23/05/2026
ဒေါင်ကျကျ ပြားကျကျ နေတတ်အောင် ကြိုးစားပါတယ်။
လိုသုံးပဲသုံးသုံး မလိုသုံးပဲသုံးသုံး
သူတပါး စိတ်ချမ်းသာတယ်ဆိုရင်ပဲ
ကျေနပ်ပါတယ်။
ခါးသီးလွန်းတဲ့ ဘဝတွေမှာ
ဒေါင်ကျကျ ပြားကျကျ နေသားကျနေပြီမို့
လူ့ဘဝဆိုတာထက် ပစ်တိုင်းထောင်လို
နေလိုက်ရတာပါပဲ။
အဲ့ဒီလို နေထိုင်နိုင်ဖို့
စိတ်ဓာတ်ကို သန်မာအောင် လေ့ကျင့်ထားရမယ်။
မကောင်းဘူးလား တိုက်ရိုက်ပြောနေ
ရှင်းပြ မနေတော့ဘူး။
အချိန်တန်ရင် ကိုယ်ကောင်းတာ လုပ်ရင်
ကိုယ့်ခေါင်းက ဘယ်မှ ရွေ့သွားမှာ မဟုတ်တော့
ရှင်သန်နေသ၍ လိပ်ပြာလုံဖို့ပဲ လိုတယ်မဟုတ်လား။
ဒဏ်ရာတွေပြပြီး
ငိုနေရမယ့် အရွယ်တွေ မဟုတ်တော့
တခါတလေတော့ မြိုသိပ်လိုက်ပြီး
တခါတလေတော့
မျက်ရည်ကျမိတဲ့အချိန်တွေ ရှိခဲ့တာပဲလေ။
နေသားကျဖို့ နေသာသလို မနေတတ်ပေမယ့်
နေရတဲ့ အခိုက်အတန့်တိုင်းကို
ကျေနပ်နေဖို့ပဲ လိုပါတယ်။
မျှော်လင့်တာတွေ များရင်
ပူလောင်နေရမယ့် အတူတူ
ကိုယ်စိတ်ချမ်းသာဖို့ ဘယ်သူ့ဆီကမှ
မမျှော်လင့်ပါနဲ့။
မျှော်လင့်ချက်နည်းလေ စိတ်ချမ်းသာရလေပါပဲ။
ကိုယ့်ဘဝ ကိုယ့်အကြောင်းကို
ကိုယ်ကလွဲပြီး နားလည်ပေးနိုင်မယ့်သူ ဆိုတာ
လောကမှာ မရှိသလောက် ရှားပါလိမ့်မယ်။
နှစ်သိမ့်ပေးမယ့်သူထက်
ထိုးနှက်မယ့်သူက ပိုများလို့
အရမ်းဝမ်းနည်း နေရင်တောင်
ပြုံးနိုင်ဖို့ပဲ ကြိုးစားလိုက်ပါတယ်။
ကိုယ်ကျရှုံးရင် တွဲထူမယ့် လက်ထက်
ပြန်တွန်းချင်တာက ခပ်များများ ဖြစ်လာတယ်။
လောဘ အတ္တ မာန ဒေါသတွေ များလာရင်
ဘယ်လောက် ခင်ခင် ဘယ်လောက်ချစ်ချစ်
နွေးထွေးတဲ့ ဆက်ဆံရေးတွေ ဖြစ်မလာနိုင်တော့ဘူး။
