15/12/2025
🇰🇭 ក្នុងគ្រាដែលសង្គមជាតិកំពុងប្រឈមមុខនឹងបញ្ហា ការរួបរួមគ្នាក្នុងសកម្មភាពប្រកបដោយចក្ខុវិស័យវែងឆ្ងាយ គឺជាគន្លឹះដ៏សំខាន់បំផុត។ យើងត្រូវយល់ថា ជាតិយើងខ្លាំង កើតចេញពីសេដ្ឋកិច្ចយើងខ្លាំង...
១. យើងត្រូវផ្តោតលើការលក់ដូររកស៊ី និងធ្វើការងារឲ្យខ្លាំងជាងមុន។ នៅពេលអាជីវកម្មឬការងាររបស់យើងមានបញ្ហា ឬដួលរលំ យើងមិនត្រឹមតែបាត់បង់លទ្ធភាពក្នុងការជួយអ្នកដទៃប៉ុណ្ណោះទេ ថែមទាំងក្លាយជាបញ្ហាម្នាក់ទៀតនៅក្នុងសង្គមផងដែរ។ ដូច្នេះ មិនថាស្ថិតក្នុងស្ថានភាពបែបណាទេ យើងត្រូវតែខិតខំប្រឹងប្រែង រកស៊ីលក់ដូរ និងធ្វើការឲ្យបានខ្លាំងក្លាជាមុន ដើម្បីធានាបាននូវនិរន្តរភាពចំណូល និងស្ថិរភាពហិរញ្ញវត្ថុរបស់យើងផ្ទាល់ ដែលជាកោសិកាសេដ្ឋកិច្ចដ៏សំខាន់របស់ជាតិមួយ។
២. យើងត្រូវពង្រឹងស្មារតី ចិត្ត និងគំនិតឲ្យរឹងមាំ។ បញ្ហាដែលកើតឡើងអាចធ្វើឲ្យយើងមានអារម្មណ៍មិនល្អ ធុញថប់ ច្របូកច្របល់ និងបាត់បង់កម្លាំងចិត្តក្នុងការធ្វើការងារប្រចាំថ្ងៃ។ ក៏ប៉ុន្តែ យើងត្រូវដឹងថា ការចុះចាញ់នឹងអារម្មណ៍ទាំងនេះ គឺមិនអាចជួយដោះស្រាយបញ្ហាបានឡើយ។ ផ្ទុយទៅវិញ យើងត្រូវបន្តសកម្មភាពការងាររកស៊ីប្រចាំថ្ងៃឲ្យបានធម្មតា ឬខ្លាំងជាងមុន ដើម្បីរក្សាចង្វាក់ជីវិត និងសកម្មភាពសេដ្ឋកិច្ចឲ្យនៅតែបន្តដំណើរការ ដែលនេះជាមធ្យោបាយដ៏ល្អបំផុតដើម្បីពង្រឹងសេដ្ឋកិច្ចជាតិ និងស្មារតីរួម។
៣. យើងចាំបាច់ត្រូវគ្រប់គ្រងព័ត៌មាន ។ ក្នុងពេលមានវិបត្តិ ភាពច្របូកច្របល់នៃព័ត៌មានអាចនាំឲ្យមានភាពភិតភ័យ និងការសម្រេចចិត្តខុសឆ្គង។ យើងត្រូវតែផ្ទៀងផ្ទាត់ព័ត៌មានពីប្រភពផ្លូវការ និងគួរឲ្យទុកចិត្តប៉ុណ្ណោះ ហើយកុំចែករំលែកព័ត៌មានដែលមិនទាន់បានផ្ទៀងផ្ទាត់ (Fake News)។ ត្រូវរក្សាគំនិតឲ្យនៅតែច្បាស់លាស់។ ប្រើប្រាស់បណ្ដាញទំនាក់ទំនងសង្គមដើម្បីចែកចាយដំណោះស្រាយ គំនិតច្នៃប្រឌិត និងការលើកទឹកចិត្ត ជំនួសឲ្យការត្អូញត្អែរ និងស្តីបន្ទោសឥតល្ហែរ។
៤. យើងត្រូវផ្តល់កម្លាំងចិត្ត និងសូមកុំរិះគន់ជាន់គ្នាពេក។ ក្នុងគ្រាលំបាក ការរិះគន់ពេកដោយមិនបានចូលរួមចំណែក គឺប្រៀបដូចជាការហួចហៅខ្យល់មកបន្ថែមលើភ្លើងដែលកំពុងឆេះ។ ដូច្នេះហើយ សូមកុំរិះគន់គ្នាពេក បើឃើញនរណាម្នាក់បន្តការងាររកស៊ីធម្មតា...។ យើងត្រូវយល់ថា ពួកគេកំពុងតែបំពេញតួនាទីជាពលរដ្ឋដែលកំពុងជំរុញសេដ្ឋកិច្ចដ៏សំខាន់។ មានតែសេដ្ឋកិច្ចខ្លាំងទេ ទើបជាតិយើងខ្លាំង យើងប្រាកដជាឃើញជាក់ស្តែងហើយ អាមេរិក ចិន សិង្ហបុរី... សុទ្ធតែសេដ្ឋកិច្ចខ្លាំង។ ចូរយើងផ្ដល់កម្លាំងចិត្ត និងគោរពការសម្រេចចិត្តរបស់គ្នាទៅវិញទៅមក ដើម្បីសាមគ្គីភាពជាតិ...។
៥ យើងត្រូវចេះជួយគ្នា និងចែករំលែក។ បន្ទាប់ពីយើងបានប្រឹងប្រែងរកចំណូលយ៉ាងលំបាក ហើយអាជីវកម្មរបស់យើងនៅតែអាចបន្តដំណើរការបានរឹងមាំ នោះគឺជាពេលដែលយើងត្រូវអនុវត្តគោលការណ៍ «ចេះជួយគ្នា»។ យើងត្រូវបរិច្ចាគប្រាក់ចំណូលមួយផ្នែក ជួយជនរងគ្រោះ ជនភាសសឹក ឬអ្នកដែលត្រូវការជំនួយ តាមលទ្ធភាព និងកម្លាំងរបស់យើងម្នាក់ៗ។
៦. យើងត្រូវរៀនសូត្រ និងត្រៀមខ្លួនសម្រាប់អនាគត។ វិបត្តិគ្រប់បែបយ៉ាងតែងតែជាមេរៀនដ៏មានតម្លៃ។ យើងត្រូវពង្រីកខ្លួនឯងឲ្យខ្លាំងតាមដែលអាចធ្វើបាន ដើម្បីអាចប្រឈមមុខនឹងបញ្ហាស្រដៀងគ្នានៅពេលអនាគតបានកាន់តែរឹងមាំ។
យុវជនជាទីស្រលាញ់ ខិតខំប្រឹងប្រែងឡើង "បើសិនអ្នកមិនខ្លាំង មិនរឹងមាំទេ អ្នកអាចនឹងជួបបញ្ហារហូត ហើយចាំចុះ គ្មានទេយុត្តិធម៏សម្រាប់អ្នកទន់ខ្សោយ... ពិភពលោកនេះគេមើលតែផលប្រយោជន៍ប៉ុណ្ណោះ" ។
Ⓒ រក្សាសិទ្ធដោយ #ផ្នត់គំនិត
