24/09/2025
اهلنا الكرام القريبين من مناطق الحرائق:
خلال هالوقت اللي عم ينتشر فيه الدخان بكثافة، لازم لكل ينتبه ويتصرف بوعي حتى يحمي حاله. أهم خطوة هي إنو نقلّل قدر الإمكان من التعرّض للدخان، لأنو خطره كبير خاصة على الأطفال، كبار السن، والناس اللي عندها مشاكل تنفسية أو قلبية.
خليكم جوّا البيت وسكّروا الشبابيك والأبواب بإحكام، وحاولوا تسدّوا أي فراغ صغير ممكن يدخل منو الدخان. إذا عندكم مكيف أو مروحة شغّلوها عالتدوير الداخلي بدون ما يدخل هوا من برا.
إذا اضطريتوا تطلعوا برا لأي سبب، غطّوا انفكم وتمّكم بكمامة طبية، وإذا ما في كمامة، استخدموا قطعة قماش أو شاش مبلول، هالشي بيخفف كتير من أثر الدخان. وحاولوا تتحركوا بأقل مجهود ممكن لحتى ما يزداد التنفّس.
اشربوا مي بكثره، لأن المي بتساعد الجسم يضل رطب وبتخفف من أعراض الجفاف والحرقة بالحلق. بنفس الوقت بعدو عن التدخين أو إشعال أي شي ممكن يزيد الوضع سوء.
انتبهوا منيح للأشخاص الأضعف بينكم: الأطفال، كبار السن، ومرضى الربو أو الحساسية. حاولوا تخلوهم بأماكن بعيدة عن الدخان قد ما فيكن.
وأي شخص بيحس بضيق نفس قوي، سعال شديد، دوخة، أو صداع، لازم يحاول يصل فوراً عأقرب نقطة طبيه بتمنى من الهلال الأحمر وكل المنظمات الإنسانية توسع نطاقها لأن وضع الناس الي قراب من الحرائق سيء
سلامة كل شخص بهالظروف فوق كل اعتبار الله يحميكم ويحفظ هالأرض وأهلها ويطفّي هالنار بأقرب وقت.
شاركو المنشور أو انسخوه على صفحاتكم ليصل للناس المتضرره
