23/01/2026
Bishan Janaayo, Soomaaliya ayaa haysa hoggaanka Golaha Ammaanka ee Qaramada Midoobay, xil muhiim ah oo siinaya awood ay ku dejiso ajandaha bisha isla markaana ay ku guddoomiso dhammaan kulamada Golaha. Tani waa fursad taariikhi ah oo ka tarjumaysa kalsoonida sii kordhaysa ee beesha caalamku ku qabto Soomaaliya iyo doorkeeda firfircoon ee arrimaha amniga iyo nabadda adduunka.
Ajandaha ay Soomaaliya dooratay ayaa ah dood heer sare ah oo ku saabsan xoojinta sharciga iyo kala dambeynta caalamiga ah (Rule of Law), si loo ilaaliyo nabadda iyo amniga caalamka. Dooddan muhiimka ah waxaa shir-guddoomin doona Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, waxaana ka soo qaybgalaya marti aad u culus oo ay ka mid yihiin Xoghayaha Guud ee Qaramada Midoobay António Guterres, Guddoomiyaha Midowga Afrika Mahamoud Ali Yusuf, madax kale oo caalami ah, oo isugu jira wasiirro arrimo dibadeed, diblomaasiyiin sare, iyo wakiillo heer caalami ah iyo sidoo kale garsoorihii h**e ee maxkamadda ICJ Cabdulqawi Axmed Yuusuf ayaa isna la filayaa inuu ka qayb galo kulanka.
Kulankan ayaa ah fursad weyn oo ay dalalka dunidu si wadajir ah uga doodi karaan sida sharciyadda caalamiga ah, iskaashiga dowladaha, iyo wada-shaqaynta multilateral-ka ay uga hortagi karaan colaadaha, qalalaasaha, iyo ku tumashada madax-bannaanida dalalka. Ajandaha ay Soomaaliya soo xulatay wuxuu si cad u muujinayaa rumaysnaanta Soomaaliya ee ah in ku dhaqanka sharciga caalamiga ahi yahay waddada kaliya ee lagu gaari karo caddaalad iyo xasillooni.
Aragtidan ayaa si wax ku ool ah uga muuqatay guulo h**e oo Soomaaliya ka gaartay masraxa caalamka, sida kiiskii badda ee ay kaga adkaatay Kenya, mowqifkeeda adag ee heshiiska badda ee Itoobiya iyo Somaliland, iyo dagaallada diblomaasiyadeed iyo sharci ee ay kula jirto isku dayada sharci-darrada ah ee lagu wiiqayo madax-bannaanideeda, oo ay ku jirto arrinta aqoonsiga Israel ee Somaliland. Dhammaan tusaalooyinkan waxay caddeynayaan in Soomaaliya ay si xeel dheer ugu adeegsatay sharciga caalamiga ah difaaca danaha qarankeeda.
In Soomaaliya ay hoggaamiso dood heerkan ah oo Golaha Ammaanka ah waxay astaan u tahay doorkeeda sii kobcaya ee siyaasadda caalamka, waxayna muujinaysaa in ay ka gudubtay marxaladihii nuglaa una tallaabsatay marxalad ay fikrad iyo hoggaan ku leedahay miiska go’aamada adduunka.
Fursaddan naadirka ah ayaa sidoo kale u oggolaanaysa madaxda dalalka xubnaha ka ah Golaha Ammaanka in ay miiska keenaan aragtiyo iyo dood u adeegaya danaha dowladahooda, isla markaana ay si wadajir ah u difaacaan mabaadi’da ay aaminsan yihiin, si looga hortago wax kasta oo caqabad ku noqon kara nabadda, madax-bannaanida, iyo xasilloonida dowladaha caalamka.
