08/04/2017
“Al-Saadicuuna Bil-Xaq” ma ahan koox cusub
Jamaacatu Dacwah Wal-Hijrah, oo culimada Muslimiinta ay u yaqaanaan "Takfiir", waa koox aaminsan in dadka Muslimiinta ay ku jiraan waayihii jaahiliyadda carabta kahor inta aan Nabiga CSW lasoo saarin.
Waxa ay aaminsanyihiin in iyaga kaliya ay ku taaganyihiin wadadii rasuulka CSW, ayna haystaan caqiidada saxda ah ee Islaamka, inta kalena ay yihiin jaahiliin ama gaalo u baahan in Islaamka dib loo soo galiyo. Waxaad ka garan kartaa hadaladii ay jeediyeen waxaa kusoo laalaabtay ereyka “Dhulka hadda loo yaqaano Caalamul Islaami” yanci waa loo yaqaan ee ma ahan Caalamul Islaami.
Dhammaadkii lixdameeyadii ayay kasoo dhasheen dalka Masar, waxa ay si gaabis ah ugu baaheen dunida Islaamka. Soomaaliya ayay soo galeen, iyaga oo isku ballaariyay ganacsiga iyo tacliinta. 40 sano waxa ay ka shaqaynayeen in ay labadaas waaxood xoog ku yeeshaan.
Qoladan labo ayay u qaybsamaan; kuwo waxaa la yiraahdaa "Takfiir Jawi" oo macno ahaan ah, kuwo dadka la nool, oo aan is muujin, si caadi ah ula macaamila dadka, balse hoosta ka aaminsan in waxa ay la macaamilayaan aanay Islaam eheen. Waxaa jira kuwo Xagjir ah, oo ah Takfiirka ay Soomaalida yaqaanaan, kuwaa oo dadka ka soocan, soo dhex galin, hilibka ay qalaan la cunin, nacaybkoodana muujiya.
Magac Cusub
Waxa ay arkeen in ay sii dabar go’ayaan, oo sida aad aragteen intiina badan, muuqaalada ay soo duubeen waxaa ka muuqda odeyaal 60-ka kor u dhaafay, oo ah dadkii ku biiray billowgoodii, mana jiraan ama aad bay u yaryihiin dad dhalinyaro ah.
Waxa ay hadda la yimaadeen afkaartoodii qadiimiga eheed iyo magac cusub (al-Saadicuun Bil-Xaq), oo macno ahaan ah kuwa aan xaqa la gabban, waxa ayna kasoo dhiraandhiriyeen magacaas aayadda qur’aanka (فاصدع بما تؤمر وأعرض عن المشركين) iyaga oo sheegay in 40 sano ay dacwada si siri ah usoo wadeen, haddana ay banaanka soo dhigayaan.
Sidee ayay tahay in la loo wajaho?
Anigoo ilaalinaya, xoriyadda qofka uu u leeyahay waxa uu aaminsanyahay, hadduusan wadan cunfi iyo dagaal, haddana kooxdan waa mid halis ku ah dunida Islaamka, gaar ahaan Soomaaliya, oo aan oganahay dhibka ay ka gaysteen qaar kamid ah firqooyinka Islaamnimada sheegta.
Waxa aan aaminsanahay, in sida kaliya ee lagula dagaalami karaa ay tahay in si muuqata (public) ah loola doodo, lagu qaado olole ballaaran oo xagga warbaahinta ah, la naqdiyo afkaarahooda, iyada oo la adeegsanayo culimada aqoonta durugsan u leh Diinta Islaamka, fahamka saxda ahna ka bixiya.
Haddii aan sidaa la sameyn, anaga, oo ah Soomaalida waan u nugulnahay afkaaraha cusub, waxaana macquul ah in dhalinyaro badan ay saameeyaan. Ogoow, waxa ay hadda buuxiyeen firaaq ka jiray xagga dacwada.
Suuqa marka aad la timaado in aad hilib waraabe ku iibiso waxaa laga yaabaa in aan lagaa iibsan, balse waad kasoo jiidasho iyo hadal hayn badantahay kan hilibka ariga iibiya.
