29/06/2025
ကျောက်ဖြူတွင် အာရက္ခတပ်တော် AA သိမ်းပိုက်နယ်မြေများအား စစ်ကောင်စီ ထိုးစစ်ဆင်
(ကျောက်ဖြူမြို့ပေါ်ရှိ ပြည်သူများ စားနပ်ရိက္ခာ ပြတ်လပ်မှုများဖြင့် ရင်ဆိုင်နေရ)
AID၊ ဇွန် ၂၉
အာရက္ခတပ်တော် AA ထိန်းချုပ်ထားသည့် ရခိုင်ပြည် ကျောက်ဖြူမြို့နယ်မှ နယ်မြေတချို့အား စစ်ကောင်စီမှ အင်အားအလုံးအရင်းဖြင့် တန်ပြန်ထိုးစစ်ဆင် တိုက်ခိုက်နေကြောင်း စစ်ရေးသတင်းအရင်မြစ်မှ ပြောသည်။
စစ်ကောင်စီမှ ကျောက်ဖြူရှိ အမှတ် ၃၂ ရဲတပ်ရင်းအနီးရှိ ပြိုင်းစေ့ကေ့ကျေးရွာနှင့် ကပ်သပြေကျေးရွာတို့ကို ဒရုန်း၊ လက်နက်ကြီးတို့ဖြင့် ပစ်ကူပေးပြီး မြေပြင်မှလည်း ထိုးစစ်ဆင်တိုက်ခိုက်နေကြောင်း ဆိုသည်။
ကျောက်ဖြူမြို့ အခြေစိုက်တပ်ရင်းများအား စစ်ကောင်စီမှ ဇွန်လအတွင်း ရေကြောင်းမှတဆင့် အင်အားထောင်ချီပို့ဆောင်ထားပြီး ယခု တိုက်ပွဲပြင်းထန်နေသည့် အမှတ် ၃၂ ရဲတပ်ရင်းနှင့် ဓညဝတီ ရေတပ်ဌာနချုပ်ကို အဓိကထား ပို့ဆောင်ခဲ့တာ ဖြစ်ကြောင်း သိရသည်။
လက်ရှိ အာရက္ခတပ်တော် AA မှ အမှတ် ၃၂ ရဲတပ်ရင်းအား ထိုးစစ်ဆင်တိုက်ခိုက်နေပြီး စစ်ကောင်စီဘက်မှလည်း အဆင့်မြင့်ဒရုန်းများဖြင့် တိုက်ခိုက်နေကြောင်း စစ်ရေးသတင်းရင်းမြစ်တွေက ပြောသည်။
စစ်ကောင်စီမှ ကျောက်ဖြူမြို့ပေါ်တွင် လုံခြုံရေးတင်းကျပ်ထားပြီး မြို့ပေါ်မှာလည်း စားနပ်ရိက္ခာ ပြတ်လပ်မှုများဖြင့် ရင်ဆိုင်နေရကြောင်း ကျောက်ဖြူမြို့ခံများမှ ပြောသည်။
ကျောက်ဖြူမှာ ပြီးခဲ့တဲ့ ဖေဖော်ဝါရီလကတည်းက တိုက်ပွဲတွေပြင်းထန်နေတာဖြစ်ပြီး တိုက်ပွဲအတွင်း စစ်ကောင်စီရဲ့ ဗိုလ်မှူးချုပ်အဆင့်အပါအဝင် ဗျူဟာမှူးနဲ့ အရာရှိတချို့သေဆုံးခဲ့ပြီး ဒုတိယဗိုလ်မှူးကြီးအပါအဝင် စစ်ကောင်စီတပ်သား အများအပြားကိုလည်း AA က ဖမ်းဆီးရမိထားပါတယ်။
#အာရက္ခတပ်တော်
#စစ်ကောင်စီ
#ကျောက်ဖြူမြို့
#တိုက်ပွဲပြင်းထန်
