بالمشرمحي

بالمشرمحي هدفنا توعية جيل اثرت عليه الحرب بحياتو وأفكارو، من خلال انشاء محتوى يُقدم عبر سلسة حلقات تُعرض تباعاً

16/02/2025

ألستَ وعدتني يا قلبُ أني إذا ما تُبتُ عن ليلى تتوبُ؟

فها أنا تائبٌ عن حبِّ ليلى فما لكَ كلَّما ذُكرت تذوبُ؟

12/05/2024

#الرفقة

على مدار حياتنا منتعرف على أصدقاء كثير وقليل، ومنقول هاد رفيق العمر، هاد مستحيل نفترق، رح نختير سوا، أنت سندي، ومنفكر أنو بس نوقع رح نلاقيه أول واحد بيسندنا، بس وقت نوقع مننصدم أنيتو أول واحد تركنا، منزعل ومننقهر، وبعدين منتعود، بهيك حالة اتعودوا لا تلوموا الأشخاص، لومو عشمكن فيهن، أنت يلي رفعت سقف توقعاتك فيه، مو ضروري إذا أنت سندتو بيوم، يجي يوم وهو يسندك، ولا تزعل منو، بالعكس رجعو لمكانو الصحيح وبس، وتزكر أيامك معو وابتسم، لأنو بالحياة رح تقابل نوعين من الرفقة، رفقة طريق ورفقة وقت، يعني رفيق الطريق هو الحقيقي والسند ويلي بينقلو صديق، صادقك وصادق وعدو الك، ورفيق الوقت يلي بتقضو ايام حلوة سوا وبس تنداق بيتركك، أو ممكن يتركك وقت ينشغل بحياتو أو أي شي، بس رح يتركك أول ع ٱخر، وبس تركك لا تحملها كتير، خليك أنت المرحلة الحلوة بحياة الناس و #بالمشرمحي خليك أنت الأصدق والأوفى والأحسن وكل واحد بالأخير بيعمل بأصلو، ❤️

#بالمشرمحي

29/04/2024

أخلاقي حلوة بس لا حدا يتصل فيني كذا مرة ورا بعض ❤️🙂

#بالمشرمحي

19/04/2024

#امتنان

لو مافي زعل ما كنا عرفنا قيمة السعادة، ولو ما المرض ماعرفنا نعمة الصحة، ولو ما مرقنا بالفشل كنا ما دقنا طعم النجاح، وطبعا لو مافي عتمة كنا ما لقينا نجومنا، حتى الشمس لو ما الليل والبرد والشتوية كنا ما حسينا بقيمتها، الحياة متكاملة، بأصغر تفصيلة فيها، لهيك كونوا دايما ممتنين للحظة يلي انتو فيها ❤️ قد ما كانت صعبة أو حتى حلوة، و #بالمشرمحي حبينا نمسي 😊

#بالمشرمحي

08/04/2024

#عيد

فقت على صوت التكبير 😍 وأنا متحمسة كتير لأول يوم عيد، نطيت من التخت وفيقتها لأختي ورحنا ركد لنلبس تياب العيد، يلي كنا صافينن على الديوانة (أريكة بس بالحلبي) 💃 لحتى نكون جاهزين أول ما يرجع بابا من صلاة العيد، نستقبلو ونبوس ايدو، وطبعا نحصل على هدفنا وغايتنا يلي هو #العيدية 💸💸 أخدنا العيدية ونحن طايرين باتجاه المطبخ على ريحة اليبرق (ورق دوالي بس كمان بالحلبي)، ونقضينا بسرعة على صحون الحلو (كعك عيد، قراص بعجوة، ومعمول) 🧁🍭🍬🍫🍩🍪 حتى نسكت جوعنا قبل ما يستوي اليبرق، وبلش باب بيتنا يندق، ونستقبل بالضيوف 🧓🧑‍🦳🧑‍🦰🧑🧕 بيت عمتي وعمي والعيلة الكريمة، ومتل البرق انطلقنا نحن وولاد العيلة على الألعاب 🏂🪂🚴🤾لحتى نصرف العيديات ونتبعزق ونشتري أكلات كتيرة، ومن الدويخة للزحليطة وأخيرا للقلابة 🎡🎠🎪 ورجعنا على البيت هلكانين بس بدنا ناكل، وبعد ما عبينا بطنا من اليبارق والكبب والذي منو، قعدنا على برندة البيت وصرنا نلعب، وفجأة سمعت صوت أمي عم تصرخلي 🥺 يلا قومي عملت القهوة، يلا يا كسلانة حاجتك نوم اليوم اول يوم عيد خلصينا، هون استوعبت إني كنت بحلم وأنو اليوم عمري 25 سنة 🧑‍🦳 وماعدت البنت الصغيرة يلي تركد بدون ما تفكر ببكرا، وأنو وراي مسؤوليات ومهام وكتير قصص، وبدون ما احس ع حالي، نزلت الدمعة من عيني، بكيت على أيام العيد قبل الحرب، وبكيت على أختي يلي ماعادت موجودة معي، بكيت على ولاد العيلة يلي تشردوا وكل واحد فيهن صار ببلد، بكيت وبكيت وبكيت، وبعدين صحيت على صوت ولاد الحارة وهنن عم يقوسوا على بعض بفرد الخرز، ووقتها ابتسمت وقلت صار دورنا نحن نعطي الفرحة للولاد، ونفرح على فرحهم، #بالمشرمحي صار دورنا نفرحهن، وقمت مسحت دموعي وحضرت العيديات لولاد أختي وأخي، واستقبلتهن بحنية وفرحت على فرحهم... وكل عيد ونحن الفرحة ❤️



ودايما في بكرا، ورح يكون احلى معنا 🤝❤️

#بالمشرمحي

مع بداية الحرب في فلسطين، أو خلينا نحكي #بالمشرمحي وبالعامية، يعني وقت صار الانقلاب والهجوم يلي عملوه الفلسطينية، وقته...
19/10/2023



مع بداية الحرب في فلسطين، أو خلينا نحكي #بالمشرمحي وبالعامية، يعني وقت صار الانقلاب والهجوم يلي عملوه الفلسطينية، وقتها حطيت إيدي على قلبي وقلت الله يحميهن من الرد، لأن هنن عم يتعاملوا مع يهود وبكفي كلمة يهود لتفهموا قصدي، ومن وقتها وأنا عم حاول اكتبلكن ياها #بالمشرمحي بس مع الأسف الكلمات ماعاد تقدر تعبر عن الوجع ولا الخذلان والخزي يلي فيه العرب، وطبعا مع صمت المجتمع الدولي، وكل واحد بطلع بقول تصريحات وبرجع بقعد ببيتو معزز مكرم، وأهلنا في فلسطين كل يوم عم يموتوا على يد احتلال مالو تاريخ غير التاريخ المليان بالوحشية والظلم...
البوستات وأي شي عم تعملوه على مواقع التواصل الاجتماعي هو بنظركن محاولة للدفاع عن غزة، ولكن هل هاد الشي عم يجيب نتيجة؟؟ أكيد لأ، لأنو ما حدا رح يسمعنا....
سنين طويلة من احتلال اسرائيل لغزة، ونحن ساكتين ومبسوطين وعايشين حياتنا، هلأ وقت عملوا الهجوم حسينا؟؟ وهلأ صرنا نقول فلسطين؟؟ وين كنا من قبل؟؟
لهيك ما كان بدنا نحكيها #بالمشرمحي
يعني بالأخير صلوا وادعوا لأن الشيرات واللايكات والتعليقات ما بتنفع، وصدقوني وقت رح يفتحو الحدود ونقدر نروح لهنيك نحارب معن نحن #بالمشرمحي رح نكون أول الناس...
وملاحظة أخيرة: لا تنسوا أنو هي علامة من علامات الساعة الكبرى، لهيك أتقوا الله وتوبوا قبل فوات الأوان 🤷 اللهم إني قد بلغت، اللهم فاشهد...
#بالمشرمحي

22/09/2023



*وبعدين معك يا أحمد؟ ايمت رح تلتزم بالصلاة؟
أخوي كم مرة قلتلك لا تتدخل فيني وبصلاتي، الايمان بالقلب مو بالصلاة بكفي الخير يلي عم بعملو مع الناس المحتاجة...

*ميس مالك حاسة شوي أنو صاير المكياج يلي عم تحطيه تقيل عالشارع وحتى بنطلونك كتير ديق، حبيبتي والله أنا بحبك لهيك عم انصحك حرام تلبسي هيك أنتي فاتنة وعم تزيدي فتنتك!!!
خلص شبك أنا حرة بلبسي ولا تقعدي تعمليلي فيا شيخ، كل واحد حر بحالو وبدينو ومحدا نازل على قبر حدا، وغير هيك أنا الحمدلله ما بقطع وقت صلاة أبدا والايمان بالقلب مو باللبس..

-لك شفتي هي شو كانت لابسة ههههه يعليها كل لبسها بضحك وشرشوح متلها.
=هههههه اي فعلا كتير شرشوحة، لسا شفتي هديك كيف عم تحكي عن خطيبا يخرب بيتا شو مأنزعة.
-يوه تركيني منا ومن خطيبا، ليكي ليكي هي المارقة كيف شكل أنفا قد الباتنجانة هههههههه
=ههه شكلا ما سمعانة بالكونتور وعمليات التجميل شو هالناس المتخلفة هي.
-ليكي تأخر الوقت بدي قوم روح عالبيت ولحق صلاة العصر.
=يخرب بيتك بعد ما شليتي ع نص الكرة الأرضية وتنمرتي على خلقة الله بدك تروحي تصلي.
-هههههه بدي كفر عن ذنوبي بقعدتي معك، وبعدين كلشي لحال، الايمان بالقلب...

كتير انتشرت هي العبارة بالسنين الأخيرة، مع الأسف مفاهيم مغلوطة دينيا، وكلو بسبب قلة الثقافة بالدين، وفهمنا المغلوط لإلو، والتشدد وكتير قصص خلتنا ننحدر هيك ونشتغل على هوانا ونقول ٱخر شي الايمان بالقلب...
الايمان يا حبيبي بالقلب صحي، بس كمان لو كان بالقلب كنا شفناه بالأفعال، ما كان ضل بالقلب ونحن عم نجهر بالمعصية، الحرية بتنتهي عند حدود الدين، والعمر عم يمضي ونحن غافلين، والموت حوالينا عم يحوم، بلحظة بصير زلزال أو فيضان، وبياخدنا كلنا معو وبتخلص الحياة ومنقول ياريت لو نرجع لحظة ونصلح يلي عملناه...
#بالمشرمحي الايمان بالقلب صح بس كمان بالأفعال، خيركم من أظهر الخير وأبطنه، وشو بدي بالخير يلي بقلبك إذا عم تورجيني عكسو....

#بالمشرمحي❤️

النجاح المزيف...من فترة طلعلي بالصدفة بوست لشخص، وكان بوست إيجابي كثير، وفيو طاقة تدفعك إنك تقوم تحرر القدس، ههههه اي وا...
23/08/2023

النجاح المزيف...

من فترة طلعلي بالصدفة بوست لشخص، وكان بوست إيجابي كثير، وفيو طاقة تدفعك إنك تقوم تحرر القدس، ههههه اي والله على قد ما حاكي صاحبو عن الإرادة والقوة والإنجازات والإبداعات، وعملتلو متابعة، وصرت شوف كيف هو كل يوم عم ينهي كورس شكل، وبيوم بسافر بقابل شخصية معينة، ومنشوف مشاريعو وكمية الإنجازات العظيمة يلي كل يوم بنزلها على صفحتو، وأنا تشوقت كثير اتعرف على هاد الشخص بشكل شخصي وأخد منو خبرة بهي الحياة وبالأعمال كمان، وفعلاً رتبت موعد ورحت زرتو، لأن هو بفتح باب للاستشارات وللتطوع ولكتير قصص تانية، لهيك سهل كتير تقدر توصلو وتقعد معو، وقعدت معو وزاد اعجابي فيو أكثر وأكثر، وقررت إنو هاد هو قدوتي بالحياة وهو عرابي وشو رح ينصحني رح بعمل، واتطوعت معو بأحد المشاريع وتطورت علاقتي فيو لصرنا صحبة، ووقت بقلك صحبة يعني بحكيلي كلشي حتى عن حياتو الشخصية، وهون كانت الصدمة، وقت عرفت بعلاقتو السيئة كثير مع اهلو، بالإضافة للحاجز يلي بينو وبين زوجتو، والأسوء كان هو افلاسو، حرفياً كان شخص مفلس وكل يلي بظهرو للناس هو قشور، ولكن المخيف أكثر أنو هو شايف حالو ناجح بهل الأشياء يلي عم ينشرهن عالسوشيال ميديا، وعلى الكلام والدعم والفخر يلي بسمعن من الناس، ببساطة كان علني للناس والباطن كان فشل...
طبعا هاد ما بس شخص واحد، هاد نموذج لكثير أشخاص منشوفن ومنفكرن ناجحين، ومنصير مندور على أي شي نعملو لحتى ننزلو عالسوشيال ميديا وعلى قائمة انجازاتنا ونتفاخر متلن، لهيك عزيزي القارئ لا يغرك أبداً نجاح أحد، ولا تقارن نفسك بحدا، ووقت بدك تعمل إنجاز معين خليه يكون حقيقي وبيستاهل عنجد، يعني بضيف اشي على حياتك، مو أي شي بس لنحصد اعجابات من الناس
#بالمشرمحي انتبه لا يكون نجاحك مزيف

#بالمشرمحي

21/08/2023

سورية 2009

200 ليرة سورية

اليوم طبعوني وحطوني مع رزمة من إخواتي من فئة ال200 ليرة وكان لونا مميز كتير والناس فرحوا وقت شافونا، أول مرة طلعت من البنك المركزي وقت عطت الرزمة الموظفة لموظف بنك ثاني انسيت اسمو، وهاد الموظف شلفنا أنا وإخواتي بغرفة باردة كتير، مع مجموعة كبيرة من العملات التانية، الخمسين والمية، وفي كمان كان عملات معدنية لونهن عم يضوي بالعتمة،
ما بتزكر اديش مرق وقت وأنا بالغرفة جوا لحتى اجا موظف ثاني وشالني مع مجموعة من الرزمات الثانية، وعطانا لشيخ كبير بالعمر، وهاد الشيخ فرط الرزمة وصار وقت افترق عن إخواتي، عطاني لشب صغير شكلو بيشتغل عندو وشو فرح هالشب لما شافني وقال اليوم بدي أخد فروج مشوي لاهلي، وفعلا راح اشترا فيني فروج وأخد الباقي فراطة، وقعدت بمحل هالمشاوي، لحد ما اجا زلمة وأخد طلبية كبيرة وعطا لصاحب المحل عملة من فئة 500 ل.س وأخدني كمالة، عطاني بعدين لولد صغير شكلو ابنو ورماني هالولد بعلبة، واديش مرق وقت مابعرف، بس الظاهر كان وقت كبير لأنو اسمعت أصوات تفجيرات وبعدين اختفا صوت الناس من البيت يلي كنت فيه، مرق وقت طويل وأنا بسمع ناس بتصرخ وناس بترميني وطلق رصاص وأشياء غريبة كتير، شكلو كأنو في حرب، هرمت وفكرت أنو مبقا رح اطلع من هي العلبة أبدا وهاد هو مصيري الأخير، لأجا يوم وخف أصوات التفجير، ومرق وقت طويل ما عدت سمعت شي، وبمرة كنت نايم وفقت على صوت وكان شخص شايل العلبة من بين الركام، وسمعتو عم يحكي ويقول: شوف أخي هي مطمورتي من تسع سنين وقت نزحنا انسيتها لأن كنا هربانين وما وعينا على شي، شوف الخراب يلي صاير بالبيت ولسا هالمطمورة على حالها، ياترى اديش بقيان فيها مصاري.
فتح العلبة وشافني ولما شافني ضحك كتير وقال ليك 200 ليرة بوقتا شو كانت تشتري أشياء ووقت احملها حس إني أغنى ولد بالحارة.
هون انا فهمت أنو قيمتي الشرائية انخفضت كتير، لأن بعد ما نزل اعطاني لشوفير السرفيس، وصرت اتداول بين السرافيس من واحد لواحد، لحد ما اجا يوم وكنت بجزدان صبية وأجت تعطيني مع وحدة من اخواتي للشوفير، والصدمة كانت لما الشوفير قلها ماباخد فراطة، مبقا حدا ياخد ال200 ليرة صارت للكب....
هون فهمت أنو خلصت صلاحيتي وصار لازم ودع الحياة بعد كل هالمعاناة يلي عانيتها وقلت ياريتني بقيت بالمطمورة ولا طلعت وشفت الدنيا كيف صارت ولا كيف ماعاد الي قيمة....
#بالمشرمحي هي مو بس قصة 200 ليرة هي قصة أشخاص وحياة كاملة، والوجع أكبر من أنو يتلخص بقصة صغيرة.....

بس مابقول أتشو 🙂 بقول اشوايهاب كزارة ❤️❤️
23/07/2023

بس مابقول أتشو 🙂 بقول اشو

ايهاب كزارة ❤️❤️

27/02/2023

.… 💔

تعليق: ايهاب كزارة
اعداد: Ibrahim Kammaz

02/01/2023

بمروا السنين ورا بعضن، متل البرق، وسنة ورا سنة منقرر ومنقول هي السنة رح تكون غير، رح أنجز فيا كتير شغلات
وبتجيب هالورقة والقلم متل ما بحكولنا وبتكتب خطتك للسنة الجديدة، مع أنو أنا وياك منعرف إنك مارح تحقق شي 😅 مجرد عادة أخدناها، ونسينا الأهم، أنو نركز على تغيير طريقتنا بالتفكير لنقدر وقتا نغير نظرتنا ومنها منحقق أهدافنا 💙

حط خطة مو بس أهداف، لأنو كل هدف بحاجة لخطوات لنحققو، فكروا شو بيحتاج هاد الهدف ليتحقق وإذا تحقق شو رح يرجع هاد الشي علينا؟!

وكتبولنا بالتعليقات شو مخططين وشو بتحلموا، وخليكن واقعيين 😁 ورح نحقق كتير 😍
وطبعاً لا تنسوا تتركوا الخيبات والتعب وكلشي سببلكن ألم ب 2022 وتمشوا منفضين كتير شغلات وناس لل 2023

#بالمشرمحي

Address

Aleppo

Telephone

+963997778123

Website

Alerts

Be the first to know and let us send you an email when بالمشرمحي posts news and promotions. Your email address will not be used for any other purpose, and you can unsubscribe at any time.

Shortcuts

Share

Category