10/09/2022
NUG ကို ထောက်ခံအားပေးသွားမယ်လို့ ဂျာမနီအစိုးရ ဝန်ကြီးပြော
~~~
■ အမျိုးသားညီညွတ်ရေးအစိုးရ NUG ကို ဆက်လက်ထောက်ခံသွားမယ်လို့ ဂျာမနီနိုင်ငံ ဖက်ဒရယ်နိုင်ငံခြားရေးရုံးရဲ့ ဝန်ကြီး Dr. Tobias Lindner က ပြောလိုက်ပါတယ်။
NUG နိုင်ငံခြားရေးဝန်ကြီး ဒေါ်ဇင်မာအောင်နဲ့ ဒီကနေ့ အွန်လိုင်းကနေ တွေ့ဆုံဆွေးနွေးခဲ့ပြီးနောက် ဝန်ကြီး Dr. Tobias Lindner က သူ့ရဲ့တွိတာ စာမျက်နှာကနေတစ်ဆင့် အခုလို ပြောဆိုလိုက်တာ ဖြစ်ပါတယ်။
"မြန်မာပြည်သူတွေရဲ့ ဒီမိုကရေစီလိုလားချက် တောင်းဆိုသံအတိုင်း NUG ကို ဆက်လက်ထောက်ခံသွားမယ်" လို့ သူကဆိုပါတယ်။
အာဏာသိမ်းထားတဲ့ မြန်မာစစ်တပ်အနေနဲ့ အကြမ်းဖက် လုပ်ရပ်တွေ ရပ်တန့်ပြီး ပြည်သူလူထုရဲ့ လက်ထဲ အာဏာပြန်လွှဲပေးရမယ်လို့လည်း ပြောပါတယ်။
အိမ်နီးချင်း အာဆီယံနိုင်ငံတွေနဲ့ ကုလသမဂ္ဂတို့ကလည်း မြန်မာပြည်ရဲ့ ငြိမ်းချမ်းရေးနဲ့၊ တွေ့ဆုံဆွေးနွေးရေး ဦးတည်လာအောင် အရေးတကြီးလုပ်ကြဖို့ လိုတယ်လို့လည်း သူက တိုက်တွန်းပါတယ်။
ဒီစက်တင်ဘာလနှောင်းပိုင်းမှာ ကုလသမဂ္ဂ အထွေထွေညီလာခံ ကျင်းပဖို့ရှိနေပါတယ်။ ဒီမတိုင်ခင် NUG ဝန်ကြီးဒေါ်ဇင်မာအောင်ဟာ ဥရောပနိုင်ငံတွေဘက်က အစိုးရအဖွဲ့ဝင် ဝန်ကြီးတွေနဲ့ လိုက်လံတွေ့ဆုံတာတွေ ရှိနေပါတယ်။
ဒေါ်ဇင်မာအောင်ဟာ ပြီးခဲ့တဲ့ စက်တင်ဘာ ၈ ရက်နေ့ကလည်း ချက်သမ္မတ နိုင်ငံခြားရေးဝန်ကြီးအပါအဝင် လွှတ်တော်တာဝန်ရှိသူတွေနဲ့ လူချင်းတွေ့ဆုံခဲ့ပါတယ်။
-----------
Photo - Dr. Tobias Lindner
