เว็บไซต์คืออะไร?

https://www.facebook.com/105423715045200/

ญอมือ Story

ผญาอีสาน "พ่อ"(สืบสานผญาและวัฒนธรรมภาษาอีสาน)

09/07/2025

อ้ายน้องเอ้ย..เผิ่นว่า..
บัวย่อมอาศัยน้ำ ย้ามจีจูมดอก
บอกเถิ๋งควมชิดไกล้ อาศัยแท้เผิ่งกัน
ส่วนว่าหนองน้ำนั่น อาศัยเผิ่งสีสัน
ถ้อยทีอาศัยกัน อย่าแบ่งปันชนชั้น
สรรพสิ่งในโลกนั่น อาศัยกันเป็นหมู่
สิอยู่สูงเสียดฟ้า อาศัยแท้เผิ่งแผ่นดิน
อ้ายน้องเอ้ย.....
#ผญา #ผญาอีสาน #ผญาญอมือ #ผญาของพ่อ

04/07/2025

หล่าพี่เอ้ย...

ญ้อนว่าเทียวทางเวิ้ง เหิ๋งมาโลดค้อยค่ำ
คึดนำคนต่างบ้าน ใจสท้านห่วงบเซา......
จนว่าสามปีเข้า ตั้งด่อรอหา...
วันเวลาผ่านมานานแล้ว บ่เห็นแววได้ผูกมั่น
หนทางฝัน ย้านฮ้างเป่า...
ผญาฮักข้อยและเจ้า เพียงได้เว้าก่ายกันถ่อนั่นบ้อ
#ผญา #ผญาญอมือ #ผญาอีสาน #ผญาของพ่อ

09/04/2025

ดวงตวันแจ่มแจ้ง แสงส่องสีสัน
บ่.มีวันสูญหาย เปลี่ยนไปไกลสิ้น
คือจั่งดินกับฟ้า สัญญากันบ่.พรากคู่
ฟ้าอยู่สูงดินอยู่ใต้ กะยังได้ส่องเบิ่งกัน..นั่นเด้..
ซำบายดีมีสุข.อ้ายน้องแฟนๆผญา...ทุกๆท่าน
#ผญา #ผญาอีสาน #ผญาญอมือ #ผญาของพ่อ

15/03/2025

หล่าพี่เอ้ย...ตื่นขึนมาท้องฟ้าคึสีเหง่าๆน้.

ฟ้าทรงสีคึ้มๆ มาคึตึ่มทวีเหงา แท้น้..
ท้องฟ้าเป็นสีเทา หือ.ข่าวฝนสิมาแล้ว..
คึมีแนวสิมาซ้ำ ยังทำใจบ่.ทันชื่น....
พิษแผลใจไข้สอื้น บ่ทันฟื้นจากฮักหมอง
หล่าพี่เอ้ย... ตั้งแต่อ้ายขาดน้อง
กะยังห่วงบ่ทันหาย ทางหัวใจกะยังเหงา
คึดบ่.เซาคึคนบ้า วันเวลาได้ผ่านพ้น
ฤดูฝนพ้นหลายเหล่า ว่าสิบ่.คึดฮอดเจ้า
ยังหลงเศร้า ห่วงหา...อยู่เด้อ
#ผญา #ผญาอีสาน #ผญาญอมือ #ผญาของพ่อ

14/03/2025

บุญเอ้ย.....
เผิ่นว่าบุญผลาสร่าง ทางทานคราดได้
คันบ่สร่างก่อไว้ สังสิได้ผ้.กัน....
เผิ่นว่าบุญบุญนั่น ขุดน้ำบ่อก่อศาลา
ตัดถนนให้คนเทียว นั้นแมนบุญหลายล้น
ส่อยเหลือคน บ่มีกินมีใช้..
คือกุศลอันยิ่งใหญ่ แมนทุกข์ยากปานได๋..
ให้มีใจต่อตั้ง กุศลสร่างต่อนบุญ
ไปหน้าผุ้น บุญสิส่อยนำซู
ผลผลาของทาน สิส่อยนำมาญู้
บุญสิซูเฮาขึ้น เมืองสวรรค์.ไปลั่นลัน
เถิ๋งบ่ฮอดสวรรค์ กะขอให้ฮอดแค่ชั้น
บันไดขั่นบ่อนสิไป เด้อ.อิแม่ป้า.อิพ่อลุงเอย..
อย่าสุว่า.ทานให้ไผ.กะบ่คือทานให้พระได๋....ย้านเผิ่นไปซื้อล็อคเตอรี่.เบิ๊ด.ดอกว้า.🤣🤣🤣🤣
#ผญา #ผญาอีสาน #ผญาญอมือ #ผญาของพ่อ

13/03/2025

เผิ่นว่าบุญบ่ให้ ญอยไฮสังมาหย่อน
ฝ่าบ่ได้ตั้งก้อน ฮอนฮำพื้นนั้นแมนฝน
ลมพานพัดโจ้นจ้าว สนูว่าว.ดังแฮง..
แสงตะเว็นลงลับ ขอบผาบังไม้
ในหัวใจแสนกุ้ม มรสุมรุมกระหน่ำ
คึดฮอดคำอ้ายเว้า กับเจ้าแมนบ่.ลืม
ท้องฟ้าสีครึ้ม ๆ ย้านเจ้าลืมคำเก่า
ข้าวขึ้นนาปลาขึ้นเล้า กาเวาฮ้อง.อ้ายส่องหา
#ผญา #ผญาอิสาน #ผญาญอมือ #ผญาของพ่อ

12/03/2025

พี่น้องเอ้ย..ผญาฮ่ำไฮ ฮ่ำฮอน. ญ้อนควมจน.จั่งทนหนีไกลบ้าน เฮือนซานจากลูกอ่อน ไกลบ่อนนอนทุกย๊ากไฮ้ หาเงินได้สิอ่วยมา...ผุ้แหลว
ดวงตะเว็นจากฟ้า สนธยาฟ้าค่ำๆ
ใจคึดนำตั้งแต่เจ้า ตะเว็นเศร่าหม่นหมอง
มื้อที่อ้ายห่างน้อง ไกลบ่อนนอนมา....
ได้ฝากคำสัณญา ก่อนสิลาลงบ้าน
รถโดยสารแลนจ้าว ซุมหมู่เขาพากันซื่น..
บาดห่าชายใจสอื้น ฝืนคำเว้าบอกสั่งลา.
ว่า แม่โตเอ้ย.. วันตรุษจีนปีหน้า..
14 กุมภา........ เด้อหล่าอ้ายสิอ่วย.....
เบิ่งงัวควยกับลูกน้อย คอยถ่าอ้ายสิมา...
เหลียวเบิ่งฟ้า เมฆเหลืองลาย้ามแลง
ดวงตะเว็นสีแดง คึดแฮงแต่นำเจ้า
ให้เจ้าพาลูกเข้า ในเฮือนตุ้มผ้าห่ม...สาเด้อคำ
คึดนำหลายใจแห่งกุ้ม ทนก้มหน้าเซ็ดน้ำตา แท้แหลว ..พี่น้องเอย..
#ผญา #ผญาญอมือ #ผญาอิสาน #ผญาของพ่อ

11/03/2025

ผญาเปรียบเปรย.ครับผม.ไปตามลายผญาน้.ลายผญาพาไป..อ้ายน้อง.เอย.นี่หล่ะน้.เผิ่นว่า...

คอยแต่บุญมาหนุนค้ำ บ่ทำการมันบ่แมน.ได๋
ถ่าแต่ผลามาแลนญู้ ซูให้แมนบ่ควร.แท้แหลว

เขียนสำนาณผญาสร้อย บ่ตามฮอยปู่.ย่า
ลายผญาบ่สอดคล้อง ทำนองห้วนบ่ม่วนหู

สิบผุ้ฮู้ซาวผุ้ฮู้ สังสิถ่.ผุ้เคยทำ.จริงแหลว
สิบจารย์ครูญาฌาช์ บ่ถ่สามเณรน้อย

คอยแต่บุญผลาสร่าง ทางทานแต่ชาติก่อน
บ่ตื่นเดิ๊กลุกเช้า เซาๆถ่อนอย่าสุฝัน..แท้แหลว #ผญา #ผญาญอมือ #ผญาอิสาน #ผญาของพ่อ

10/03/2025

ดอกไม้ต่างดอกไม้ บ่ได้ต่างสีสัน
เพียงแต่สายเผ่าพันธุ์ ต่างกันชนเชื้อ
อยู่เหนือหรือใต้ กลางดงพงศ์ป่า
นามอยู่สูงเสียดฟ้า ศักดิ์นานั่นอยู่ดง
เจ้าผุ้พงศ์นามเชื้อ สีแดงอร่าม.
งามตาย้ามเจ้าแย้ม เพียงเอิ้นต่างกัน
คุณค่านั่น แตกต่างทางนิยม
หวานเป็นลมขมเป็นยา ย่อมต่างกันทางใช้
ผุ้มีใจสมาน เอื้อ เหนือฤทัยชมชื่น
ขึ้นอยู่ตงหรือแม่น้ำ งามแท้บ่ต่างกัน.น้.อ้ายน้องเอย... #ผญาอิสาน #ผญาญอมือ #ผญา #ผญาของพ่อ