, Germany iyo Spain ama guud ahaan wadanka Ruushka, waxa uuna ka dhaqaalo badan yahay Masar.
