09/09/2026
مسالخير
رح احكي وحاول اختصر.. وحكيي موجه للعالم اللي بيعرفوني وعم يتعاملو معي صرلن سنين
#انا انسانة مرقت بكتيييير قصص... وولا مرة وبفضل ربي عليي وقعت.... عطول بحس برحمة ربي حواليي....
بال٢٠١٤ شاء القدر انو توقف وظيفتي... كلنا بالرقة كنا هيك... ولاني انسانة بطموح حبيت اتعلم شي وتعلمت الخياطة واتقتنها والي سنين اشتغل بهالمجال...
طلعت من الرقة وسندتني هالمهنة كتير... وكنت بفضلها ع الوظيفة كتير.... لبين مااجا وقت صارت الحياة صعبة عالبلد وماعاد في دخل ووقفت اغلب العالم وكتير مهن....
عشت سنة صعبة كنت خاف ماامن اجار المشغل او اجار البنات ومرقت الايام... لوقت تحررت الرقة. هون صار مطلوب مني روح داوم هنيك.. وبالعيلة طبيعي نلاقي اللي حب واللي كره... وانا والله ماتمسكت بالوظيفة الا بسبب ايام صعبة عدت عليي...بس بالنهاية فضلت راحة عيلتي وقررت كفي باللاذقية ومايتغير عليهن شي...
وصليت صلاة استخارة مرة واتنين... واستسلمت وجهزت حااي لانفصل..
بس فجاة اجا قرار بتمديد تكليفنا بمحافظاتنا الحالية ... هاد الحكي ببداية الشهر التامن مضي نص الشهر وصار واجو اصحاب المشغل طلبو مني سلمهم بيتهم... خلصت شغلي ودورت ع محل انقل عليه.... بس بالنهاية ماضبطت الامور فقررت طبق هالماكينات واشتغل بالبيت.... كان الوجع كبير بس الحمدلله على كل حال... معليش وظيفة الصبح وبالسهرة اشتغل قطعة ببيتي وخلص....
مارح احكيلكن شو صار بنقلة الماكينات... وكمية الدمار اللي صارت.. والتكسير... وطبعا هاد لان في انسان مختص بالنقل وعدنا يجي وجهزت كلشي بس تاني يوم بطل يرد (علما انا كتير منيحة معو بعطيه حقو وزيادة... بس هالمرة قلتلو بنقل وبحاسبك بس لاستلم حوالتي بنص الأسبوع) وصارت قصص كتير وانا بكل شغلة بقول الحمدلله بتمضي هالايام....
#المهم.... انا لما اتاخر بتسليم قطعة مو بايدي... اذا صارت الظروف صعبة... ولما اتاخر مابلوم اي زبونة تلغي طلبها... بس مو معقول تتصل فيني زبونة وقلا تستلمي الخميس
وتوافق وبعدها تجي تلغي الطلب الأربعاء
انا ماباخد #رعبون... الحياة فيها موت وحياة وبخاف يصرلي شي وتضل حقوق العالم برقبتي. اللي بدها تنصب علي مأجلتها ليوم الحساب
انا نقلت الشغل ع بيتي ورح اشتغل تواصي اون لاين وشحن للمحافظات... يعني بوجود عيلتي صعب استقبل زباين #ببيتي... خصوصي اني عم داوم عالوظيفة وبجي يدوب لحق طبخة وراحة وللسهرة لاشتغل شي... لهيك التواصي بس اون لاين مافي مكان للقياس
#اهم شي... انا موقفة طلبات لبين مااتحسن انا... وتتحسن نفسيتي... وضبط الماكينات .....
طلبات #الصداري في منن جاهز رح يتسلم... وفي منهن رح الغيه لان ماعاد عندي طاقة برر واشرح لكل العالم شو عم يصير معي....
اما بالنسبة للعالم اللي عينها برزقي وبزبايني... #مبروك لالكن هالبوست رح يفرحكن كتير.... وهي الي وحدة عليكن بلكي اخلص من حسدكن وعينكن اللي بحياتي
